AKP តាកែវ ថ្ងៃទី២៨ ខែមីនា ឆ្នាំ២០២៥-- នៅសួនច្បារមាត់បឹងតាកែវស្ថិត ក្នុងក្រុងដូនកែវខេត្តតាកែវ កាលពីព្រឹកថ្ងៃព្រហស្បតិ៍ ទី២៧ ខែមីនា ឆ្នាំ២០២៥ រដ្ឋបាលខេត្តតាកែវបានរៀបចំក្រុងពលីសុំសេចក្ដីសុខសេចក្ដីចម្រើនពីម្ចាស់ទឹកម្ចាស់ដី ដើម្បីរៀបចំពិធី “តាកែវសង្ក្រាន” ឆ្នាំ២០២៥ ត្រៀមទទួលទេវតាឆ្នាំថ្មី នាឱកាសអបអរសារទរពិធីបុណ្យចូលឆ្នាំថ្មីប្រពៃណីជាតិខ្មែរ ដែលនឹងប្រព្រឹត្តទៅនៅថ្ងៃទី១៤-១៦ ខែមេសា ឆ្នាំ២០២៥ ក្នុងពេលឆាប់ៗខាងមុខនេះ ក្រោមអធិបតីភាពរបស់ឯកឧត្តម យស ណាស៊ី ប្រធានក្រុមប្រឹក្សាខេត្តតាកែវ ឯកឧត្តម វ៉ី សំណាង អភិបាលនៃគណៈអភិបាលខេត្តតាកែវ ព្រមទាំងអភិបាលរងខេត្តតាកែវ ប្រធានអនុប្រធានមន្ទីរអង្គភាពជុំវិញខេត្ត អភិបាលអភិបាលរងក្រុង-ស្រុក កងកម្លាំងប្រដាប់អាវុធ និងមន្ត្រីរាជការជាច្រើនរូបចូលរួមផងដែរ។

ក្នុងពិធីសំណេះសំណាលនោះ ឯកឧត្តម វ៉ី សំណាង អភិបាលនៃគណៈអភិបាលខេត្តតាកែវ បានថ្លែងថា បន្ទាប់ពីការរៀបចំបុណ្យទន្លេបានជោគជ័យទៅតាមការគ្រោងទុកនៅពេលនេះរដ្ឋបាលខេត្តតាកែវ កំពុងតែរៀបចំព្រឹត្តិការណ៍សង្រ្កាន្តឆ្នាំថ្មីបន្តទៀត ដែលសង្រ្កាន្តឆ្នាំថ្មីនេះពិតជាកក្រើកជាក់ជាពុំខាន ព្រោះមានព្រឹត្តិការណ៍ប្លែកៗ និងសប្បាយៗជាច្រើន ជូនបងប្អូនប្រជាពលរដ្ឋមកចូលរួមលេងកម្សាន្ត។

ទន្ទឹមនឹងនេះ ឯកឧត្តម វ៉ី សំណាង បានមានប្រសាសន៍បន្តថា សម្រាប់កម្មវិធី “តាកែវសង្រ្កាន្ត” ឆ្នាំ២០២៥នេះ ក្រុមការងាររដ្ឋបាលខេត្តតាកែវ បានសិក្សាត្រៀមរៀបចំ ការប្រណាំងរទេះគោសាឡី នៅមុនថ្ងៃពិធីបុណ្យចូលឆ្នាំមកដល់ ព្រមទាំងរៀបចំទីតាំងចំនួន៥កន្លែងធំៗសម្រាប់ផ្ដល់ការកម្សាន្ដជូនបងប្អូនប្រជាពលរដ្ឋមានដូចជា ពិធីសាសនា ភូមិមរតកវប្បធម៌ប្រវត្តិសាស្ត្រ ភូមិល្បែង ប្រជាប្រិយ និងទស្សនីយភាពសិល្បៈចម្រុះ ភូមិត្រជាក់ចិត្ត តាកែវភូមិកំណើតខ្ញុំ ដែលនឹងនាំមកជូននូវផ្ទាំងទស្សនីយភាពថ្មីៗប្លែកៗ ជូនបងប្អូនប្រជាពលរដ្ឋទាំងអស់កម្សាន្ត។

ឯកឧត្តមអភិបាលខេត្តតាកែវបានមានប្រសាសន៍បន្តថា ក្រៅពីការរៀបចំលេងល្បែងប្រជាប្រិយខ្មែរ ការសម្តែងរបាំប្រពៃណី យើងក៏នឹងមានការរៀបចំស្តង់ពិព័រណ៍ ដែលមានការចូលរួមពីបណ្ដាមន្ទីរអង្គភាពជុំវិញខេត្ត និងមកពីបណ្ដាស្រុកក្រុង  ដែលនឹងដាក់តាំងផលិតផលកើតចេញពីស្នាដៃកូនខ្មែរ ម្ហូបអាហារខ្មែរជាពិសេសគឺមុខម្ហូបប្រចាំតំបន់ផ្សេងៗគ្នា ដើម្បីបង្ហាញដល់បងប្អូនប្រជាពលរដ្ឋនិងភ្ញៀវទេសចរណ៍ជាតិអន្តរជាតិមកលេងកម្សាន្តខេត្តតាកែវ នៅក្នុងពិធីបុណ្យចូលឆ្នាំប្រពៃណីជាតិរបស់ខ្មែរយើងក្នុងពេលឆាប់ៗខាងមុខនេះ៕

ដោយ អ៊ុច សៀង