AKP ភ្នំពេញ ថ្ងៃទី២៨ ខែមីនា ឆ្នាំ២០២៥-- ឯកឧត្ដម ឡាំ ជា រដ្ឋមន្រ្ដីទទួលបន្ទុករដ្ឋលេខាធិការដ្ឋានកិច្ចការព្រំដែន បានអញ្ជើញជាអធិបតីដឹកនាំកិច្ចប្រជុំស្តាប់របាយការណ៍ និងពិនិត្យវឌ្ឍនភាពការងាររបស់ក្រុមការងាររៀបចំសេចក្ដីព្រាងសេចក្ដីសម្រេចស្ដីពីការបង្កើតអនុគណៈកម្មការព្រំដែននៃខេត្តជាប់ព្រំដែនជាមួយប្រទេសជិតខាង កាលពីរសៀលថ្ងៃទី២៧ ខែមីនា ឆ្នាំ២០២៥ នៅសាលប្រជុំធំនៃទីស្ដីការរដ្ឋលេខាធិការដ្ឋានកិច្ចការព្រំដែន ដោយមានការអញ្ជើញចូលរួមពីសំណាក់ឯកឧត្ដមរដ្ឋលេខាធិការប្រចាំការ ឯកឧត្ដមរដ្ឋលេខាធិការ ឯកឧត្ដមអនុរដ្ឋលេខាធិការ ជាថ្នាក់ដឹកនាំ ឯកឧត្ដមអគ្គនាយក លោកអគ្គនាយករង និងមន្រ្ដីជំនាញពាក់ព័ន្ធនៃរដ្ឋលេខាធិការដ្ឋានកិច្ចការព្រំដែន។

មានមតិស្វាគមន៍ ឯកឧត្ដមរដ្ឋមន្រ្ដីបានកោតសរសើរ និងវាយតម្លៃខ្ពស់ចំពោះក្រុមការងារ ដែលបានយកចិត្ដទុកប្រកបដោយស្មារតីទទួលខុសត្រូវខ្ពស់ និងបានខិតខំប្រឹងប្រែងក្នុងការតាក់តែងរៀបចំ ពិនិត្យពិភាក្សា និងកែសម្រួលលើសេចក្ដីព្រាងសេចក្ដីសម្រេចស្ដីពីការបង្កើតអនុគណៈកម្មការព្រំដែននៃខេត្តជាប់ព្រំដែនជាមួយប្រទេសជិតខាង និងតែងតែបានយកចិត្តទុកដាក់ខ្ពស់គោរពតាមអនុសាសន៍ណែនាំដ៏ខ្ពង់ខ្ពស់បំផុតរបស់សម្ដេចធិបតី ហ៊ុន ម៉ាណែត នាយករដ្ឋមន្រ្ដីនៃព្រះរាជាណាចក្រកម្ពុជា ចំពោះកិច្ចការព្រំដែន។

បន្ទាប់ពីបានស្ដាប់របាយការណ៍សង្ខេបដោយក្រុមការងាររួចមក ឯកឧត្ដមរដ្ឋមន្រ្ដីបានកត់សម្គាល់ចំណុចសំខាន់ៗមួយចំនួន ដើម្បីជូនអង្គប្រជុំពិនិត្យ និងពិភាក្សាក្នុងការប្រមូលធាតុចូលពីទិដ្ឋភាពច្បាប់ និងបច្ចេកទេសបន្ថែមទៀតឱ្យបានគ្រប់ជ្រុងជ្រោយ និងត្រៀមលក្ខណៈពេញលេញក្នុងការបន្តនីតិវិធីនានាក្នុងដំណាក់កាលបន្តបន្ទាប់។

ទន្ទឹមនឹងនេះ ឯកឧត្ដមរដ្ឋមន្រ្ដីបានផ្ដល់អនុសាសន៍ណែនាំនូវចំណុចគន្លឹះសំខាន់ៗមួយចំនួនជូនក្រុមការងាររៀបចំសេចក្ដីព្រាងសេចក្ដីសម្រេចនេះ ដើម្បីពិនិត្យនិងកែសម្រួលខ្លឹមសារក្នុងការចុះអនុវត្ដជាក់ស្ដែងសម្រាប់ការងារខណ្ឌសីមា និងបោះបង្គោលព្រំដែនជាមួយប្រទេសជិតខាងនាពេលខាងមុខ និងបានជូនពរដល់ឯកឧត្ដម លោក លោកស្រីថ្នាក់ដឹកនាំ និងមន្រ្ដីបច្ចេកទេសទាំងអស់ សូមមានសុខភាពល្អបរិបូរណ៍ និងសម្រេចបានគ្រប់ការងារភារកិច្ច៕

ដោយ៖ ពេជ្រ សំអឿន (ប្រភព៖ រដ្ឋលេខាធិការដ្ឋានកិច្ចការព្រំដែន)