AKP កំពង់ស្ពឺ ថ្ងៃទី២៩ ខែមីនា ឆ្នាំ២០២៥--នាថ្ងៃទី២៨ខែមីនាឆ្នាំ២0២៥ព្រះវិហារថ្មី គំនូរ ព្រះពុទ្ធបដិមា ដងទង់ និងហេដ្ឋា រចនាសម្ព័ន្ធនានាក្នុងវត្តព្រះពុទ្ធតំណាក់លក្ខណារាម ស្ថិតនៅភូមិដំណាក់ពង្រ ឃុំព្រះវិហារ ស្រុកគងពិសី ខេត្តកំពង់ស្ពឺ ត្រូវបានសម្ពោធដាក់ឱ្យប្រើប្រាស់ជាផ្លូវការ ក្រោមវត្តមានឯកឧត្តមបណ្ឌិត ជាម ច័ន្ទសោភ័ណ អភិបាលនៃគណៈអភិបាលខេត្តកំពង់ស្ពឺ  តំណាងដ៏ខ្ពង់ខ្ពស់ឯកឧត្តម ហ៊ុនម៉ានី ឧបនាយករដ្ឋមន្ត្រី រដ្ឋមន្ត្រីក្រសួងមុខងារសាធារណៈ និងជាប្រធានក្រុមការងាររាជរដ្ឋាភិបាល ចុះជួយខេត្តកំពង់ស្ពឺ និងឯកឧត្តម យឹម សុខុម ប្រធានក្រុមប្រឹក្សាខេត្តរួមនិង ឯកឧត្តមអភិបាលរងខេត្ត លោកអភិបាលស្រុក ប្រធានមន្ទីរអង្គភាពជុំវិញខេត្ត ឧបាសក ឧបាសិកា សមាជិក សមាជិកាប្រមាណ៧៥០ នាក់។

ឯកឧត្តមបណ្ឌិត អភិបាលខេត្តបានថ្លែងថា គ្រប់ សាសនាទាំងអស់គីបានអប់រំមនុស្សឲ្យរស់នៅប្រកបដោយធ៏មនិងផ្តល់នូវ ពុទ្ធិបញ្ញាញាណ ដើម្បីបែងចែករវាងអំពើអាក្រក់និងអំពើល្អ ព្រមទាំងចៀសវាងការប្រើប្រាស់ចំណេះដឹងនិងជំនាញទៅក្នុងផ្លូវខុស ដែលអាចនាំមកនូវការបំផ្លិច ផ្លាញដល់បុគ្គលខ្លួនឯងនិងសង្គមជាតិ។ក្នុងន័យនេះ ការអប់រំដែលពេញលេញគឺត្រូវដើរទន្ទឹមគ្នានិងបំពេញឲ្យគ្នាទៅវិញទៅមក រវាងផ្នែកវិទ្យាសាស្ត្រនិងផ្នែកសាសនា ដើម្បីជួយអភិវឌ្ឍសង្គមមួយឲ្យមានការរីកចម្រើនលូតលាស់ប្រកបដោយគុណធ៏មនិងក្រមសីលធ៏មខ្ពស់។

ឯកឧត្តមបណ្ឌិតជាម ច័ន្ទសោភ័ណបានរម្លឹកថា ក្រោមម្លប់សុខសន្តិសុខ និងស្ថិរភាពនយោបាយរបស់ប្រទេសកម្ពុជាក្រោមការដឹកនាំដ៍ត្រឹមត្រូវ ឈ្លាសវៃនិងគតិបណ្ឌិតរបស់សម្តេចមហាបវរធិបតី ហ៊ុន ម៉ាណែត បានធ្វើឲ្យអ្នកវិនិយោគធំៗនៅបណ្តាប្រទេសមួយចំនួន មកបណ្តាក់ទុនរកស៊ីដោយទំនុកចិត្តនិងជឿជាក់លើគោលនយោបាយដឹកនាំរបស់រាជរដ្ឋាភិបាលកម្ពុជា។

ឯកឧត្តមបណ្ឌិតអភិបាលខេត្តបានបន្ថែមថា   គិតត្រឹមចុងខែមីនា ឆ្នាំ២០២៥នេះខេត្តកំពង់ស្ពឺ មានរោងចក្រ សហគ្រាស គ្រឹះស្ថាន ដែលបានចុះ ក្នុងបញ្ជីមានសរុប ១,៣៩២ កន្លែង មានកម្មករ និយោជិត សរុប ២៣៦,៨៩១ នាក់ ស្រី ១៥១,៩៤៥ នាក់ មាន សហគ្រាសធុនធ្ងន់សរុបមានចំនួន ៤៨២ កន្លែង មានកម្មករនិយោជិតសរុប ២២៧,៨៩៥ នាក់ ស្រី ១៤៨,៧១៧ នាក់ ក្នុងនោះមានរោងចក្រសហគ្រាសគ្រឹះស្ថាន បើកថ្មីក្នុងខែមីនា ឆ្នាំ២០២៥ មានចំនួន ១២ កន្លែង មានកម្មករ សរុប ៦,៨៦១ នាក់ ស្រី ៣,៤៦៦ នាក់ ។ ផ្តើមចេញពីការងារនិងប្រាក់ចំណូល បានធ្វើឲ្យជីវភាពរបស់បងប្អូនកម្មករ កម្មការិនីនិងប្រជាពលរដ្ឋមានភាពធូរធាសម្បូរសប្បាយហើយខេត្តកំពង់ស្ពឺបច្ចុប្បន្នបានក្លាយជាខេត្ត ស៊ីវិល័យ ស្មើមុខស្មើមាត់ថែមទាំងរីកចម្រើនលើគ្រប់វិស័យ សម្បូរសប្បាយ រុងរឿងផងដែរ។នេះដោយសារប្រទេសជាតិយើងមានសុខសន្តិភាព ធ្វើឱ្យវិស័យពុទ្ធចក្រ និងអាណាចក្រដើរទន្ទឹមគ្នា ដោយផ្នែកពុទ្ធចក្របានដើរតួនាទីជួយសង្គមលើការអប់រំពីអំពើល្អ អំពើមនុស្សធម៌ ចំពោះផ្នែកអាណាចក្រដែលមានការរីកចម្រើនក៏បានជួយដល់ការរីកចម្រើននៃព្រះពុទ្ធសាសនាដែរ៕

ដោយ៖ លឹម សាន្ត