AKP ភ្នំពេញ ថ្ងៃទី២៧ ខែមីនា ឆ្នាំ២០២៥-- 

ឯកឧត្តមអភិសន្តិបណ្ឌិត ស សុខា ឧបនាយករដ្ឋមន្រ្តី រដ្ឋមន្រ្តីក្រសួងមហាផ្ទៃ និងជាប្រធានគណៈកម្មាធិការជាតិប្រយុទ្ធប្រឆាំងអំពើជួញដូរមនុស្ស បានថ្លែងអំណរគុណដល់អង្គការដៃគូជាតិ និងអន្តរជាតិ ដែលបានចូលរួមគាំទ្រ និងសហការជាមួយរាជរដ្ឋាភិបាល តាមរយៈគណៈកម្មាធិការជាតិប្រយុទ្ធប្រឆាំងអំពើជួញដូរមនុស្ស ទាំងនៅថ្នាក់ជាតិ និងថ្នាក់ក្រោមជាតិក្នុងការអនុវត្តយុទ្ធសាស្រ្តទាំងបួន ដែលត្រូវបានកំណត់ដោយការឯកភាពគ្នានៅក្នុងផែនការយុទ្ធសាស្រ្តជាតិប្រយុទ្ធប្រឆាំងអំពើជួញដូរមនុស្ស។ ការថ្លែងអំណរគុណរបស់ឯកឧត្តមអភិសន្តិបណ្ឌិត ស សុខា បែបនេះធ្វើឡើងក្នុងពិធីផ្សព្វផ្សាយរបាយការណ៍ជាតិស្តីពីលទ្ធផលការងារប្រយុទ្ធប្រឆាំងអំពើជួញដូរមនុស្ស ឆ្នាំ២០២៤ និងលើកទិសដៅឆ្នាំ២០២៥ របស់គណៈកម្មាធិការជាតិប្រយុទ្ធប្រឆាំងអំពើជួញដូរមនុស្ស (គ.ជ.ប.ជ) នាព្រឹកថ្ងៃទី២៧ ខែមីនា ឆ្នាំ២០២៥ នៅទីស្តីការក្រសួងមហាផ្ទៃ។

រដ្ឋមន្ត្រីក្រសួងមហាផ្ទៃបានលើកឡើងថា ពិធីផ្សព្វផ្សាយលទ្ធផលការងាររបស់គណៈកម្មាធិការជាតិប្រយុទ្ធប្រឆាំងអំពើជួញដូរមនុស្សត្រូវបានធ្វើឡើងជាប្រចាំ ដើម្បីចែកជូនសាធារណជន អ្នកសារព័ត៌ មានជាតិ និងអន្តរជាតិបានជ្រាបអំពីកិច្ចខិតខំប្រឹងប្រែងក្នុងការបង្ការ ទប់ស្កាត់ ឈានទៅលុបបំបាត់អំពើជួញដូរមនុស្សរហូតទទួលលទ្ធផលដ៏ធំធេង ដែលលទ្ធផលនេះក៏ជាការបង្ហាញនូវឆន្ទៈរួម និងកម្លាំងសរុប ដែលគ្រប់ភាគីពាក់ព័ន្ធ ទាំងរាជរដ្ឋាភិបាល ទាំងអង្គការមិនមែនរដ្ឋាភិបាលជាតិ និងអន្តរជាតិ ទាំងវិស័យសាសនា និងវិស័យឯកជន បាននាំគ្នាពុះពារគ្រប់ឧបសគ្គ និងភាពប្រឈមទាំងឡាយ ដើម្បីធ្វើឱ្យសម្រេចនូវលទ្ធផលនេះ។

 
ជាមួយគ្នានេះ ឯកឧត្តមអភិសន្តិបណ្ឌិត ស សុខា ក៏បានថ្លែងអំណរគុណគ្រប់កិច្ចសហការពីសមត្ថកិច្ចជំនាញ ស្ថានទូត ឬស្ថានតំណាងនៃបណ្តាប្រទេសក្នុងនោះមានសហរដ្ឋអាមេរិក នូវែលសេឡង់ ប៉ូឡូញ ប៊ែលហ្ស៊ិក ចក្រភពអង់គ្លេស អូស្រ្តាលី សាធារណរដ្ឋកូរ៉េ ឥណ្ឌា វៀតណាម ចិន ហ្វីលីពីន ឥណ្ឌូនេស៊ី ជប៉ុន ថៃ និងប្រទេសម៉ាឡេស៊ីជាដើម ដែលសកម្មភាពនេះបានបង្ហាញអំពីកិច្ចសហការល្អ ក្នុងការឆ្លើយតបទៅនឹងអំពើជួញដូរមនុស្សកាន់តែមានប្រសិទ្ធភាព៕

ដោយ៖ ចាន់ សុភឿន