AKP បន្ទាយមានជ័យ ថ្ងៃទី៣០ ខែមីនា ឆ្នាំ២០២៥ -- អាងទឹកត្រពាំងថ្មស្ថិតនៅភូមិត្រពាំងថ្មជើង ឃុំប៉ោយចារ ស្រុកភ្នំស្រុកចំងាយប្រមាណ៥៦គីឡូម៉ែត្រពីទីរួមខេត្ត បន្ទាយមានជ័យ ដែលជាប្រភពទឹកដ៏សំខាន់មួយក្នុងខេត្តបន្ទាយមានជ័យ កំពុងបង្ហាញសក្តានុពលដ៏ធំធេងមិនត្រឹមតែលើវិស័យកសិកម្មប៉ុណ្ណោះទេ ថែមទាំងវិស័យទេសចរណ៍ផងដែរ។ ទីតាំងដ៏ស្រស់ត្រកាលនេះ បានក្លាយជាចំណុចចាប់អារម្មណ៍សម្រាប់អ្នកស្រុក ក៏ដូចជាអ្នកមកពីតំបន់ផ្សេងៗ ដោយសារតែអត្ថប្រយោជន៍ចម្រុះរបស់វា។

ប្រភពទឹកដ៏សំខាន់សម្រាប់វិស័យកសិកម្មអាងទឹកត្រពាំងថ្ម គឺជាសរសៃឈាមដ៏សំខាន់មួយសម្រាប់ទ្រទ្រង់វិស័យកសិកម្មនៅក្នុងឃុំប៉ោយចារ និងតំបន់ជុំវិញ។ ទឹកពីអាងនេះត្រូវបានប្រើប្រាស់សម្រាប់ស្រោចស្រពដំណាំកសិកម្មគ្រប់ប្រភេទ ជាពិសេសស្រូវវស្សា និងស្រូវប្រាំង ដែលជាដំណាំសេដ្ឋកិច្ចចម្បងរបស់ប្រជាកសិករក្នុងតំបន់។

លោកយឹមប៊ុនរ៉ុមប្រធានមន្ទីរធនធានទឹកនិងឧតុនិយមខេត្តបន្ទាយមានជ័យបានឱ្យដឹងថា ក្រោមការយកចិត្តទុកដាក់របស់រាជរដ្ឋាភិបាលកម្ពុជាបានធ្វើការអភិវឌ្ឍស្តារជួសជុលឡើងវិញជាបន្តបន្ទាប់នោះបច្ចុប្បន្នអាងត្រពាំងថ្មអាចរក្សាទឹកបានប្រមាណ ១៨០ លានម៉ែត្រគូបនៅរដូវវស្សានៅរដូវប្រាំងអាងទឹកនេះអាចរក្សាទឹកបាន ១២០ លានម៉ែត្រគូប ដែលមានលទ្ធភាពស្រោចស្រពលើផ្ទៃដីស្រូវវស្សាទំហំ ២៥ ០០០ហិកតា និងស្រែប្រាំងទំហំ ១២ ០០០ហិកតា ។

លោកតា ឈឿន ជាកសិកររស់នៅក្នុងភូមិត្រពាំងថ្មជើង បានរៀបរាប់ថា "មុនពេលមានអាងទឹកនេះ ការធ្វើស្រែចម្ការរបស់ពួកយើងពឹងផ្អែកទាំងស្រុងលើទឹកភ្លៀង ដែលធ្វើឱ្យទិន្នផលមិនទៀងទាត់។ ប៉ុន្តែចាប់តាំងពីមានអាងទឹកត្រពាំងថ្មមក ពួកយើងអាចធ្វើស្រែបានពីរដងឬច្រើនដងក្នុងមួយឆ្នាំ ហើយទិន្នផលក៏កើនឡើងគួរឱ្យកត់សម្គាល់ធ្វើឱ្យ ជីវភាពគ្រួសារក៏កាន់តែប្រសើរឡើង"។
  មិនត្រឹមតែប៉ុណ្ណោះ អាងទឹកនេះក៏បានរួមចំណែកក្នុងការធ្វើឱ្យដីស្រែចម្ការកាន់តែមានជីជាតិ ដោយសារតែការផ្គត់ផ្គង់ទឹកបានគ្រប់គ្រាន់ និងទៀងទាត់។ លើសពីនេះ អាងទឹកត្រពាំងថ្មក៏ជាប្រភពសម្រាប់ចិញ្ចឹមត្រី ដែលជាប្រភពចំណូលមួយទៀតសម្រាប់ប្រជាពលរដ្ឋ។

សក្តានុពលទេសចរណ៍ដែលកំពុងលេចរូបរាងក្រៅពីសារៈសំខាន់លើវិស័យកសិកម្ម អាងទឹកត្រពាំងថ្មក៏មានសក្តានុពលទេសចរណ៍ដ៏គួរឱ្យចាប់អារម្មណ៍ផងដែរ។ ទិដ្ឋភាពដ៏ស្រស់បំព្រងនៃផ្ទៃទឹកដ៏ធំល្វឹងល្វើយ ហ៊ុព័ទ្ធដោយវាលស្រែបៃតង និងទេសភាពជនបទដ៏ស្រស់ស្រាយ បានទាក់ទាញភ្ញៀវទេសចរណ៍ជាបណ្តើរៗឱ្យមកកម្សាន្តនៅទីនេះ។ បច្ចុប្បន្ននេះ មានភ្ញៀវទេសចរណ៍មួយចំនួនបានចាប់ផ្តើមមកទស្សនា និងថតរូបភាពនៅអាងទឹកត្រពាំងថ្ម ជាពិសេសនៅពេលថ្ងៃល្ងាច ដែលព្រះអាទិត្យអស្តង្គត បង្កើតបានជាទស្សនីយភាពដ៏អស្ចារ្យនិង សកម្មភាពកម្សាន្តមួយចំនួនដូចជា ហែលទឹក ជិះទូកកម្សាន្តលើផ្ទៃទឹកដ៏ខៀវស្រងាត់ ជិះទូកគយគន់ព្រៃព្រឹក្សា បក្សាបក្សី និងភ្លក់រស់ជាតិអាហារប្រចាំតំបន់ជាដើម។ ភាពស្ងប់ស្ងាត់ និងបរិយាកាសធម្មជាតិដ៏បរិសុទ្ធ គឺជាចំណុចទាក់ទាញដ៏សំខាន់សម្រាប់អ្នកដែលចង់គេចចេញពីភាពអ៊ូអរក្នុងទីក្រុង។

លោក សុខ ហេង មន្ត្រីផ្នែកទេសចរណ៍ស្រុកភ្នំស្រុក បានឱ្យដឹងថា "អាងទឹកត្រពាំងថ្មមានសក្តានុពលទេសចរណ៍ពិតប្រាកដ។ យើងកំពុងពិនិត្យមើលលទ្ធភាពក្នុងការអភិវឌ្ឍន៍ហេដ្ឋារចនាសម្ព័ន្ធទេសចរណ៍នៅជុំវិញអាងទឹកនេះ ដូចជាការសាងសង់ក្យូសសម្រាក កន្លែងអង្គុយលេង និងសេវាកម្មទេសចរណ៍ផ្សេងៗទៀត ដើម្បីទាក់ទាញភ្ញៀវទេសចរណ៍ឱ្យបានកាន់តែច្រើន"។ ទោះជាយ៉ាងណាក៏ដោយ ការអភិវឌ្ឍន៍វិស័យទេសចរណ៍នៅអាងទឹកត្រពាំងថ្ម ក៏ត្រូវគិតគូរដល់ការថែរក្សាបរិស្ថាន និងជីវចម្រុះនៅក្នុងតំបន់ផងដែរ ដើម្បីធានាបាននូវនិរន្តរភាពនៃការអភិវឌ្ឍន៍។ បើទោះបីជាមានសក្តានុពលដ៏ធំធេងក៏ដោយ អាងទឹកត្រពាំងថ្មក៏នៅតែមានបញ្ហាប្រឈមមួយចំនួនដែលត្រូវដោះស្រាយ ដូចជាការគ្រប់គ្រងធនធានទឹកឱ្យមានប្រសិទ្ធភាព ការថែរក្សាគុណភាពទឹក និងការការពារអាងទឹកពីការបំពុល។ លើសពីនេះ ការអភិវឌ្ឍន៍វិស័យទេសចរណ៍ក៏ត្រូវមានផែនការច្បាស់លាស់ ដើម្បីជៀសវាងផលប៉ះពាល់អវិជ្ជមានដល់បរិស្ថាន និងសង្គមក្នុងតំបន់។ ការចូលរួមរបស់ប្រជាពលរដ្ឋក្នុងមូលដ្ឋាន គឺជាកត្តាសំខាន់ក្នុងការធានាថាការអភិវឌ្ឍន៍នេះនឹងនាំមកនូវផលប្រយោជន៍ពិតប្រាកដដល់ពួកគេ។​ ទោះជាយ៉ាងណា ជាមួយនឹងការយកចិត្តទុកដាក់ និងការគ្រប់គ្រងបានល្អ អាងទឹកត្រពាំងថ្មពិតជាមានសក្តានុពលក្នុងការក្លាយជាតំបន់គំរូសម្រាប់ការអភិវឌ្ឍន៍សេដ្ឋកិច្ចចម្រុះ ដោយរួមបញ្ចូលគ្នារវាងវិស័យកសិកម្ម និងទេសចរណ៍ ដែលនឹងរួមចំណែកដល់ការលើកកម្ពស់ជីវភាពរស់នៅរបស់ប្រជាពលរដ្ឋក្នុងខេត្តបន្ទាយមានជ័យទាំងមូល។ ការបន្តគាំទ្រ និងវិនិយោគលើហេដ្ឋារចនាសម្ព័ន្ធ និងសេវាកម្មនានា នឹងជួយឱ្យសក្តានុពលទាំងនេះត្រូវបានពង្រីកឱ្យកាន់តែខ្លាំងឡើងនាពេលអនាគត៕

ដោយ៖ ឈុនសារ៉ាត