AKP ភ្នំពេញ ថ្ងៃទី២៦ ខែមីនា ឆ្នាំ២០២៥ -- កងទាហានប្រហែល៥.០០០នាក់មកពីកងទ័ពហ្វីលីពីន និងកងទ័ពសហរដ្ឋអាមេរិកប៉ាស៊ីហ្វិក(USARPAC) កាលពីថ្ងៃទី២៤ ខែមីនា បានចាប់ផ្តើមសមយុទ្ធយោធារួមគ្នាមួយដែលមានរយៈពេល ៣សប្តាហ៍ ដោយផ្តោតសំខាន់ទៅលើការការពារទឹកដី និងបញ្ជាឱ្យដាក់ពង្រាយកងកម្លាំងទ្រង់ទ្រាយធំ។

ពួកគេ​ត្រូវ​បាន​គេ​រំពឹង​ថា​នឹង​ចូល​រួម​ក្នុង​ការ​ប្រយុទ្ធ​គ្នា ​និង​ការ​ផ្លាស់​ប្តូរ​ជំនាញ​ក្នុង​ដំណាក់​កាល​ទី​មួយ​នៃសមយុទ្ធ Salaknib នៅក្នុង​ឆ្នាំ​នេះ។ដំណាក់​កាល​ទី​ពីរ​គ្រោង​ធ្វើ​នៅ​ចុង​ឆ្នាំ​នេះ។

សមយុទ្ធនេះនឹងផ្តោតសំខាន់ទៅលើការពង្រឹងប្រតិបត្តិការដែលរួមបញ្ចូលគ្នារវាងកងទ័ពរបស់ប្រទេសទាំងពីរ ជាសមយុទ្ធទ្រង់ទ្រាយធំសមយុទ្ធបាញ់គ្រាប់ពិត និងការការពារទឹកដី។

សមយុទ្ធ Salaknib បានចាប់ផ្តើមនៅក្នុងឆ្នាំ២០១៦ ហើយជាការចូលរួមប្រចាំឆ្នាំរវាងសម្ព័ន្ធមិត្តសន្ធិសញ្ញាទាំងពីរ ដែលជាផ្នែកមួយនៃសមយុទ្ធហ្វឹកហាត់ Balikatan៕

ដោយ៖ យា ចិន្ដាខន្ដី (ប្រភព៖ VNA)