AKP ភ្នំពេញ ថ្ងៃទី៣១ ខែមីនា ឆ្នាំ២០២៥--ក្រសួងព័ត៌មាន នឹងបើកយុទ្ធនាការប្រឆាំងព័ត៌មានក្លែងក្លាយនៅថ្ងៃទី០១ ខែមេសា ឆ្នាំ២០២៥ ដោយ«និយាយថាទេចំពោះព័ត៌មានក្លែងក្លាយ»ក្នុងគោលបំណងដើម្បីកាត់បន្ថយព័ត៌មានក្លែងក្លាយមកនូវកម្រិតអប្បរមាឱ្យតិចបំផុត នឹងឈានទៅលុបបំបាត់នូវព័ត៌មានក្លែងក្លាយពីលំហក្នុងសង្គមកម្ពុជា សំដៅធានាឱ្យបាននូវសន្តិសុខព័ត៌មាន ដែលជាបេសកកម្មចម្បងមួយរបស់ក្រសួងព័ត៌មានក្នុងនាមជាសេនាធិការរបស់រាជរដ្ឋាភិបាល។

ថ្លែងក្នុងសន្និសីទព័ត៌មាននារសៀលថ្ងៃទី៣១ ខែមីនា ឆ្នាំ ២០២៥ នៅទីស្ដីការក្រសួងព័ត៌មាន ឯកឧត្តម នេត្រ ភក្រ្តា រដ្ឋមន្រ្តីក្រសួងព័ត៌មានបានថ្លែងថា ការបើកយុទ្ធនាការរប្រឆាំងព័ត៌មានក្លែងក្លាយនេះ គឺសំដៅទាក់ទិនទៅនឹងការផ្សព្វផ្សាយព័ត៌មានក្លែងក្លាយនៅលើបណ្តាញទំនាក់ទំនងសង្គម និងប្រព័ន្ធផ្សព្វផ្សាយមួយចំនួនក៏ដូចជាវិធានការដែលដាក់ចុះដើម្បីគ្រប់គ្រងទៅលើការប្រយុទ្ធប្រឆាំងព័ត៌មានក្លែងក្លាយ។ ឯកឧត្តមរដ្ឋមន្រ្តីបានថ្លែងបញ្ជាក់ថា ការរៀបចំបើកយុទ្ធនាការប្រឆាំងព័ត៌មានក្លែងក្លាយក្នុងស្ថានភាពបច្ចុប្បន្ននេះជាមួយបច្ចេកវិទ្យាព័ត៌មានមានការរីកចម្រើនខ្លាំង ហើយបណ្តាញព័ត៌មានបានផ្លាស់ប្តូរពីប្រព័ន្ធផ្សព្វផ្សាយបុរាណមកជាប្រព័ន្ធផ្សព្វផ្សាយទំនើប ដែលបណ្តាញទំនាក់ទំនងដែលពេញនិយមនៅកម្ពុជានេះគឺបណ្តាញហ្វេប៊ុក Instagram TikTok Messenger ជាដើម។ ទន្ទឹមនេះ នៅប្រទេសកម្ពុជាតាមទិន្នន័យនៃគណនីហ្វេសប៊ុក បានបង្កើតឡើងដែលប្រើប្រាស់យ៉ាងសកម្មនៅកម្ពុជាមានប្រមាណ១៣លានគណនី។ ចំណែក TikTok និង Messenger មានប្រហាក់ប្រហែលគ្នាគឺ ១០លានគណនី ដែលបណ្តាញសង្គមទាំង៣នេះកំពុងបានដើរតួនាទីយ៉ាងសំខាន់ជូនដល់ប្រជាពលរដ្ឋ។

ឯកឧត្ដមរដ្ឋមន្រ្ដីបានលើកឡើងថា ក្នុងការប្រើប្រាស់បណ្តាញសង្គមទាំងនេះយើងមើលឃើញពីបញ្ហា វិជ្ជមាន និងព្រមជាមួយគ្នាយើងក៏មើលឃើញបញ្ហាអវិជ្ជមានផងដែរ ពិសេសក្នុងបណ្តាញសង្គមក៏មានព័ត៌មានពិត និងព័ត៌មានក្លែងក្លាយនៅលាយឡំជាមួយគ្នាផងដែរ ដែលបង្កើតឱ្យមានការយល់ច្រឡំ ក៏ដូចជាបង្កឱ្យប៉ពាល់ដល់សណ្តាប់ធ្នាប់សាធារណៈ ប៉ះពាល់ដល់សង្គម ប៉ះពាល់ទៅដល់ វប្បធម៌ ប្រពៃណី ទំនៀមទម្លាប់ក៏ដូចជាជំនឿទុកចិត្តរបស់ប្រជាពលរដ្ឋចំពោះកាដឹកនាំរបស់រាជរដ្ឋាភិបាល។
ជាមួយគ្នានេះ ឯកឧត្តម នេត្រ ភក្ត្រា បានបញ្ជាក់ទៀតថា ក្នុងឆ្នាំ២០២៣កន្លងមកនេះគេបានរកឃើញថាមានព័ត៌មានក្លែងក្លាយចំនួន៣២០៨ ហើយក្នុងឆ្នាំ ២០២៤កន្លងមកគឺមានព័ត៌មានក្លែងក្លាយសរុបចំនួន៣៦៥១ ត្រូវបានកត់សម្គាល់ ហើយបើគិតគឺមានកំណើនប្រមាណ១៤ភាគរយ នៃព័ត៌មានក្លែងក្លាយ។ ក្នុងចំណោមព័ត៌មានក្លែងក្លាយនេះបានកត់សម្គាល់តែទៅលើព័ត៌មានសំខាន់ៗដូចជា សន្តិសុខជាតិ សណ្តាប់ធ្នាក់សាធារណៈ ការដឹកនាំរបស់រាជរដ្ឋាភិបាល និងក្រសួងស្ថាប័នពាក់ព័ន្ធក៏ដូចជាវិស័យសំខាន់ៗក្នុងសង្គម រួមព័ត៌មានក្លែងក្លាយមួយចំនួនពាក់ព័ន្ធទៅនឹងថ្នាក់ដឹកនាំ ដែលយល់ថាជាការនាំឱ្យមានការយល់ច្រឡំបង្កើតជាចលាចលសង្គម ឬក៏បះពាល់ដល់សន្តិសុខសណ្តាប់ធ្នាប់។

បើតាមឯកឧត្តមរដ្ឋមន្រ្តីក្រសួងព័ត៌មាន ចំពោះព័ត៌មានក្លែងក្លាយទាំងនេះភាគច្រើនគឺត្រូវបានបង្កើតឡើងដោយជនអគតិមួយចំនួននៅបរទេសដើម្បីធ្វើក្នុងចរិកញុះញង់ បំភ្លៃបំភ្លើស បំភាន់ ដើម្បីធ្វើយ៉ាងណាបញ្ឆេះកំហឹងប្រជាពលរដ្ឋ បង្កើតឱ្យមានការស្អប់ខ្ពស់ជាតិសាសន៍ ក៏ដូចជារើសអើង  ហើយទម្លាក់ទំនុកចិត្តចំពោះប្រជាជនដល់រាជរដ្ឋាភិបាល ក្នុងការធ្វើឱ្យមានការធ្វើបដិវត្តន៍ពណ៌ដើម្បីផ្តួលរំលំរាជរដ្ឋាភិបាលដូចដែលក្រុមប្រឆាំងធ្វើការផ្តួលរំលំថ្នាក់ដឹកនាំក្រៅប្រទេស នៅតាមបណ្តាប្រទេសផ្សេងៗនៅលើពិភព លោក។ ឯកឧត្ដមរដ្ឋមន្រ្តីបានគូសបញ្ជាក់បន្ថែមថា៖ «បើគេគិតពីការបែងចែកព័ត៌មានក្លែងក្លាយគឺមានចំនួន៣ធំៗព័ត៌មានក្លែងបន្លំ ទី២គឺព័ត៌មានបំភ្លៃ និងទី៣គឺព័ត៌មានភាន់ច្រឡំ ។សម្រាប់ព័ត៌មាន២គឺ ទី១ គឺក្លែងបន្លំ ទី២ ព័ត៌មានបំភ្លៃ ដែលអ្នកបង្កើតឡើងមានចេតនាមួយគឺចេតនាអាក្រក់»។

ក្នុងឱកាសនោះដែរ ឯកឧត្តមរដ្ឋមន្រ្តី នេត្រ ភក្រ្ដា បានថ្លែងបញ្ជាក់បន្ថែមផងដែរថាចំនួនព័ត៌មានក្លែងក្លាយកាន់តែច្រើនឡើង ហើយសម្រាប់ឆ្នាំ២០២៥នេះចរន្តនៃព័ត៌មានក្លែងកាន់តែអាក្រក់ ពិសពុល និងមានចេតនាទុច្ចរិតខ្លាំងឡើង។ ហេតុនេះហើយទើបក្រសួងព័ត៌មានបានរៀបចំយុទ្ធនាការ”និយាយថាទេចំពោះព័ត៌មានក្លែងក្លាយ” ឡើងក្នុងគោលបំណងដើម្បីកាត់បន្ថយព័ត៌មានក្លែងក្លាយមកនូវកម្រិតអប្បរមាឱ្យតិចបំផុត ហើយនឹងឈានទៅលុបបំបាត់នូវព័ត៌មានក្លែងក្លាយពីលំហក្នុងសង្គមកម្ពុជា សំដៅធានាឱ្យបាននូវសន្តិសុខព័ត៌មាន ដែលជាបេសកកម្មចម្បងមួយរបស់ក្រសួងព័ត៌មានក្នុងនាមជាសេនាធិការរបស់រាជរដ្ឋាភិបាល៕

ដោយ៖ ដេប៉ូ រូបថត៖ សិរី ឧត្ដម