AKP ភ្នំពេញ ថ្ងៃទី២៧ ខែមីនា ឆ្នាំ២០២៥--ឯកឧត្តម ប្រាជ្ញ ចន្ទ ប្រធានគណៈកម្មាធិការជាតិរៀបចំការបោះឆ្នោតបានថ្លែងថា គិតចាប់តាំងពីឆ្នាំ១៩៩៨ មកដល់បច្ចុប្បន្ន គ.ជប បានរៀបចំការបោះឆ្នោតដោយខ្លួនឯងជាទៀងទាត់តាមការកំណត់នៃច្បាប់ សរុបចំនួន ១៩លើករួចមកហើយ ដែលក្នុងនោះរួមាន  ការបោះឆ្នោតជ្រើសតាំងតំណាងរាស្ត្រ និងការបោះឆ្នោតជ្រើសរើសក្រុមប្រឹក្សាឃុំ សង្កាត់ ដែលគិតចាប់ពីឆ្នាំ១៩៩៨មក គ.ជ.ប បាន រៀបចំ សរុបចំនួន ១១លើក និងការការបោះឆ្នោតអសកល រួមមាន ការបោះឆ្នោតជ្រើសតាំងសមាជិកព្រឹទ្ធសភា និងការបោះឆ្នោតជ្រើសរើសក្រុមប្រឹក្សារាជធានី ក្រុមប្រឹក្សាខេត្ត ក្រុមប្រឹក្សាក្រុង ក្រុមប្រឹក្សាស្រុក ក្រុមប្រឹក្សាខណ្ឌ ដែលគិតចាប់ពីឆ្នាំ១៩៩៨ មក គ.ជ.ប រៀបចំបានសរុបចំនួន ៨លើក ស្របតាមគោលការណ៍នៃលទ្ធិប្រជា ធិបតេយ្យ សេរីពហុបក្ស។ ការថ្លែងបញ្ជាក់របស់ឯកឧត្តមប្រធានគណៈកម្មាធិការជាតិរៀបចំការបោះឆ្នោត បែបនេះ ក្នុងវគ្គផ្សព្វផ្សាយ និងបញ្ជ្រាបការយលដឹង ស្ដីពីសារសំខាន់នៃការបោះឆ្នោតនៅកម្ពុជា ជូនដល់លេខាធិការដ្ឋានរាជធានី ខេត្តរៀបចំការបោះឆ្នោតទាំង២៥ និងនិស្សិតមកពីគ្រឹះស្ថានសិក្សានានាក្នុងរាជធានីភ្នំពេញ ជាច្រើនពាន់នាក់ នាព្រឹកថ្ងៃទី២៧ ខែមីនា ឆ្នាំ២០២៥ នៅវិទ្យាស្ថានបច្ចេកវិទ្យាកម្ពុជា។ 

ឯកឧត្តម ប្រាជ្ញ ចន្ទ បានគូសបញ្ជាក់ថា ការបោះឆ្នោតគឺជាមូលដ្ឋានគ្រឹះនៃលទ្ធិប្រជាធិបតេយ្យ ហើយការបោះឆ្នោតជាយន្តការសម្រាប់ជ្រើសរើសថ្នាក់ដឹកនាំគ្រប់ថ្នាក់រដ្ឋបាលនៃសង្គមប្រជាធិបតេយ្យ ការគ្រប់គ្រងប្រទេសតាមបែបប្រជាធិបតេយ្យ ផ្តល់អំណាចជាធំដល់ប្រជាពលរដ្ឋនៅក្នុងការសម្រេចចិត្តលើកិច្ចការធំៗរបស់ប្រទេសជាតិ តាមរយៈការបោះឆ្នោតជ្រើសរើសតំណាងរបស់ខ្លួន។ ឯកឧត្ដមប្រធាន គ.ជ.ប បានថ្លែងរម្លឹកថា  នៅឆ្នាំ១៩៩៣ អ៊ុនតាក់ (UNTAC) បានរៀបចំការបោះឆ្នោត ដើម្បីជ្រើសតាំងសភាធម្មនុញ្ញ ដោយមានអ្នកបោះឆ្នោតចំនួន ៤ ២៦៧ ១៩២នាក់ នៃចំនួនអ្នកមានឈ្មោះក្នុងបញ្ជីបោះឆ្នោតសរុប ៤ ៧៦៤ ៤៣០នាក់ ស្មើនឹង ៨៩.៥៦% បានចេញទៅបោះឆ្នោត។ ឯកឧត្ដមបន្ដថា ការបោះឆ្នោតនេះមានគណបក្សនយោបាយចូលរួមសរុបចំនួន ២០ គណបក្ស និងជាលទ្ធផល គណបក្សដែលទទួលបានអាសនៈក្នុងសភាធម្មនុញ្ញមានតែ ៤ គណបក្សប៉ុណ្ណោះ គឺគណបក្សហ៊្វុនស៊ិនប៉ិច ទទួលបាន ៥៨ អាសនៈ គណបក្សប្រជាជនកម្ពុជា ទទួលបាន ៥១ អាសនៈ គណបក្សប្រជាធិបតេយ្យសេរីនិយមព្រះពុទ្ធសាសនា ទទួល បាន ១០ អាសនៈ និងគណបក្សម៉ូលីណាកា និងអ្នកតស៊ូខ្មែរដើម្បីសេរីភាព ទទួលបាន ១ អាសនៈ នៃអាសនៈសរុបចំនួន ១២០ អាសនៈ។ ទន្ទឹមនេះ ក្រោយការបោះឆ្នោតជ្រើសតាំងសភាធម្មនុញ្ញឆ្នាំ១៩៩៣ ដែលរៀបចំដោយ “UNTAC” រាជរដ្ឋាភិបាលកម្ពុជាបានប្តេជ្ញាចិត្តនឹងរៀបចំការបោះឆ្នោតជ្រើសតាំងតំណាងរាស្ត្រនីតិកាល ទី២ ដោយកម្ពុជាខ្លួនឯង។

ក្នុងឱកាសនោះដែរ ឯកឧត្តម ប្រធានគណៈកម្មាធិការជាតិរៀបចំការបោះឆ្នោត ក៏បានអំពាវនាវដល់តំណាងគណបក្សនយោបាយ សមាគម អង្គការមិនមែនរដ្ឋាភិបាល អាជ្ញាធរគ្រប់លំដាប់ថ្នាក់ ប្រព័ន្ធផ្សព្វផ្សាយព័ត៌មាន និងភាគីពាក់ព័ន្ធដទៃទៀត ជាពិសេសក្មួយៗនិស្សិតដែលមានវត្តមានក្នុងពេលនេះ មេត្តាជួយផ្សព្វផ្សាយ បន្ត និងជំរុញប្រជាពលរដ្ឋដែលបានចុះឈ្មោះបោះឆ្នោតរួចហើយ ទៅពិនិត្យផ្ទៀងផ្ទាត់ ឈ្មោះ និងទិន្នន័យរបស់ខ្លួនក្នុងបញ្ជីបោះឆ្នោតផ្លូវការឆ្នាំ២០២៤ ដែលមាន បិទផ្សាយនៅតាមសាលាឃុំ សង្កាត់ និងទីប្រជុំជនណាមួយក្នុងឃុំ សង្កាត់ ឬបង្ហោះផ្សាយតាម អាសយដ្ឋានវេប www.voterlist.gov.kh ឬតាមកម្មវិធីទូរសព្ទឆ្លាត (Mobile App) NEC KH ចាប់ពីថ្ងៃទី២០ ខែមេសា ឆ្នាំ២០២៥ ខាងមុខនេះ៕

ដោយ៖ ជឹម ណារី