AKP សៀមរាប ថ្ងៃទី២៨ ខែមីនា ឆ្នាំ២០២៥-- 

លោក នាក់ ណេរ៉ុន អភិបាលរងខេត្តសៀមរាប បានមានប្រសាសន៍ថា បច្ចុប្បន្ននេះ ប្រជាពលរដ្ឋមានជំងឺមកពីបណ្តាខេត្តជាច្រើន បានមកទទួលសេវា ពិនិត្យសុខភាព ថែទាំ ព្យាបាលជំងឺ នៅមន្ទីរពេទ្យបង្អែកខេត្តសៀមរាប។ ប៉ុន្តែក៏នៅមានប្រជាពលរដ្ឋមួយចំនួន បានធ្វើទេសចរសុខភាពទៅប្រទេសជិតខាង។ ដូចនេះ លោកសូមឱ្យមន្ទីរពេទ្យបង្អែកខេត្តសៀមរាប ពង្រឹងសមត្ថភាព ផ្តល់សេវា ពិនិត្យសុខភាព ថែទាំ ព្យាបាល ជូនអ្នកជំងឺឱ្យកាន់តែមានប្រសិទ្ធភាព និងទាក់ទាញទេសចរសុខភាពក្នុងស្រុក។ ការថ្លែងរបស់លោកអភិបាលរងខេត្តបានធ្វើឡើងនៅក្នុងពិធីបិទសន្និបាតបូកសរុបការងារសុខាភិបាលប្រចាំឆ្នាំ២០២៤ និងទិសដៅការងារឆ្នាំ២០២៥ របស់មន្ទីរសុខាភិបាលខេត្តសៀមរាប នាព្រឹកថ្ងៃទី២៨ ខែមីនា ឆ្នាំ២០២៥។

លោក នាក់ ណេរ៉ុន បានបន្តថា នៅពេលមន្ទីរពេទ្យបង្អែកខេត្តសៀមរាបធ្វើការផ្តល់សេវាសុខភាពមានប្រសិទ្ធភាពខ្ពស់ និងមានភាពជឿជាក់ប្រជាពលរដ្ឋមកពីបណ្តាខេត្តផ្សេងៗកាន់តែច្រើន និងមកទទួលសេវា ពិនិត្យសុខភាព ហើយច្បាស់ណាស់ថា បន្ទាប់មកពួកគេពិនិត្យសុខភាពរួច និងបន្តទៅដើរកម្សាន្តនៅតាមប្រាសាទ និងរមណីយដ្ឋានទេសចរណ៍ផ្សេងៗ នៅក្នុងខេត្តសៀមរាប ដែលនេះហៅថាទេសចរសុខភាពក្នុងស្រុក។ បច្ចុប្បន្ននេះ មន្ទីរពេទ្យបង្អែកខេត្តសៀមរាប មានផ្តល់សេវាឯកទេសសម្រាប់អ្នកជំងឺគ្រប់វ័យ និងមន្ទីរពេទ្យជ័យវរ្ម័ន្នទី៧ផ្តល់សេវាឯកទេសសម្រាប់កុមារកម្រិតខ្ពស់ថ្នាក់ជាតិ និងមានប្រព័ន្ធទំនាក់ទំនងបញ្ជូនអ្នកជំងឺទាន់ពេលវេលាបើធៀបនឹងបណ្តាឆ្នាំមុនៗ ពិសេសថ្ងៃនេះមានការពិភាក្សាជាក្រុមលើប្រធាបបទសំខាន់ ដែលជាការងារអាទិភាព និងជាផែនការគន្លឹះវិស័យសុខាភិបាល ក្នុងការអនុវត្តកម្មវិធីនយោបាយ និងយុទ្ធសាស្ត្របញ្ចកោណដំណាក់កាលទី១ របស់រាជរដ្ឋាភិបាលកម្ពុជា។

ទាំងនេះ គឺជាលក្ខខណ្ឌចាំបាច់ និងមិនអាចខ្វះបានដែលមនុស្សទូទៅគ្រប់ជាតិសាសន៍ត្រូវការជាចាំបាច់គ្រប់វិនាទីទាំងអស់ ដូច្នេះ ក្នុងនាមថ្នាក់ដឹកនាំ មន្ត្រីរាជការ និងអ្នកពាក់ព័ន្ធ សូមផ្តល់យកចិត្តទុកដាក់ឱ្យបានខ្ពស់បន្ថែមក្នុងអនុវត្តន៍ និងចូលរួមគាំទ្រ ក្នុងដំណើរការផ្តល់សេវាជូនប្រជាជនប្រកបដោយប្រសិទ្ធភាព ស័ក្តិសិទ្ធភាព សមធម៌ និងការជឿជាក់ ពិសេសបន្តយកចិត្តទុកដាក់លើផែនការកន្លឹះក្នុងវិស័យសុខាភិបាល ព្រោះការងារនេះ មិនអាស្រ័យលើមន្ត្រីសុខាភិបាល តែមួយតួអង្គ ប៉ុណ្ណោះទេ គឺទាមទារឱ្យគ្រប់គ្នា រួមទាំងប្រជាជនទាំងអស់ចូលរួម និងផ្តល់កិច្ចសហការផងដែរ ព្រោះអ្នកពាក់ព័ន្ធទាំងអស់នេះហើយ ជាភ្នែកជាច្រមុះ មិនអាចខ្វះបាន ក្នុងការតម្រង់ទិស ដើម្បីអភិវឌ្ឍវិស័យសុខាភិបាលឱ្យមានភាពប្រសើរឡើង និងការលើកកម្ពស់កិត្ដិយស និងសេចក្ដីថ្លៃថ្នូរនៃព្រះរាជាណាចក្រកម្ពុជាយើង៕

ដោយ ឃុត សៅ