AKP ភ្នំពេញ ថ្ងៃទី២៨ ខែមីនា ឆ្នាំ២០២៥ -- សេវាស៊ើបការណ៍សម្ងាត់ជាតិរបស់កូរ៉េខាងត្បូង (NIS) បានព្រមានអំពីការវាយប្រហារភេរវកម្មដែលអាចមានគោលដៅទៅលើកិច្ចប្រជុំកំពូលនៃកិច្ចសហប្រតិបត្តិការសេដ្ឋកិច្ចអាស៊ីប៉ាស៊ីហ្វិក (APEC) ដែលគ្រោងនឹងប្រារព្ធធ្វើនៅក្នុងប្រទេសកូរ៉េខាងត្បូងនៅក្នុងឆ្នាំនេះ។

នៅក្នុងរបាយការណ៍ស្តីពីភេរវកម្មរបស់ខ្លួនដែលបានចេញផ្សាយកាលពីថ្ងៃពុធ ទីភ្នាក់ងារស៊ើបការណ៍សម្ងាត់បានជំរុញឱ្យរដ្ឋាភិបាលចាត់វិធានការប្រុងប្រយ័ត្នចំពោះហានិភ័យដែលអាចកើតមាននៃអំពើភេរវកម្មនៅមុនព្រឹត្តិការណ៍នៅខែវិច្ឆិកាខាងមុខនេះ ដែលបណ្តាមេដឹកនាំពិភពលោកនឹងទៅជួបជុំគ្នាសម្រាប់កិច្ចពិភាក្សា ស្តីពីពាណិជ្ជកម្ម និងបច្ចេកវិទ្យានាពេលអនាគត។

NIS បាននិយាយថា «ជាមួយនឹងមេដឹកនាំពិភពលោកមួយចំនួនធំដែលរំពឹងថានឹងចូលរួមកិច្ចប្រជុំកំពូល APEC នេះ ពិភពលោកនឹងឃ្លាំមើលយ៉ាងដិតដល់ចំពោះព្រឹត្តិការណ៍នេះ។ កត្តានេះនឹងបង្កើនលទ្ធភាពនៃអំពើភេរវកម្ម។ ជាពិសេស ការគំរាមកំហែងនៃការវាយប្រហារដោយក្រុមភេរវករអន្តរជាតិដែលផ្តោតសំខាន់ទៅលើមេដឹកនាំអាស៊ីប៉ាស៊ីហ្វិក។

វេទិកានេះនឹងប្រព្រឹត្តទៅនៅទីក្រុងក្យឹងជូ នៅភាគអាគ្នេយ៍ប្រទេសកូរ៉េខាងត្បូង ជាទីដែលអ្នកតំណាងមកពីសមាជិក APEC ទាំង ២១ប្រទេស ដែលរួមមានទាំងប្រធានាធិបតីសហរដ្ឋអាមេរិក លោក ដូណាល់ ត្រាំ(Donald Trump) ក៏ដូចជាមេដឹកនាំធុរកិច្ចមកពីជុំវិញពិភពលោក ត្រូវបានគេរំពឹងថានឹងទៅចូលរួម។

NIS បាននិយាយថា ដើម្បីធានាសុវត្ថិភាពរបស់អ្នកចូលរួមទាំងអស់រដ្ឋាភិបាលចាំបាច់ត្រូវបង្កើនកិច្ចខិតខំប្រឹងប្រែង ចំពេលដែលមានការកើនឡើងនៃការគំរាមកំហែងនៃអំពើភេរវកម្មនៅក្នុង និងក្រៅប្រទេសកូរ៉េខាងត្បូង៕

ដោយ៖ យា ចិន្ដាខន្ដី (ប្រភព៖ កូរ៉េថាមស៍)