AKP កំពង់ធំ​ ថ្ងៃទី៣០ ខែមីនា ឆ្នាំ២០២៥ --ឧត្តមសេនីយ៍ទោ ហេង សុផលស្នងការនគរបាលខេត្តខេត្តកំពង់ធំនិងក្រុមការងារប្ដេជ្ញាការពាររក្សាសន្តិសុខសុវត្ថិភាពសណ្ដាប់ធ្នាប់ជូនសង្គមជាតិនិងប្រជាពលរដ្ឋក្នុងឱកាសបុណ្យចូលឆ្នាំថ្មីប្រពៃណីជាតិខ្មែរ។ក្នុងឱកាសអញ្ជើញចូលរួមកិច្ចប្រជុំដើម្បីធានាថែរក្សាសន្ដិសុខ សុវត្ថិភាព សណ្ដាប់ធ្នាប់ជូនសង្គមជាតិនិងប្រជាពលរដ្ឋក្នុងឱកាសបុណ្យចូលឆ្នាំថ្មីប្រពៃណីជាតិខ្មែរកាលពីកាលពីរសៀលថ្ងៃទី២៩ខែមីនាឆ្នាំ២០២៥។

ឧត្តមសេនីយ៍ទោ ហេង សុផលមានប្រសាសន៍សង្កត់ធ្ងន់លើការងារចាំបាច់មួយចំនួនរួមមាន÷១.ក្តាប់សភាពការមុខសញ្ញាសន្តិសុខ។២.ពង្រឹងការគ្រប់គ្រងមុខសញ្ញាព្រហ្មទ័ណ្ឌ។ ៣.ការងារគ្រប់គ្រងមុខសញ្ញាក្មេងទំនើងហើយដាក់ចេញនូវវិធានការសរុបសំដៅបង្ការទប់ស្កាត់បង្ក្រាបបទល្មើសគ្រប់ប្រភេទឱ្យបានទាន់ពេលវេលានិងមានប្រសិទ្ធភាពខ្ពស់។៤.ពង្រឹងការអនុវត្តច្បាប់ចរាចរណ៍ផ្លូវគោកបង្កើនការផ្សព្វផ្សាយតាមគោលដៅងាយរងគ្រោះដើម្បីថែរក្សាឱ្យបាននូវអាយុជីវិត ទ្រព្យសម្បត្តិមនុស្ស សត្វ។៥.ការងារគ្រោះអគ្គិភ័យ
ត្រូវបន្តការចុះផ្សព្វផ្សាយអប់រំបញ្ហាអគ្គិភ័យនិងចែកលេខទូរស័ព្ទទំនាក់ទំនងសម្រាប់កិច្ចអន្តរាគមន៍ដល់ប្រជាពលរដ្ឋ ។

ឧត្តមសេនីយ៍ទោហេង សុផលបានគូសបញ្ជាក់ទៀតថាដើម្បីបង្ករបរិយាកាសប្រកបដោយភាពសុខដុមរមនាដល់ប្រជាពលរដ្ឋ អង្គភាពបានបញ្ចុះកម្លាំងតាមគោលដៅទីប្រជុំជន វត្តអារាម រមណីយដ្ឋានទីកន្លែងកម្សាន្តសប្បាយ ដើម្បីជួយសម្រួលចរាចរណ៍បញ្ជៀសការកកស្ទះ របស់អ្នកធ្វើដំណើរ ដោយឥរិយាបថ សុភាពរៀបសារទន់ភ្លន់ រួសរាយរាក់ទាក់ក្នុងការប្រាស្រ័យទាក់ទងជាមួយមហាជន។

ឧត្តមសេនីយ៍ទោហេង សុផលបានណែនាំដល់លោកអធិការនគរបាលទាំង០៩ក្រុង-ស្រុក ដើម្បីចូលរួមចំណែកអបអរសាទរបុណ្យចូលឆ្នាំថ្មីប្រពៃណីជាតិនាពេលខាងមុខនេះ តាមអង្គភាពនីមួយៗ ត្រូវរៀបចំតុបតែងលម្អ គ្រឿងរណ្តាប់ផ្កាភ្ញីសែនព្រេនទទួលទេវតាឆ្នាំថ្មីតាមទំនៀមទម្លាប់របស់ប្រជាជនខ្មែរយើងតាំងពីបូរាណកាលមកព្រមទាំងបានប្រសិទ្ធិពរជ័យដល់កងកម្លាំងសូមប្រកបនូវពុទ្ធពរទាំងបួនប្រការគឺ អាយុ វណ្ណៈ សុខៈ ពលៈ កុំបីឃ្លៀងឃ្លាតឡើយ៕

ដោយ៖ ស៊ុម វណ្ណា ,ប្រភពស្នងការនគរបាលខេត្តកំពង់ធំ