AKP ភ្នំពេញ ថ្ងៃទី២៨ ខែមីនា ឆ្នាំ២០២៥--
លោក ឡុង ឌីម៉ង់ អភិបាលរងខេត្ដព្រះសីហនុបានគូសបញ្ជាក់ឱ្យដឹងថា មកដល់ពេលនេះ ស្ថានភាពរងឥទ្ធិពលពីការរញ្ជួយដីពីប្រទេសជិតខាង និងប្រទេសក្នុងតំបន់របស់យើងនេះ ខេត្ដព្រះសីហនុក៏បានទទួលនូវការរង្គើរអគារបន្ដិចដែរ តែក្នុងរយៈពេលខ្លីនោះទេ ហើយរហូតមកដល់ពេលនេះស្ថានភាពស្ងប់ស្ងាត់ទៅវិញ។
ការគូសបញ្ជាក់របស់ឯកឧត្ដមអភិបាលរងខេត្ដព្រះសីហនុដូចនេះ បន្ទាប់មានការរញ្ជួយដីដ៏ធំមួយនៅប្រទេសមីយ៉ាន់ម៉ា និងប្រទេសថៃ ដែលធ្វើរលំបាក់អគារ និងខូចខាតហេដ្ឋារចនាសម្ព័ន្ធជាច្រើនកន្លែង នារសៀលថ្ងៃទី២៨ ខែមីនា ឆ្នាំ២០២៥នេះ។

 លោក ឡុង ឌីម៉ង់ បានលើកឡើងថា ករណីមានការរង្គើរអគារនៅខេត្ដព្រះសីហនុនារសៀលថ្ងៃនេះ ឃើញថា មានការចែករំលែកតាមបណ្ដាញសង្គមផងក៏ដូចជាការចែករំលែកនូវព័ត៌មានគ្នាពីមួយទៅមួយលើអគារចំនួន៣ ដែលមានរង្គើរនោះ ទី១ សណ្ឋាគារណានហៃ ទី២ សណ្ឋាគារស៊េអ៊ូល និងទី៣ សណ្ឋាគារឆាយណាថោន តែមកដល់ពេលនេះគឺស្ងប់ស្ងាត់ហើយ។ ឯកឧត្ដមបន្ដថា ពេលដែលទទួលបានព័ត៌មាននេះភ្លាម ឯកឧត្ដមអភិបាលខេត្ដព្រះសីហនុ ក៏បានអញ្ជើញចុះទៅពិនិត្យដល់ទីកន្លែងផ្ទាល់តែម្ដង។ 
ជាមួយគ្នានេះដែរ លោកអភិបាលរងខេត្ដក៏បានបញ្ជាក់បន្ថែមថា អាជ្ញាធរខេត្ដបន្ដតាមដានព្រឹត្ដិការណ៍នេះបន្ដទៀត ហើយដើម្បីការពារសុវត្ថិភាព អាជ្ញាធរខេត្ដបានចាត់បញ្ចូនអ្នកជំនាញបច្ចេកទេសជាពិសេសផ្នែកសំណង់ ដែលមានមន្ទីររៀបចំដែនដី និងនគរូបនីយកម្ម និងសំណង់ខេត្ដព្រះសីហនុ ដើម្បីចុះពិនិត្យមើល និងបញ្ជាក់ពីសុវត្ថិភាពជូន៕

ដោយ៖ រិទ្ធី