AKP កំពង់ចាម ថ្ងៃទី៣១ ខែមីនា ឆ្នាំ២០២៥-- 

រដ្ឋបាលខេត្តកំពង់ចាម បានបើកវគ្គបណ្តុះបណ្តាលអន្តរាគមន៍អភិវឌ្ឍន៍សមត្ថភាព សម្រាប់ក្រុមគោលដៅ ជាមន្ត្រីរាជការស៊ីវិលរបស់ខេត្ត ដោយពិធីនេះធ្វើឡើងនៅសាលាខេត្តកំពង់ចាម នាព្រឹកថ្ងៃទី៣១ ខែមីនា ឆ្នាំ២០២៥ ក្រោមអធិបតីភាព ឯកឧត្តម សូ មុនីរក្សា នាយកសាលាជាតិរដ្ឋបាលមូលដ្ឋានក្រសួងមហាផ្ទៃ និងឯកឧត្ដម អ៊ុន ចាន់ដា អភិបាលខេត្តកំពង់ចាម។

ឯកឧត្តម អ៊ុន ចាន់ដា បានលើកឡើងថា វគ្គបណ្តុះបណ្តាលអន្តរាគមន៍អភិវឌ្ឍន៍សមត្ថភាព សម្រាប់ក្រុមគោលដៅ ជាមន្ត្រីរាជការស៊ីវិល របស់រដ្ឋបាលខេត្តកំពង់ចាមប្រព្រឹត្តទៅរយៈពេល៥ថ្ងៃ គឺចាប់ពីថ្ងៃទី៣១ ខែមីនា ដល់ថ្ងៃទី០៤ ខែមេសា ឆ្នាំ២០២៥ ដោយសិក្សាលើប្រធានបទចំនួន ៤គឺ៖ ទី១. ការតាក់តែងអត្ថបទ ការរៀបចំសុន្ទរកថា បទអន្តរាគមន៍ និងជំនួយស្មារតី ទី២. ការរៀបចំរបាយការណ៍ ទី៣. ការងារពិធីការ និងទី៤. ការឆ្លុះបញ្ចាំងកិច្ចការសិក្ខាកាម ក្នុងគោលបំណងឱ្យមន្ត្រីចេះការងាររដ្ឋបាល អាចទទួលបាននូវមេរៀនល្អៗ និងបទពិសោធន៍ល្អៗ ជាពិសេសគឺការងាររដ្ឋបាលដើម្បីជាមូលដ្ឋាន នៃចំណេះដឹងសម្រាប់ការបន្តវេន។

ថ្លែងក្នុងឱកាសបើកវគ្គបណ្តុះបណ្តាល ឯកឧត្តម សូ មុនីរក្សា បានកោតសរសើរចំពោះការផ្ដួចផ្ដើមរបស់លោក អ៊ុន ចាន់ដា លើការបណ្តុះបណ្តាលនូវចំណេះដឹង សមត្ថភាពដល់មន្ត្រីរាជការស៊ីវិលរបស់ខេត្តដើម្បីមានសមត្ថភាពក្នុងការបំពេញការងារក្នុងវិជីរបស់ខ្លួនដើម្បីក្លាយជាដឹកនាំបន្តវេន នាពេលអនាគត មានកាន់តែច្រើន  ពោលគឺយើងជាអនកដឹកនាំ ជាមន្ត្រី ត្រូវគោរពពេលវេលាធ្វើការ ត្រូវបង្កើនសមត្ថភាពផ្ទាល់ខ្លួន និងត្រូវពង្រឹងប្រសិទ្ធភាពការងារប្រកបដោយភាពទទួលខុសត្រូវខ្ពស់។ដូច្នេះនេះជាជំហានដំបូងដែលសិក្ខាកាមទាំងអស់ត្រូវព្យាយាមស្វែងយល់ទាំងអស់គ្នា ដើម្បីយកចំណេះដឹងនេះទៅសម្រេចការងាររបស់ខ្លួនឲ្យទទួលបានលទ្ធផលល្អក្នុងអង្គភាពរបស់ខ្លួន៕

ដោយ ឆាយ ម៉ុត