AKP កណ្ដាល ថ្ងៃទី៣១ ខែមីនា ឆ្នាំ២០២៥ -- លោក តាំង ម៉េងលាន អភិបាលរងខេត្តកណ្តាល និងជាប្រធានអនុគណៈកម្មការរៀបចំសោភណភាព និងអភិវឌ្ឍន៍ នៃគណៈកម្មការ រៀបចំសង្ក្រាន្តអបអរពិធីបុណ្យចូលឆ្នាំថ្មី ព្រមទាំងមន្ទីរពាក់ព័ន្ធ នៅថ្ងៃទី៣១ ខែមីនា ឆ្នាំ២០២៥ បានរៀបចំកិច្ចប្រជុំត្រួតពិនិត្យវឌ្ឍនភាពការងារ និងបានចុះពិនិត្យការរៀបចំក្លោងទ្វារ និងការតុបតែងផ្សេងៗ សម្រាប់ពិធីសង្ក្រាន្តខេត្តកណ្ដាល ដើម្បីចូលរួមអបអរសាទរពិធីបុណ្យចូលឆ្នាំប្រពៃណីជាតិខ្មែរ ដែលរដ្ឋបាលខេត្តកណ្តាល គ្រោងនឹងរៀបចំព្រឹត្តិការណ៍សង្ក្រាន្តខេត្តកណ្តាល នៅសួនច្បារមាត់ទន្លេបាសាក់ ក្រុងតាខ្មៅ មានរយៈពេល៣ថ្ងៃ គឺចាប់ពីថ្ងៃទី១៤-១៥-១៦ ខែមេសា ឆ្នាំ២០២៥ ខាងមុខ។

លោក តាំង ម៉េងលាន បានជំរុញដល់ក្រុមការងារគ្រប់ផ្នែក ត្រូវពន្លឿនការរៀបចំតុបតែងភ្លើងលម្អ រុំ និងចងអំពូលតាមដើមឈើ នៅទីតាំងប្រារព្ធពិធីផ្សេងៗ និងនៅសាលាខេត្ត ឱ្យមានសុភ័ណភាពស្រស់កុំព្រម ក្រុមការងារក៏ត្រូវគិតគូរយកចិត្តទុកដាក់ក្នុងការរៀបចំផ្គត់ផ្គង់អគ្គិសនី ម៉ាស៊ីនភ្លើង កង្ហារក្នុងកម្មវិធីនានាផងដែរ។ លោក អភិបាលរងខេត្ត ក៏បានក្រើនរំលឹក ដល់ក្រុមការងារត្រូវត្រៀមជួយសម្របសម្រួលបណ្តាញអគ្គិសនី តភ្ជាប់នៅតាមទីតាំងតុបតែង និងទីតាំងកម្សាន្តក្នុងពិធីសង្ក្រាន្ត ដោយឡែកសម្រាប់ រដ្ឋបាលក្រុង-ស្រុកក៏ត្រូវតែយកចិត្តទុកដាក់ក្នុងការរៀបចំធ្វើក្លោងទ្វារកាត់ទទឹងផ្លូវ និងដាក់ផ្លាកប៉ាណូទទួលស្វាគមន៍ពិធីបុណ្យចូលឆ្នាំថ្មី នៅតាមក្រុង-ស្រុករៀងៗខ្លួន។

ជាមួយគ្នាផងដែរអាជ្ញាធរខេត្តក៏សូមសំណូមពរទៅដល់បងប្អូនប្រជាពលរដ្ឋទាំងអស់នៅចូលឆ្នាំប្រពៃណីជាតិខ្មែរខាងមុខនេះ សូមចូលរួមតុបតែងលម្អនៅតាមលំនៅដ្ឋាន និងនៅតាមដងផ្លូវមុខផ្ទះរបស់ខ្លួនឱ្យបានស្អាត កុំចោលសំរាមពាសវាសកាលត្រូវទុកដាក់សំរាមឱ្យបានត្រឹមត្រូវ មានអនាម័យបរិស្ថានល្អ ដើម្បីទទួលបាននូវសេរីសួស្ដីឆ្នាំថ្មីទាំងអស់គ្នា។ នៅពេលដែលដើរលេងកម្សាន្តសូមមេត្តាទុកដាក់សំរាមឱ្យបានត្រឹមត្រូវ និងថែរក្សាអនាម័យសណ្ដាប់ធ្នាប់សារធារណៈទាំងអស់គ្នា។ ជាពិសេសសូមចូលរួមគោរពច្បាប់ចរាចរណ៍ទាំងអស់គ្នា បើកបរដោយប្រុងប្រយ័ត្ន និងយោគយល់អធ្យាស្រ័យគ្នាទៅវិញទៅមកក្នុងនាមខ្មែរតែមួយ ពេលចតយានយន្តតាមផ្ទះ ឬតាមដងផ្លូវសូមចត់ឱ្យមានសណ្ដាប់ធ្នាប់ ចៀសវាងកុំបង្កការកកស្ទះចរាចរណ៍ដល់អ្នកដទៃ។

សូមបញ្ជាក់ថា បើគិតចាប់ពីថ្ងៃរៀបចំដំបូង មកទល់ពេលនេះ អាជ្ញាធរខេត្តកណ្ដាល កំពុងតែមមាញឹកក្នុងការរៀបចំនៅក្លោងទ្វារសង្ក្រាន្តឆ្នាំថ្មី ហើយក៏មានការតុបតែងគ្រឿងលម្អផ្សេងៗ មានដូចជា រូបថ្នាក់ដឹកនាំ រូបភាពបង្ហាញពីសមិទ្ធផលធំៗរបស់ខេត្ត ភ្លើងពណ៌ចម្រុះ ការតាំងឧបករណ៍នេសាទបុរាណខ្មែរជាដើមតាមដងផ្លូវ ដើម្បីឱ្យមានសោភ័ណ្ឌភាពស្រស់បំព្រង។ ក្នុងពិធីសង្ក្រាន្តខេត្តកណ្ដាលនៅក្រុងតាខ្មៅឆ្នាំនេះ រដ្ឋបាលខេត្តកណ្ដាល ក៏បានរៀបចំសង់ពិព័រណ៍ទំនិញជាច្រើនមុខ មានការប្រគំតន្ត្រីសម័យ ការលេងល្បែងប្រជាប្រិយ ការរាំលេងកម្សាន្ត ការបាញ់ទឹក បាញ់កាំជ្រួច និងកម្មវិធីសប្បាយៗជាច្រើនទៀត៕

ដោយ ណយ នឿន (ប្រភព៖ រដ្ឋបាលខេត្តកណ្តាល)