AKP ភ្នំពេញ ថ្ងៃទី២៦ ខែមីនា ឆ្នាំ២០២៥ -- រដ្ឋមន្ត្រីការបរទេសអ៊ីរ៉ង់លោក សេយេដ អា​ប់បាស់ អារ៉ាហ្គជី (Seyed Abbas Araghchi) និងសមភាគីតួកគី លោក ហាកាន់ ហ្វីដាន (Hakan Fidan) បានអំពាវនាវឱ្យមានការខិតខំប្រឹងប្រែងបន្ថែមទៀតដោយរដ្ឋមូស្លីម ដើម្បីបញ្ឈប់ការវាយប្រហារជាថ្មីរបស់អ៊ីស្រាអែលប្រឆាំងនឹងតំបន់ហ្គាហ្សា និងប្រទេសលីបង់។

យោងតាម​សេចក្តី​ថ្លែងការណ៍​ចេញ​ផ្សាយ​ដោយ​ក្រសួង​ការ​បរទេស​អ៊ីរ៉ង់ បានឱ្យដឹងថា នៅក្នុងការសន្ទនាតាមទូរស័ព្ទ ភាគីទាំងពីរបានពិភាក្សាអំពីការវិវត្តចុងក្រោយបង្អស់នៅក្នុងតំបន់អាស៊ីខាងលិច ជាពិសេសស្ថានភាពនៅប៉ាឡេស្ទីនអំពីការបន្តការវាយប្រហាររបស់អ៊ីស្រាអែលលើតំបន់ហ្គាហ្សានិងប្រទេសលីបង់ និងការវាយប្រហារតាមអាកាសរបស់សហរដ្ឋអាមេរិកលើប្រទេសយេម៉ែន ក៏ដូចជាបញ្ហាអន្តរជាតិផ្សេងទៀតដែលចាប់អារម្មណ៍រួម។

លោក អារ៉ាហ្គជី បានថ្កោលទោស «ឧក្រិដ្ឋកម្ម និងការឈ្លានពានរបស់អ៊ីស្រាអែលប្រឆាំងនឹងតំបន់ហ្គាហ្សា និងប្រទេសលីបង់» ក្នុងការរំលោភលើកិច្ចព្រមព្រៀងឈប់បាញ់ជាមួយក្រុមហាម៉ាស់ និងក្រុមហេបូឡាហ៍ ដោយអំពាវនាវឱ្យសហគមន៍អន្តរជាតិ ជាពិសេសបណ្តាប្រទេសមូស្លីម និងតំបន់ចាត់វិធានការជាបន្ទាន់ដើម្បីបញ្ឈប់ «ឧក្រិដ្ឋកម្ម» របស់អ៊ីស្រាអែល។

លោក អារ៉ាហ្គជី ក៏បានបរិហារការវាយប្រហារតាមផ្លូវអាកាសរបស់សហរដ្ឋអាមេរិកប្រឆាំងនឹងប្រទេសយេម៉ែន ដោយលោកបានសង្កត់ធ្ងន់លើសារៈសំខាន់នៃកិច្ចសហប្រតិបត្តិការ និងការសម្របសម្រួលបន្ថែមទៀតក្នុងចំណោមបណ្តាប្រទេសក្នុងតំបន់ ដើម្បីទប់ស្កាត់ «ការឈ្លានពានប្រឆាំងនឹងរដ្ឋមូស្លីម និងការកើនឡើងនៃអសន្តិសុខ និងអស្ថិរភាពនៅក្នុងតំបន់អាស៊ីខាងលិច»។

ចំណែកឯលោក ហ្វីដាន បានគូសបញ្ជាក់អំពីសារៈសំខាន់នៃការយកចិត្តទុកដាក់កាន់តែខ្លាំងរបស់រដ្ឋមូស្លីមចំពោះស្ថានភាពរបស់ប្រជាជនប៉ាឡេស្ទីនដែល «ត្រូវគេជិះជាន់»។ លោកបានបង្ហាញពីការត្រៀមខ្លួនរបស់ប្រទេសតួកគីក្នុងការស្វែងរកដំណោះស្រាយការទូតចំពោះបញ្ហាក្នុងតំបន់ និងអន្តរជាតិ៕

ដោយ៖ មូល មិនា (ប្រភព៖ ស៊ីនហួ)