AKP ភ្នំពេញ ថ្ងៃទី២៨ ខែមីនា ឆ្នាំ២០២៥ -- យោធាកូរ៉េខាងត្បូងបាននិយាយកាលពីថ្ងៃព្រហស្បតិ៍ថា ប្រទេសកូរ៉េខាងជើងហាក់ដូចជាបានបញ្ជូនទាហានយ៉ាងហោចណាស់ ៣.០០០នាក់ទៅកាន់ប្រទេសរុស្ស៊ីក្នុងខែមករា និងកុម្ភៈ ដើម្បីគាំទ្រដល់សង្គ្រាមរបស់ទីក្រុងម៉ូស្គូប្រឆាំងនឹងអ៊ុយក្រែន។

ការវាយតម្លៃនេះបានកើតឡើងចំពេលមានការព្រួយបារម្ភថា ការពង្រឹងទំនាក់ទំនងយោធាកាន់តែស៊ីជម្រៅរបស់ប្រទេសកូរ៉េខាងជើង និងរុស្ស៊ីអាចនាំឱ្យទីក្រុងម៉ូស្គូផ្ទេរបច្ចេកវិទ្យាសព្វាវុធទំនើបៗទៅកាន់ទីក្រុងព្យុងយ៉ាងជាថ្នូរនឹងការដាក់ពង្រាយកងទ័ព។

អគ្គសេនាធិការចម្រុះរបស់កូរ៉េខាងត្បូង (JCS) បាននិយាយថា«ក្នុងចំណោមទាហានកូរ៉េខាងជើងចំនួន ១១.០០០នាក់ដែលបានបញ្ជូនទៅកាន់ប្រទេសរុស្ស៊ី មានអ្នកស្លាប់ និងរបួសចំនួន ៤.០០០នាក់ ដោយប្រហែល ៣.០០០នាក់ ឬច្រើនជាងនេះត្រូវបានបញ្ជូនបន្ថែមទៀតនៅក្នុងខែមករា និងខែកុម្ភៈ»។

បន្ថែមពីលើការដាក់ពង្រាយកងទ័ព JCS បាននិយាយថាប្រទេសកូរ៉េខាងជើងនៅតែបន្តផ្គត់ផ្គង់មីស៊ីល គ្រាប់រំសេវ និងកាំភ្លើងធំដល់ប្រទេសរុស្ស៊ី រួមទាំង «ចំនួនដ៏ច្រើនសន្ធឹកសន្ធាប់នៃមីស៊ីលផ្លោងរយៈចម្ងាយខ្លី និងរថក្រោះ ១៧០មីលីម៉ែត្រប្រហែល ២២០គ្រឿង និងគ្រាប់រ៉ុក្កែត២៤០មីលីម៉ែត្រ»។

យោធាកូរ៉េខាងត្បូងបាននិយាយថា ប្រទេសកូរ៉េខាងជើងហាក់ដូចជាកំពុងធ្វើឱ្យប្រសើរឡើងនូវបច្ចេកវិទ្យាដើម្បីបាញ់បង្ហោះផ្កាយរណបចារកម្មយោធាមួយផ្សេងទៀត ទោះបីជាមិនមានសញ្ញានៃការបាញ់បង្ហោះនាពេលខាងមុខក៏ដោយ។

JCS បាននិយាយថា ខ្លួនកំពុងតាមដានយ៉ាងដិតដល់នូវការបង្កហេតុដែលអាចកើតមានរបស់ប្រទេសកូរ៉េខាងជើង រួមទាំងការបាញ់បង្ហោះមីស៊ីលអន្តរទ្វីបឥន្ធនៈរឹង មីស៊ីលលឿនជាងសំឡេង និងមីស៊ីលផ្លោងបាញ់ចេញពីនាវាមុជទឹក៕

ដោយ៖ មូល មិនា (ប្រភព៖ យ៉ុនហាប់)