AKP ខេត្តសៀមរាប ថ្ងៃទី៣១ ខែមីនា ឆ្នាំ២០២៥ -- ក្រុមអ្នកជំនាញផ្នែកកសិកម្ម មកពីអង្គការដៃគូ និងមន្ទីរអង្គភាពជំនាញនានាក្នុងខេត្តសៀមរាប ខេត្តឧត្តរមានជ័យ និងខេត្តបន្ទាយមានជ័យ នៅថ្ងៃទី៣១ ខែមីនា ឆ្នាំ២០២៥នេះបានមកជុំគ្នានៅខេត្តសៀមរាប ដើម្បីចាប់ផ្តើមបើកអនុវត្តគម្រោង “ភាពជាដៃគូលើកកម្ពស់កសិកម្មឆ្លាតវៃនៅកម្ពុជា” ដើម្បីជាការឆ្លើយតបទៅ នឹងបញ្ហាប្រឈមនានាដែល បណ្តាលមកពីការប្រែប្រួលអាកាសធាតុ។

លោក យុន លីនណេ អភិបាលរងខេត្តសៀមរាប បានលើកថា បម្រែបម្រួលអាកាសធាតុបានគំរាមកំហែងដល់ការផលិតស្បៀងអាហារជាសកល និងប៉ះពាល់ដល់ជីវភាពរស់នៅរបស់កសិករក្រីក្រ និងអ្នកប្រើប្រាស់នាប៉ុន្មានឆ្នាំចុងក្រោយនេះ។

លោកថា បញ្ហាប្រឈម នឹងការប្រែប្រួលអាកាសធាតុខ្លាំងដូចជា ការកើនឡើងកំដៅឬសីតុណ្ហភាពខ្ពស់ ការប្រែប្រួលរបបទឹកភ្លៀង ខ្យល់កន្រ្តាក់ គ្រោះរាំងស្ងួត និងទឹកជំនន់ កំពុងប៉ះពាល់ដល់ទិន្នផលដំណាំ តម្លៃម្ហូបអាហារ និងសន្តិសុខស្បៀង។ 

លោកបន្តថា ការបើកឱ្យដំណើរការគម្រោង”ភាពជាដៃគូលើកកម្ពស់កសិកម្មឆ្លាតវៃនៅកម្ពុជា”នាថ្ងៃនេះ គឺជាកិច្ចការដ៏ចំាបាច់ និងមានសារៈសំខាន់បំផុតដែលយើង នឹងបានដឹងសមិទ្ធិផលគម្រោងដែលអង្គការអាដដា(ADDA) និងដៃគូបានអនុវត្តកន្លងមក និងចែករំលែកនូវយុទ្ធសាស្ត្រ របស់គម្រោងថ្មីក្នុងការអនុវត្តបច្ចេកទេសកសិកម្មឆ្លាតវៃ ដែលមានភាពធន់ទៅនឹងបម្រែបម្រួលអាកាសធាតុ ហើយលើសពីនេះទៅទៀត ការគាំទ្រលើការចងក្រងក្រុមផលិតដើម្បីផ្សាភ្ជាប់កសិផលទៅកាន់ទីផ្សារ ជាការងារដ៏សំខាន់ដែលយើងកំពុងយកចិត្តទុកដាក់ធ្វើយ៉ាងណាកសិផលដែលផលិតបាន លក់ក្នុងតម្លៃសមស្រប នឹងថ្លៃដើមផលិត  ព្រមទាំងធានាបាននូវបរិមាណ និងគុណភាពផលិតផលអាចប្រកួតនៅលើទីផ្សារបាន។ ជាមួយគ្នានេះគម្រោងថ្មីនេះ អាចដំណើរការទៅបានទាមទារការចូលរួមសហការ ការគាំទ្រពីគ្រប់ភាគីពាក់ព័ន្ធទាំងអស់ទាំងស្ថាប័នរដ្ឋ វិស័យឯកជន ដៃគូអភិវឌ្ឍន៍ និងជាពិសេសកសិករ សហគមន៍កសិកម្ម ដែលជាអ្នកផលិតផ្ទាល់ ។

 លោក ឡុក សុខធា នាយកអង្គការរីដាកម្ពុជា បានថ្លែងថា គម្រោងនេះទទួលបានការគាំទ្រថវិកាពី ប្រទេសដាណឺម៉ាករយ:ពេល៣ឆ្នាំបន្តទៀត ដែលគាំទ្រសកម្មភាពអភិវឌ្ឍន៍សហគមន៍ជនបទក្នុងតំបន់គោលដៅចាស់ នៅក្នុងខេត្តសៀមរាប និងខេត្តឧត្តរមានជ័យ ថែមទាំងបានពង្រីកគោលដៅថ្មីបន្ថែមទៅខេត្តបន្ទាយមានជ័យ។  គម្រោងបានរួមគ្នាជាដៃគូ ក្នុងការពង្រឹង សមត្ថភាពបច្ចេកទេស និងសេដ្ឋកិច្ចដល់សហគមន៍ជនបទ តាមរយៈការផ្តល់វគ្គបណ្តុះបណ្តាលបច្ចេកទេសកសិកម្មឆ្លាតវៃដែលធន់ទ្រាំទៅនឹងការប្រែប្រួលអាកាសធាតុលើដំណាំស្រូវ ដំឡូងមី និង ដំណាំបន្លែចំនួន១៦០សាលាបង្ហាញ។  គម្រោងនឹងសម្របសម្រួលពង្រឹង និងចងក្រងក្រុមផលិតចំនួន៦០ក្រុម ដើម្បីភ្ជាប់កសិផលទៅកាន់ទីផ្សារតាមកិច្ចសន្យា សំដៅបង្កើនផលិតភាពកសិកម្ម និងប្រាក់ចំណេញដល់សហភាពសហគមន៍កសិកម្មថ្នាក់ខេត្តចំនួន២សហភាព  មានសហគមន៍កសិកម្មជាសមាជិកយ៉ាងតិចចំនួន៦០សហគមន៍ និងមានអ្នកទទួលផលដោយផ្ទាល់ពីគម្រោង ដែលជាសមាជិកសហគមន៍ ក្រុមជួយខ្លួនឯង  និង ក្រុមផលិត  សរុបប្រមាណចំនួន១៣,៨០០គ្រួសារក្នុងខេត្តគោលដៅទាំងបី។ លោកក៏បានថ្លែងអំរណគុណចំពោះប្រជាជនប្រទេសដាណឺម៉ាក ដែលបានជួយគាំទ្រដល់គម្រោងនេះ ដើម្បីរួមចំណែកការកាត់បន្ថយផលប៉ះពាល់ និងភាពធន់ទៅ   នឹងការប្រែប្រួលអាកាសធាតុលើផលិតកម្មស្បៀងអាហារ និងតម្រូវការបរិភោគ៕

ដោយ៖  ឃុត សៅ