AKP ភ្នំពេញ ថ្ងៃទី២៦ ខែមីនា ឆ្នាំ២០២៥ -- កងទ័ពជើងទឹកកូរ៉េខាងត្បូងនិងហ្វីលីពីនបាននិយាយកាលពីថ្ងៃអង្គារថា មេបញ្ជាការកងទ័ពជើងទឹកកូរ៉េខាងត្បូង និងហ្វីលីពីនបានពិភាក្សាគ្នានៅឯបញ្ជាការដ្ឋានកងទ័ពជើងទឹកក្នុងប្រទេសកូរ៉េខាងត្បូង ដោយពិភាក្សាអំពីវិធីពង្រឹងកិច្ចសហប្រតិបត្តិការទ្វេភាគីរបស់ពួកគេ។

កងកម្លាំងប្រដាប់អាវុធបាននិយាយថា លោក យ៉ាង យ៉ុងម៉ូ (Yang Yong-mo) និងសមភាគីហ្វីលីពីន លោក ចូសេ ម៉ា អាមប្រូស៊ីអូ កៀតជុន អេហ្សប៉េឡេតា (Jose Ma Ambrosio Quiatchon Ezpeleta) បានជួបពិភាក្សាគ្នានៅទីបញ្ជាការកងកម្លាំងនាវាមុជទឹកក្នុងទីក្រុងជីនហេ មានចម្ងាយប្រហែល ៣១០គីឡូម៉ែត្រភាគអាគ្នេយ៍នៃទីក្រុងសេអ៊ូល។

កិច្ចប្រជុំនេះផ្តោតសំខាន់លើមធ្យោបាយជំរុញការទូតយោធា និងកិច្ចសហប្រតិបត្តិការអាវុធតាមរយៈការផ្លាស់ប្តូរ និងការអប់រំកម្រិតកំពូល។

លោក អេហ្សប៉េឡេតា ក៏បានទៅទស្សនកិច្ចនៅទីបញ្ជាការភស្តុភារកងទ័ពជើងទឹកក្នុងទីក្រុងជីនហេ ដើម្បីពិភាក្សាអំពីវិធីពង្រឹងកិច្ចសហប្រតិបត្តិការដឹកជញ្ជូនរវាងប្រទេសទាំងពីរ និងទស្សនកិច្ចកន្លែងថែទាំសម្ភារៈរបស់កងទ័ពជើងទឹកកូរ៉េខាងត្បូង។

ដំណើរ​ទស្សនកិច្ច​របស់​លោក​ទៅកាន់​ប្រទេស​កូរ៉េ​ខាង​ត្បូង​បាន​ធ្វើ​ឡើង​ក្នុង​ឱកាស​នៃ​ពិធី​ប្រគល់​ និង​សម្ភោធ​នាវាចម្បាំង​ជើងទឹក​ហ្វីលីពីនចំនួន​២​គ្រឿង​ដែល​សាងសង់​ដោយ​ក្រុមហ៊ុន​ផលិត​កប៉ាល់​កូរ៉េខាងត្បូង HD Hyundai Heavy Industries ដែល​គ្រោង​ធ្វើ​នៅ​ថ្ងៃ​ព្រហស្បតិ៍៕

ដោយ៖ មូល មិនា (ប្រភព៖ យ៉ុនហាប់)