AKP បន្ទាយមានជ័យ ថ្ងៃទី២៧ ខែមីនា ឆ្នាំ២០២៥ -- រដ្ឋបាលខេត្តបន្ទាយមានជ័យ បានរៀបចំកិច្ចប្រជុំសំខាន់មួយស្តីពីការងារប្រយុទ្ធប្រឆាំងនឹងជំងឺអេដស៍នៅក្នុងខេត្តព្រឹកថ្ងៃព្រហស្បតិ៍ ទី២៧ ខែមីនា ឆ្នាំ២០២៥ នៅបន្ទប់ប្រជុំ ក្រោមអធិបតីភាពឯកឧត្តម វេជ្ជបណ្ឌិត ឡាន វណ្ណសេង អនុប្រធានមជ្ឈមណ្ឌលជាតិប្រយុទ្ធប្រឆាំងនឹងជំងឺអេដស៍ និងក្រុមការងារអាជ្ញាធរជាតិប្រយុទ្ធនឹងជំងឺអេដស៍ ក្នុងការចុះមកបំពេញការងារនៅក្នុងខេត្តបន្ទាយមានជ័យ លោក លី សុវណ្ណារិទ្ធ អភិបាលរងខេត្តបន្ទាយមានជ័យ តំណាងដ៏ខ្ពង់ខ្ពស់ឯកឧត្តម អ៊ុំ រាត្រី អភិបាល នៃគណៈអភិបាលខេត្ត។

ជំនួបដ៏មានសារៈសំខាន់នេះ បានបង្ហាញពីការប្តេជ្ញាចិត្តរួមគ្នារវាងរដ្ឋបាលខេត្ត និងអាជ្ញាធរជាតិប្រយុទ្ធនឹងជំងឺអេដស៍ ក្នុងការបង្កើនប្រសិទ្ធភាពនៃការងារប្រយុទ្ធប្រឆាំងនឹងជំងឺអេដស៍ ក្នុងគោលដៅឈានទៅបញ្ចប់ការរីករាលដាលនៃជំងឺដ៏កាចសាហាវនេះនៅឆ្នាំ២០៣០ ស្របតាមគោលដៅជាតិ។

ក្នុងឱកាសនោះ ឯកឧត្តម វេជ្ជបណ្ឌិត ឡាន វណ្ណសេង បានថ្លែងនូវសុន្ទរកថាគន្លឹះ ដោយបានលើកឡើងអំពីវឌ្ឍនភាពគួរឱ្យកត់សម្គាល់ដែលកម្ពុជាសម្រេចបានក្នុងការទប់ស្កាត់ការរីករាលដាលនៃជំងឺអេដស៍ និងបានគូសបញ្ជាក់ថា កិច្ចខិតខំប្រឹងប្រែងរួមគ្នារបស់រាជរដ្ឋាភិបាល អង្គការជាតិ អន្តរជាតិ និងសហគមន៍ បាននាំមកនូវលទ្ធផលវិជ្ជមានជាច្រើន ជាពិសេសការកាត់បន្ថយអត្រាឆ្លងថ្មី និងការបង្កើនអាយុសង្ឃឹមរស់របស់អ្នកផ្ទុកមេរោគអេដស៍ តាមរយៈការព្យាបាលដោយថ្នាំ ARV។

ទោះជាយ៉ាងណាក៏ដោយ ឯកឧត្តម វេជ្ជបណ្ឌិត ឡាន វណ្ណសេង ក៏បានលើកឡើងនូវបញ្ហាប្រឈមមួយចំនួនដែលនៅតែជាឧបសគ្គក្នុងការសម្រេចបាននូវគោលដៅបញ្ចប់ជំងឺអេដស៍ រួមមានការរើសអើងលើអ្នកផ្ទុកមេរោគអេដស៍ ដែលនៅតែបន្តកើតមាននៅក្នុងសង្គម ការចូលទៅដល់សេវាសុខភាពសម្រាប់ក្រុមប្រជាជនងាយរងគ្រោះ និងការធានាបាននូវនិរន្តរភាពហិរញ្ញប្បទានសម្រាប់កម្មវិធីប្រយុទ្ធប្រឆាំងនឹងជំងឺអេដស៍។

ឯកឧត្តមបានសង្កត់ធ្ងន់លើសារសំខាន់នៃកិច្ចសហប្រតិបត្តិការកាន់តែស៊ីជម្រៅរវាងអាជ្ញាធរជាតិ និងរដ្ឋបាលខេត្ត ជាពិសេសក្នុងការអនុវត្តផែនការយុទ្ធសាស្ត្រជាតិប្រយុទ្ធនឹងជំងឺអេដស៍ ឆ្នាំ២០២៤-២០២៨ ដែលផ្តោតលើការបង្កើនការយល់ដឹង ការធ្វើតេស្តរកមេរោគអេដស៍ ការផ្តល់ការព្យាបាល និងការគាំទ្រផ្នែកចិត្តសង្គមដល់អ្នកផ្ទុកមេរោគអេដស៍ និងក្រុមគ្រួសាររបស់ពួកគេ។

ទន្ទឹមនោះដែរ លោក លី សុវណ្ណារិទ្ធ អភិបាលរងខេត្ត បានបញ្ជាក់យ៉ាងច្បាស់អំពីការប្តេជ្ញាចិត្តរបស់រដ្ឋបាលខេត្ត ក្នុងការចូលរួមយ៉ាងសកម្មជាមួយអាជ្ញាធរជាតិប្រយុទ្ធនឹងជំងឺអេដស៍ និងដៃគូពាក់ព័ន្ធផ្សេងៗទៀត ដើម្បីពង្រឹងការអនុវត្តកម្មវិធីនានាដែលបានដាក់ចេញ ជាពិសេសការបង្កើនការយល់ដឹងដល់ប្រជាពលរដ្ឋគ្រប់ស្រទាប់វណ្ណៈអំពីជំងឺអេដស៍ វិធីការពារ និងសិទ្ធិរបស់អ្នកផ្ទុកមេរោគអេដស៍។ រដ្ឋបាលខេត្តបាន និងកំពុងខិតខំប្រឹងប្រែងក្នុងការកៀរគរធនធាន និងកសាងសមត្ថភាពដល់មន្ត្រីជំនាញនៅថ្នាក់មូលដ្ឋាន ដើម្បីធានាថា សេវាបង្ការ ព្យាបាល និងថែទាំសម្រាប់អ្នកផ្ទុកមេរោគអេដស៍ អាចទៅដល់ប្រជាពលរដ្ឋគ្រប់ទីកន្លែងនៅក្នុងខេត្ត។ លោកក៏បានសន្យាថានឹងបន្តសហការយ៉ាងជិតស្និទ្ធជាមួយមជ្ឈមណ្ឌលជាតិប្រយុទ្ធប្រឆាំងនឹងជំងឺអេដស៍ ក្នុងការដោះស្រាយបញ្ហាប្រឈមនានា និងជំរុញការអនុវត្តផែនការយុទ្ធសាស្ត្រជាតិឱ្យទទួលបានជោគជ័យ។

ភាគីទាំងពីរបានឯកភាពគ្នាលើសារសំខាន់នៃការបន្តពង្រឹងកិច្ចសហប្រតិបត្តិការ ការផ្លាស់ប្តូរព័ត៌មាន និងបទពិសោធន៍ល្អៗ ដើម្បីធានាបាននូវការឆ្លើយតបប្រកបដោយប្រសិទ្ធភាពចំពោះបញ្ហាជំងឺអេដស៍នៅក្នុងខេត្តបន្ទាយមានជ័យ និងរួមចំណែកដល់ការសម្រេចបាននូវគោលដៅជាតិក្នុងការបញ្ចប់ការរីករាលដាលនៃជំងឺអេដស៍នៅឆ្នាំ២០៣០។

វត្តមានរបស់ ឯកឧត្តម វេជ្ជបណ្ឌិត ឡាន វណ្ណសេង និងក្រុមការងារអាជ្ញាធរជាតិប្រយុទ្ធនឹងជំងឺអេដស៍ នៅក្នុងខេត្តបន្ទាយមានជ័យ គឺជាសក្ខីភាពមួយទៀតដែលបង្ហាញពីការយកចិត្តទុកដាក់ខ្ពស់របស់រាជរដ្ឋាភិបាលចំពោះសុខុមាលភាពរបស់ប្រជាពលរដ្ឋ និងការប្តេជ្ញាចិត្តយ៉ាងមុតមាំក្នុងការប្រយុទ្ធប្រឆាំងនឹងជំងឺអេដស៍ ដើម្បីកសាងសង្គមមួយដែលគ្មានជំងឺអេដស៍៕

ដោយ ឈុន សារ៉ាត