AKP ភ្នំពេញ ថ្ងៃទី៣១ ខែមីនា ឆ្នាំ២០២៥--ការប្រកួតកីឡាអុកចត្រង្គ ពានរង្វាន់អង្គរសង្ក្រាន្តបានបញ្ចប់ការប្រកួតដំណាក់កាលទី២ កាលពីថ្ងៃទី៣០ ខែមីនា ឆ្នាំ២០២៥ នៅទីស្នាក់ការ NOCC ដោយគណៈកម្មការបច្ចេកទេសបានរកឃើញបេក្ខភាពឆ្នើមៗ ៨នាក់មកពីតំបន់ទាំង៧ និងបេក្ខភាព ២នាក់ជានិស្សិតមហាវិទ្យាល័យ សរុប ១០នាក់ នឹងត្រូវចូលរួមប្រកួតជុំផ្តាច់ព្រ័ត្រ ក្នុងព្រឹត្តិការណ៍អង្គរសង្រ្កាន្ត ក្រោមប្រធានបទ «ញញឹមសាទរសង្រ្កាន្តឆ្នាំថ្មី» នាថ្ងៃទី១៤-១៦ ខែមេសា ឆ្នាំ២០២៥ នៅខេត្តសៀមរាប។

បេក្ខភាពឆ្នើមៗទាំង ១០នាក់ រួមមាន៖ កីឡាករ យ៉ាន សុខលាង មកពីរាជធានីភ្នំពេញ, កីឡាករ សុខ លីមហេង មកពីរាជធានីភ្នំពេញ កីឡាករ ម៉េង សេរីសម្បត្តិ មកពីរាជធានីភ្នំពេញ កីឡាករ លឹម ផល្លា មកពីខេត្តប៉ៃលិនកីឡាករ ហេង សៅឌី មកពីខេត្តកណ្តាល កីឡាករ ហាក់ ឡាំបៀរ មកពីខេត្តកំពង់ចាម កីឡាករ ឈាវ បូរ៉ា មកពីខេត្តកំពង់ចាម និងកីឡាករ ជា ស៊ីដេត មកពីខេត្តបាត់ដំបង។ ចំពោះបេក្ខភាពឆ្នើមៗ២នាក់ ផ្នែកនិស្សិតមហាវិទ្យាល័យ រួមមាន៖កីឡាករឃឹម ឃឹម និងកីឡាករ ស្រី រតនា។

ចំពោះបេក្ខភាពផ្នែកកកុមារ ត្រៀមប្រកួតជុំផ្តាច់ព្រ័ត្រ នៅក្នុងព្រឹត្តិការណ៍អង្គរសង្ក្រាន្តនេះដែរ រួមមាន៖ ចំណាត់ថ្នាក់ក្រោយការប្រកួត ក្រុម ក ៖ លេខ១ កីឡាករ យ៉ាន តាយអ៊ី មកពីវិទ្យាល័យកំបូល រាជធានីភ្នំពេញ ក្លឹបសេះចម្បាំង លេខ២ កីឡាករ ជឹង ផេងឡេង មកពីសាលាគោកបីជាន់ រាជធានីភ្នំពេញ ខណៈក្រុម ខ ៖ លេខ ១  កីឡាករ សេង វុត្រា មកពីសាលាចំណេះទូទៅបេសអេដ រាជធានីភ្នំពេញ និងលេខ ២ កីឡាករ ឈាវ បូរិន្ទ មកសាលាអាមេរិចកាំងហ្គោលឌិនហ្គេត រាជធានីភ្នំពេញ។

ការប្រកួតជុំផ្តាច់ព្រ័ត្រនឹងត្រូវធ្វើឡើង ពីថ្ងៃទី១៤-១៦ ឆ្នាំ២០២៥ ក្នុងព្រឹត្តិការណ៍អង្គរសង្ក្រាន្ត នៅខេត្តសៀមរាប ដោយបេក្ខភាពឆ្នើមៗទាំង១០នាក់នេះត្រូវបែងចែកជាពីរពូល ហើយត្រូវប្រកួតជម្រុះក្នុងពូល និងខ្វែងពូល រហូតដល់ស្វែងរកបេក្ខភាពជ័យលាភីជើងឯក ដែលនឹងក្លាយជា «ស្តេចអុក» ប្រចាំឆ្នាំ២០២៥ផងដែរ។

គួររម្លឹកថា បើតាមការគូសបញ្ជាក់របស់ឯកឧត្តម ហេង សុខគង់ រដ្ឋលេខាធិការ ក្រសួងឧស្សាហកម្ម វិទ្យាសាស្ត្រ និងនវានុវត្តន៍ និងជាប្រធានក្រុមការងាររៀបចំការប្រកួតអុកចត្រង្គព្រឹត្តិការណ៍អង្គរសង្ក្រាន្ត ឆ្នាំ២០២៥បានឱ្យដឹងថា ការប្រកួតកីឡាអុកចត្រង្គ ពានរង្វាន់អង្គរសង្ក្រាន្តនេះត្រូវបានរៀបចំឡើងក្រោម ក្រោមអនុសាសន៍ដ៏ខ្ពង់ខ្ពស់របស់លោក ហ៊ុន ម៉ានី ឧបនាយករដ្ឋមន្ត្រី រដ្ឋមន្ត្រីក្រសួងមុខងារសាធារណៈ និងជាប្រធានសហភាពសហព័ន្ធយុវជនកម្ពុជា (សសយក) និងជាប្រធានក្រុមការងាររៀបចំព្រឹត្តិការណ៍អង្គរសង្រ្កាន្តផងនោះបានជំរុញ និងលើកទឹកចិត្តឱ្យមានការចូលរួមប្រកួតកីឡាអុកចត្រង្គរបស់កុមារា កុមារី និងនិស្សិតនានា ព្រមទាំងផ្នែកមហាជន។ ការប្រកួតនេះបានកិច្ចសហការជាមួយសហព័ន្ធកីឡាអុកចត្រង្គកម្ពុជា ក្រោមការគាំទ្រពីក្រសួងអប់រំ យុវជន និងកីឡា និងគណៈកម្មាធិការជាតិអូឡាំពិកកម្ពុជា (NOCC) ក្នុងន័យជួយលើកកម្ពស់ដល់វិស័យកីឡាអុកចត្រង្គ តាមរយៈការអភិរក្ស និងអភិវឌ្ឍប្រភេទកីឡាអត្តសញ្ញាញជាតិរបស់ខ្មែរមួយនេះឱ្យកាន់តែរីកចម្រើនបន្ថែមទៀត៕

ដោយ ហេង ណាលីន