AKP ភ្នំពេញ ថ្ងៃទី៣១ ខែមីនា ឆ្នាំ២០២៥--

ក្រសួងអប់រំ យុវជន និងកីឡា បានចេញនូវសេចក្តីថ្លែងការណ៍មួយ នាថ្ងៃចន្ទ ទី៣១ ខែមីនា ឆ្នាំ២០២៥ ដើម្បីឆ្លើយតប និងបំភ្លឺទៅនឹងការចាត់ចំណាត់ថ្នាក់អប់រំរបស់កម្ពុជា ថា នៅលេខរៀងទី១២០ ក្នុងចំណោមប្រទេសលើសកលលោកនៅក្នុងគេហទំព័រ World Population Review 2025 ក្រសួងអប់រំ យុវជន និងកីឡា ចាត់ទុកថា ការចាត់ចំណាត់ថ្នាក់នេះមិនត្រូវបានធ្វើឡើងតាមបែបវិទ្យាសាស្ត្រ និងអាចទទួលយកបាននៅឡើយនៅក្នុងការប្រៀបធៀប ឬការចាត់ចំណាត់ថ្នាក់នៃការអប់រំនេះ។

ក្រសួងអប់រំ យុវជន និងកីឡា បានលើកឡើងថា ទី១) ការចាត់ចំណាត់ថ្នាក់អប់រំរបស់ World Population Review បានធ្វើឡើងតាមរយៈការស្ទង់មតិមនុស្សរាប់ពាន់នាក់នៅ៧៨ប្រទេស បន្ទាប់មកដាក់ចំណាត់ថ្នាក់ប្រទេសទាំងនោះ ដោយផ្អែកលើការឆ្លើយតបនៃការស្ទង់មតិនេះ ដែលការស្ទង់មតិផ្នែកអប់រំនេះបានផ្តោតលើចំណុច៣ រួមមាន ប្រព័ន្ធអប់រំសាធារណៈដែលត្រូវបានអភិវឌ្ឍយ៉ាងល្អ ការចូលរៀននៅសកលវិទ្យាល័យនៅទីនោះ និងការអប់រំប្រកបដោយគុណភាពខ្ពស់។ វិធីសាស្ត្រនៃការចាត់ចំណាត់ថ្នាក់អប់រំផ្អែកលើការស្ទង់មតិ និងយល់ឃើញជាសាធារណៈបែបនេះ ក៏កំពុងត្រូវបានពិនិត្យ និងច្រានចោលដោយក្រុមជំនាញរបស់ប្រទេសមួយចំនួនផងដែរ។ ជាក់ស្តែងការវាយតម្លៃរបស់ World Population Review បានចាត់ចំណាត់ថ្នាក់អប់រំនៅប្រទេសទីម័រខាងកើតថាប្រសើរជាងប្រទេសម៉ាឡេស៊ី ខណៈពេលដែលប្រទេសទីម័រខាងកើតកំពុងប្រឈមនឹងបញ្ហាជាច្រើនក្នុងវិស័យនយោបាយ សន្តិសុខ និងសេដ្ឋកិច្ច។ ប្រទេសទីម័រខាងកើតនៅពុំទាន់បានចូលរួមអនុវត្តកម្មវិធីអន្តរជាតិស្តីពីរង្វាយតម្លៃលទ្ធផលសិក្សារបស់សិស្ស (PISA) នៅឡើយ ខណៈពេលដែលប្រទេសម៉ាឡេស៊ីឈានមុខទាំងផ្នែកបរិមាណ និងគុណភាពលើវិស័យអប់រំ ជាពិសេសលទ្ធផលនៅក្នុងរង្វាយតម្លៃអន្តរជាតិ PISA។ ដូចគ្នានេះដែរ ការចាត់ចំណាត់ថ្នាក់អប់រំរបស់ប្រទេសឡាវប្រសើរជាងប្រទេសថៃ ខណៈដែលប្រទេសឡាវមិនទាន់បានចូលរួមក្នុងរង្វាយតម្លៃអន្តរជាតិ PISA ហើយប្រទេសថៃបានចូលរួមពេញលេញ និងមានសាកលវិទ្យាល័យជាច្រើនដែលមានការទទួលស្គាល់ទាំងកម្រិតតំបន់ និងអន្តរជាតិ។ ប្រទេសឡាវ និងទីម័រខាងកើតមិនមានភាពល្អប្រសើរជាងប្រទេសកម្ពុជា និងប្រទេសថៃនៅឡើយទេទាំងការអប់រំចំណេះទូទៅ និងឧត្តមសិក្សា។ ទី២) ជាលក្ខណៈវិទ្យាសាស្ត្រ ការចាត់ចំណាត់ថ្នាក់អប់រំជាលក្ខណៈអន្តរជាតិ ត្រូវធ្វើឡើងដោយពិនិត្យលើកត្តាជាច្រើនដូចជាអត្រាអក្ខរកម្ម និងលទ្ធផលសិក្សា។ កម្ពុជាមានអត្រាអក្ខរកម្ម ៨៤ភាគរយនៅឆ្នាំ២០២២។ សមត្ថភាពរបស់សិស្សក្នុងការទទួលបានជំនាញជាមូលដ្ឋានដូចជា ការអាន ការសរសេរ និងលេខនព្វន្តបានកើនឡើងនៅគ្រប់កម្រិត។

សេចក្តីថ្លែងការណ៍បានគូសបញ្ជាក់ថា ការវិនិយោគរបស់រាជរដ្ឋាភិបាលកម្ពុជាក្នុងវិស័យអប់រំបើធៀបនឹងផលិតផលក្នុងស្រុកសរុប (ផ.ស.ស) រយៈពេល ១០ឆ្នាំចុងក្រោយជាមធ្យម ២.៦ភាគរយ ឬក្នុងរង្វង់ ១៧.២ភាគរយ ធៀបនឹងចំណាយចរន្តជាតិ។ ដោយឡែកក្នុងឆ្នាំ២០២៤ ថវិកាអប់រំកម្ពុជាធៀបនឹង ផ.ស.ស ស្មើនឹង ២.៦ភាគរយ ខ្ពស់ជាងឡាវ ១.២ភាគរយ និងមីយ៉ាន់ម៉ា ២ភាគរយ នេះបើយោងតាមប្រភពទិន្នន័យរបស់ធនាគារពិភពលោក។ ជាមួយគ្នានេះ រាជរដ្ឋាភិបាលបានដំឡើងបៀវត្សរ៍ជូនគ្រូបង្រៀនជិត៣ដង ក្នុងរយៈពេល១០ឆ្នាំចុងក្រោយ ដើម្បីលើកទឹកចិត្តគ្រូបង្រៀនឱ្យខិតខំបំពេញការងារកាន់តែមានប្រសិទ្ធភាព។ ជារួមក្នុងរយៈពេល១០ឆ្នាំចុងក្រោយនេះវិស័យអប់រំកម្ពុជាសម្រេចបានវឌ្ឍនភាពទាំងបរិមាណ និងគុណភាព។ តែទោះយ៉ាងណាក៏ដោយបញ្ហាប្រឈមនៅតែមានដែលទាមទារឱ្យ គ្រប់ភាគីពាក់ព័ន្ធធ្វើការរួមគ្នា ដើម្បីបន្តពង្រឹងប្រព័ន្ធអប់រំរបស់ប្រទេសកម្ពុជាបន្ថែមទៀត៕

ដោយ៖ ចាន់ សុភឿន (ប្រភព៖ ក្រសួងអប់រំ)