AKP សៀមរាប ថ្ងៃទី២៦ ខែមីនា ឆ្នាំ២០២៥-- 

សហភាពសហគមន៍កសិកម្មកំពង់ធំតេជៈមានជ័យ បានរៀបចំសន្និបាតប្រចាំឆ្នាំ២០២៤ និងលើកទិសដៅអនុវត្តបន្តឆ្នាំ២០២៥របស់ខ្លួនដែលធ្វើឡើងនៅ ខេត្តសៀមរាប នៅថ្ងៃទី២៦ ខែមីនា ឆ្នាំ២០២៥នេះ ។សកម្មភាពដែលសហគមន៍កសិកម្មសម្រេចបានក្នុងឆ្នាំ២០២៤ ព្រមទាំងផែនការអាជីវកម្ម និងមុខរបររបស់សហគមន៍ មានទិញ-លក់បន្លែសុវត្ថិភាពសម្រាប់ផ្គត់ផ្គង់ទីផ្សារតាមកិច្ចសន្យា លក់ធាតុចូលកសិកម្ម (ជី ថ្នាំ ពូជ អង្ករ) និងការធ្វើឥណទានសាច់ប្រាក់ (ឥណទានកសិកម្ម)។ សម្រាប់ផែនការក្នុងឆ្នាំ២០២៥នេះ សហគមន៍ក៏បានគ្រោងថវិកាបន្តអាជីវកម្មរបស់ខ្លួន និងស្វែងរកដៃគូរទីផ្សារជូនដល់កសិករផងដែរ។

លោក ខោល ម៉ានី ប្រធានការិយាល័យសវនកម្មសហគមន៍កសិកម្មនៃនាយកដ្ឋានអភិវឌ្ឍន៍សហគមន៍កសិកម្មនៃក្រសួងកសិកម្ម រុក្ខាប្រមាញ់ និងនេសាទ បានលើកឡើងថា មហាសន្និបាតនាថ្ងៃនេះមានតម្លៃសម្រាប់កសិករមកពី២៥ សហគមន៍នៃខេត្តសៀមរាប និងខេត្តកំពង់ធំ ដើម្បីបង្ហាញលទ្ធផលការងារលើវិស័យកសិកម្ម ជាពិសេសការអនុវត្តផលិតកម្មកសិកម្ម តាមកិច្ចសន្យាស្ដីពីការផលិត និងផ្គត់ផ្គង់ស្រូវសរីរាង្គ ដែលសម្រេចបានក្នុងឆ្នាំ២០២៤ និងលើកទិសដៅ ផែនការការងារសម្រាប់ឆ្នាំ២០២៥។ ចំពោះមុខរបរសំខាន់ៗរបស់សហគមន៍កសិកម្ម មានមុខរបរ ឥណទានកសិកម្មខ្នាតតូច ទីផ្សារទិញលក់ កសិផលមាន ស្រូវ ដំឡូងមី និងស្វាយចន្ទី ព្រមទាំងមុខរបរសេវាកម្ម ដូចជា៖ ត្រាក់ទ័រភ្ជួរដី ម៉ាស៊ីនច្រូតស្រូវ ម៉ាស៊ីនបោកស្រូវ និងមុខរបរកិនស្រូវ លក់អង្ករ កែច្នៃគ្រាប់ចន្ទី និងមុខរបរផ្គត់ផ្គង់ទឹកស្អាតដល់សមាជិក ជាដើម។

លោកឧកញ៉ា ហង់ សុគន្ធ ប្រធានក្រុមប្រឹក្សាភិបាលនៃសហភាពសហគមន៍កសិកម្មកំពង់ធំតេជៈមានជ័យ បានលើកឡើងថា ការបង្កើតសហភាពសហគមន៍កំពង់ធំតេជៈមានជ័យនេះ ដោយមានការចូលរួមពីសហគមន៍ផលិតស្រូវ ២៥សហគមន៍ ហើយកិច្ចការនេះ បានដំណើរការទៅបានដោយរលូនដែលធ្វើឱ្យសហភាពសហគមន៍ បានបោះជំហាននឹងទៅបង្កើតជាសហភាពស្រូវអង្ករកម្ពុជា។ បច្ចុប្បន្នរាជរដ្ឋាភិបាល និងក្រសួងកសិកម្ម បានបង្កើតសហគមន៍ទំនើប ព្រមទាំងឱ្យមានកសិកម្ម ឃុំ សង្កាត់ ដើមី្បបង្កើនតម្លៃលក់ឱ្យបានខ្ពស់ក្នុងការកាត់បន្ថយថ្លៃដើម ទើបធ្វើឱ្យ សហគមន៍មានការរីកចម្រើន។ ដើមី្បភាពជោគជ័យ យើងត្រូវរួមគ្នាបង្កើតផលិតកម្មរួម ដែលមានការចូលរួមពីសហគ្រាសជាតិ និងអន្តរជាតិជាដៃគូ ព្រមទាំងរួមគ្នាធ្វើ រួមគ្នាគិត  ធ្វើឱ្យសហគមន៍នីមួយៗដំណើរការទៅបានល្អប្រសើរ។

លោកឧកញ៉ាក៏បានជំរុញឱ្យសហភាពសហគមន៍នៃខេត្តទាំងពីរ ត្រូវបន្តពង្រឹងស្មារតីសាមគ្គីភាព ឱ្យបានល្អប្រសើរ ធ្វើយ៉ាងណាសម្រេចឱ្យបាននូវផែនការអាជីវកម្មរបស់ខ្លួនឱ្យរឹងមាំ ប្រកបដោយតម្លាភាព គណនេយ្យភាព និងមានការចូលរួមពីសមាជិកទាំងអស់ ដើម្បីរួមចំណែក ក្នុងការដោះស្រាយបញ្ហាប្រឈមលើផលិតភាព គុណភាព សុវត្ថិភាព និងបញ្ហាទីផ្សារ៕

ដោយ ឃុត សៅ