AKP ភ្នំពេញ ថ្ងៃទី០១ ខែមេសា ឆ្នាំ២០២៥ -- អាជ្ញាធរសុខាភិបាលដែលមានមូលដ្ឋាននៅតំបន់ហ្គាហ្សាបាននិយាយកាលពីថ្ងៃចន្ទថាយ៉ាងហោចណាស់ជនជាតិប៉ាឡេស្ទីន ១.០០១នាក់ត្រូវបានសម្លាប់ និង២.៣៥៩នាក់ផ្សេងទៀតបានរងរបួសចាប់តាំងពីអ៊ីស្រាអែលបានបន្តការវាយប្រហារដ៏ខ្លាំងក្លារបស់ខ្លួននៅថ្ងៃទី១៨ ខែមីនានៅទូទាំងតំបន់ហ្គាហ្សាស្ទ្រីប។

អាជ្ញាធរសុខាភិបាលបាននិយាយនៅក្នុងសេចក្តីថ្លែងការណ៍មួយថាសាកសពសរុបចំនួន ៨០នាក់ និងរបួស ៣០៥នាក់បានមកដល់មន្ទីរពេទ្យតំបន់ហ្គាហ្សាស្ទ្រីប ក្នុងអំឡុងពេល ៤៨ម៉ោងចុងក្រោយនេះ ដោយអាជ្ញាធរបានកត់សម្គាល់ថា នៅតែមានជនរងគ្រោះមួយចំនួនស្ថិតនៅក្រោមគំនរបាក់បែក ហើយរថយន្តសង្គ្រោះបន្ទាន់ និងបុគ្គលិកការពារជនស៊ីវិលមិនអាចទៅជួយពួកគេបានឡើយ។

ទីភ្នាក់ងារព័ត៌មានផ្លូវការរបស់ប៉ាឡេស្ទីន WAFA បានរាយការណ៍ថាកងទ័ពអ៊ីស្រាអែលបានទម្លាក់គ្រាប់បែកលើភូមិអាល់ម៉ាស្ដារ (Al-Masdar)នៅកណ្តាលតំបន់ហ្គាហ្សាស្ទ្រីប និងភាគខាងកើតនៃតំបន់ចាបាលៀ ភាគខាងជើងតំបន់ហ្គាហ្សាស្ទ្រីប កាលពីថ្ងៃចន្ទ ដោយបានសម្លាប់មនុស្សយ៉ាងហោចណាស់ ៥នាក់ ។

ទីភ្នាក់ងារ WAFA បានបន្ថែមថា កងទ័ពកាលពីថ្ងៃចន្ទក៏បានទម្លាក់គ្រាប់បែកលើតំបន់ជាច្រើននៅទីក្រុងខាន់យូនីស ភាគខាងត្បូងតំបន់ហ្គាហ្សាស្ទ្រីប ដែលបណ្តាលឱ្យមានអ្នកស្លាប់ និងរបួស។ កងទ័ព​អ៊ីស្រាអែល​មិន​ទាន់​ធ្វើ​អត្ថាធិប្បាយ​ជុំវិញ​ការ​វាយ​ប្រហារ​ទាំង​នេះ​នៅ​ឡើយ​ទេ។

អាជ្ញាធរសុខាភិបាលតំបន់ហ្គាហ្សាក៏បានកត់សម្គាល់ផងដែរកាលពីថ្ងៃចន្ទថា ចំនួនអ្នកស្លាប់ពីប្រតិបត្តិការយោធាអ៊ីស្រាអែលចាប់តាំងពីថ្ងៃទី៧ខែតុលា ឆ្នាំ២០២៣ បានកើនឡើងដល់ ៥០.៣៥៧នាក់ហើយនិងរបួសដល់១១៤.៤០០នាក់៕

ដោយ៖ មូល មិនា (ប្រភព៖ ស៊ីនហួ)