AKP ភ្នំពេញ​ ថ្ងៃទី២៩ ខែមីនា ឆ្នាំ២០២៥ --  ឯកឧត្តមបណ្ឌិត លី ធុជ ទេសរដ្ឋមន្ត្រី និងជាប្រធានគណៈកម្មាធិការជាតិអេស្កាប់ បានទទួលជួបពិភាក្សាជាមួយគណៈប្រតិភូនៃក្រុមប្រឹក្សាលើកកម្ពស់ពាណិជ្ជកម្មអន្តរជាតិតំបន់ក្វាងស៊ី ដែលដឹកនាំដោយ លោក Liu Shuyi អនុ ប្រធានក្រុមប្រឹក្សា និងអមដំណើរដោយអ្នកវិនិយោគិននានាជាច្រើនរបស់តំបន់ក្វាងស៊ី ។ជំនួបនេះ បានប្រព្រឹត្ដទៅនារសៀលថ្ងៃទី២៨ ខែមីនា ឆ្នាំ២០២៥នៅទីស្តីការគណៈរដ្ឋមន្ត្រី ។

នាឱកាសនៃជំនួបពិភាក្សានេះ ឯកឧត្តមបណ្ឌិត លី ធុជ បានអរគុណចំពោះគណៈប្រតិភូនៃក្រុមប្រឹក្សាលើកកម្ពស់ពាណិជ្ជកម្មអន្តរជាតិតំបន់ក្វាងស៊ី រួមទាំងវិនិយោគិនផ្សេងទៀត ដែលបានធ្វើទស្សនកិច្ច និងមានចំណាប់អារម្មណ៍ពង្រីកការវិនិយោគមកកាន់កម្ពុជា។ កម្ពុជាមានលក្ខណៈសម្បត្តិគ្រប់គ្រាន់ និងមានហេដ្ឋរចនាសម្ព័ន្ធប្រកបដោយគុណភាព រួមទាំងផ្លូវថ្នល់ ផ្លូវដែក កំពង់ផែ ព្រលានយន្តហោះ ប្រព័ន្ធគមនាគមន៍ អគ្គីសនី បណ្តាញចែកចាយទឹកស្អាត និងកម្លាំងពលកម្មវ័យក្មេងនិងសកម្ម ព្រមទាំងមាន ច្បាប់វិនិយោគលើកទឹកចិត្តវិនិយោគិន ដែលផ្តល់អំណោយផលយ៉ាងខ្លាំង ដល់ការវិនិយោគលើកគ្រប់វិស័យនៅកម្ពុជា ជាពិសេស កម្ពុជា ក៏មានកិច្ចព្រមព្រៀងពាណិជ្ជកម្មសេរីជា មួយប្រទេសចិន ផងដែរ។

ឯកឧត្តមបណ្តិត លី ធុជ  បានលើកទឹកចិត្តដល់វិនិយោគិនទាំងអស់ ឱ្យពិចារណាសិក្សាពីលទ្ធភាពក្នុងការវិនិយោគបន្ថែមទៀតនៅកម្ពុជា ស្របតាមទស្សនវិស័យដឹកនាំរបស់ សម្តេចធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា ដេីម្បីជំរុញការវិនិយោគដោយផ្ទាល់នៅកម្ពុជា ជាពិសេសប្រទេសចិន ក្នុងការរួមចំណែកក្នុងការអនុវត្ត គំនិតផ្តួចផ្តើមខ្សែក្រវាត់និងផ្លូវ របស់រដ្ឋាភិបាលចិន និង “កិច្ចសហប្រតិបត្តិការត្បូងពេជ្រកម្ពុជា-ចិន”។  កម្ពុជា និងចិន គឺជាបងប្អូនល្អ និងមិត្តភក្តិពិតប្រាកដ ហេតុដូចច្នេះ កម្ពុជាស័ក្តិសមជាដៃគូវិនិយោគដ៏ល្អរបស់វិនិយោគិន របស់តំបន់ក្វាងស៊ី។

លោក Liu Shuyi បានអរគុណ ឯកឧត្តមបណ្ឌិត លី ធុជ និងបានលើកឡើងថា ទីផ្សារនៅកម្ពុជា មានសក្តានុពលខ្ពស់ និងមានគោលនយោបាយលើកទឹកចិត្តវិយោគល្អប្រសើរ ដែលអំណោយផលដល់ការវិនិយោគ និងបានសន្យា កៀរគរវិនិយោគគិននានា ពីតំបន់ក្វាងស៊ី មកវិនិ យោគនៅកម្ពុជាឱ្យកាន់តែច្រើនថែមទៀត ៕ 

ដោយ៖ សួស សំរិត