AKP ភ្នំពេញ ថ្ងៃទី២៨ ខែមីនា ឆ្នាំ២០២៥ -- ទីភ្នាក់ងារអង្គការសហប្រជាជាតិទទួលបន្ទុកជនភៀសខ្លួនប៉ាឡេស្ទីន (UNRWA) បាននិយាយកាលពីថ្ងៃព្រហស្បតិ៍ថា កុមារប៉ាឡេស្ទីនជាង ១៨០នាក់ត្រូវបានសម្លាប់នៅក្នុងការវាយប្រហាររបស់អ៊ីស្រាអែលនៅតំបន់ហ្គាហ្សាក្នុងរយៈពេលតែមួយថ្ងៃ ចំពេលដែលមានការវាយលុកយ៉ាងសាហាវទៅលើតំបន់ជុំវិញ។

អង្គការនេះបាននិយាយនៅក្នុងសេចក្តីថ្លែងការណ៍មួយថា «កុមារជាង១៨០នាក់ត្រូវបានគេរាយការណ៍ថាត្រូវបានសម្លាប់ក្នុងរយៈពេលតែមួយថ្ងៃនៅក្នុងតំបន់ហ្គាហ្សា»។

ទោះជាយ៉ាង​ណា​ក៏ដោយ ទីភ្នាក់ងារ​របស់​អង្គការ​សហ​ប្រជាជាតិ​មិន​បាន​បញ្ជាក់​ថា ​តើ​កុមារទាំងនោះ​ត្រូវ​បាន​គេ​សម្លាប់​នៅ​ពេល​ណា​នោះ​ទេ។

វាបានព្រមានថា «ប្រសិនបើបទឈប់បាញ់មិនត្រូវបានស្តារឡើងវិញទេ ការបាត់បង់ជីវិតទ្រង់ទ្រាយធំនៅតែមានបន្ត»។

កងទ័ពអ៊ីស្រាអែលបានចាប់ផ្តើមយុទ្ធនាការលើអាកាសដ៏គួរឱ្យភ្ញាក់ផ្អើលមួយនៅលើតំបន់ហ្គាហ្សាស្ទ្រីបកាលពីថ្ងៃទី១៨ ខែមីនា ដោយបានសម្លាប់មនុស្សចំនួន ៨៥៥នាក់ របួសជិត ១.៩០០នាក់ និងបានរំលោភកិច្ចព្រមព្រៀងបទឈប់បាញ់ និងការផ្លាស់ប្តូរអ្នកទោសដែលបានធ្វើឡើងនៅក្នុងខែមករា។

អង្គការសហប្រជាជាតិបានប៉ាន់ប្រមាណថា ប្រជាជនប៉ាឡេស្ទីនប្រហែល ១២៤.០០០នាក់ត្រូវបានផ្លាស់ទីលំនៅម្តងទៀតចាប់តាំងពីអ៊ីស្រាអែលបានបន្តការវាយប្រហាររបស់ខ្លួនទៅលើតំបន់ហ្គាហ្សា។

អង្គការ UNRWA បាននិយាយថា «ក្រុមគ្រួសារប្រជាជននៅតំបន់ហ្គាហ្សាត្រូវបានបង្ខំឱ្យភៀសខ្លួនក្នុងការស្វែងរកសុវត្ថិភាពម្តងទៀត»។

អង្គការនោះបាននិយាយបន្ថែមថា «ក្នុងពេលជាមួយគ្នានេះការឡោមព័ទ្ធដែលកំពុងបន្តបានធ្វើឱ្យវិបត្តិមនុស្សធម៌កាន់តែអាក្រក់ទៅៗ។ជនស៊ីវិលត្រូវតែគោរព និងត្រូវបានការពារគ្រប់ពេលវេលា គ្រប់ទីកន្លែង»។

នាយកផ្នែកទំនាក់ទំនងរបស់អង្គការ UNRWA លោកស្រី ជូលីយែត ទូម៉ា (Juliette Touma) បាននិយាយថា ការផ្គត់ផ្គង់ស្បៀងអាហារមិនត្រូវបានអនុញ្ញាតឱ្យចូលទៅក្នុងតំបន់ហ្គាហ្សាទេចាប់តាំងពីដើមខែមីនាមក ចំពេលដែលមានការបិទផ្លូវរបស់អ៊ីស្រាអែលនៅតំបន់នោះ។

លោកស្រីបាននិយាយថា «ចាប់តាំងពីថ្ងៃទី០២ ខែមីនា មក គ្មានអាហារ គ្មានទឹក គ្មានឱសថ និងគ្មានការផ្គត់ផ្គង់ពាណិជ្ជកម្មណាមួយត្រូវបានអនុញ្ញាតឱ្យចូលទៅក្នុងតំបន់ហ្គាហ្សាទេ ដោយសារតែការហាមឃាត់ដោយអ៊ីស្រាអែល»។

លោកស្រី ទូម៉ា បានព្រមានថា «ជារៀងរាល់ថ្ងៃ ដោយគ្មានការផ្គត់ផ្គង់ទាំងនោះ មានន័យថា កុមារទាំងអស់នឹងត្រូវចូលគេងដោយភាពអត់ឃ្លាន»៕

ដោយ៖ យា ចិន្ដាខន្ដី (ប្រភព៖ AA-AKP)