AKP ភ្នំពេញ ថ្ងៃទី០១ ខែមេសា ឆ្នាំ២០២៥ -- ប្រធានាធិបតីបារាំងបាននិយាយថា លោកបានអំពាវនាវឱ្យអ៊ីស្រាអែលបញ្ឈប់ការវាយប្រហារនៅតំបន់ហ្គាហ្សា ហើយត្រឡប់ទៅរកបទឈប់បាញ់គ្នាវិញ បន្ទាប់ពីមានការសន្ទនាតាមទូរស័ព្ទជាមួយនាយករដ្ឋមន្ត្រីអ៊ីស្រាអែល។

ប្រធានាធិបតីបារាំង លោក អេមម៉ានុយអ៊ែល ម៉ាក្រុន (Emmanuel Macron) បានសរសេរនៅលើបណ្តាញសង្គមអ៊ិច (X) កាលពីថ្ងៃសៅរ៍សប្តាហ៍មុនថា «ខ្ញុំបានអំពាវនាវឱ្យនាយករដ្ឋមន្ត្រីអ៊ីស្រាអែលបញ្ឈប់ការវាយប្រហារទៅលើតំបន់ហ្គាហ្សា និងត្រលប់ទៅរកបទឈប់បាញ់គ្នាដែលក្រុមហាម៉ាស់ត្រូវតែទទួលយក។ ខ្ញុំបានសង្កត់ធ្ងន់ថា ជំនួយមនុស្សធម៌ត្រូវតែចាប់ផ្តើមឡើងវិញជាបន្ទាន់»។

អ៊ីស្រាអែលបានបន្តការទម្លាក់គ្រាប់បែកយ៉ាងខ្លាំងក្លានៅតំបន់ហ្គាហ្សាកាលពីថ្ងៃទី១៨ ខែមីនា ដោយបញ្ចប់បទឈប់បាញ់គ្នាប្រមាណជិតពីរខែនៅក្នុងទឹកដីដែលខ្លួនបានសម្លាប់មនុស្សជាង ៥០.០០០នាក់ចាប់តាំងពីថ្ងៃទី០៧ ខែតុលា ឆ្នាំ២០២៣ មក។

លោក ម៉ាក្រុន ក៏បានជំរុញឱ្យអ៊ីស្រាអែលគោរពយ៉ាងតឹងរ៉ឹងទៅលើបទឈប់បាញ់គ្នានៅលីបង់។ លោកបាននិយាយថា «តម្រូវការនេះអនុវត្តចំពោះភាគីទាំងអស់ ដើម្បីធានាសុវត្ថិភាពនៃប្រជាជនស៊ីវិលនៅភាគីទាំងពីរនៃខ្សែបន្ទាត់ខៀវ» ដោយលោកបានបញ្ជាក់ឡើងវិញអំពីតម្រូវការសម្រាប់យន្តការត្រួតពិនិត្យដើម្បីពង្រឹងការស្ដារឡើងវិញឱ្យបានពេញលេញនៃអធិបតេយ្យភាពរបស់ប្រទេសលីបង់។

លោកបាននិយាយថា លោកក៏បានពិភាក្សាអំពីស្ថិរភាព និងអធិបតេយ្យភាពរបស់ប្រទេសស៊ីរីជាមួយលោក  ណេតាន់យ៉ាហ៊ូ(Netanyahu) ផងដែរ។ លោកបានបន្ថែមថា «មជ្ឈិមបូព៌ាត្រូវការស្ថិរភាព។មានតែសន្តិភាពដ៏ត្រឹមត្រូវ និងយូរអង្វែងប៉ុណ្ណោះដែលអាចធានាអនាគតសម្រាប់ទាំងអស់គ្នាបាន»៕

ដោយ៖ យា ចិន្ដាខន្ដី (ប្រភព៖ AA-AKP)