AKP ភ្នំពេញ ថ្ងៃទី២៤ ខែមីនា ឆ្នាំ២០២៥ -- រដ្ឋមន្ត្រីក្រសួងថាមពលរបស់ប៊ុលហ្គារី លោក ហ្សេកូ ស្តេនកូវ (Zhecho Stankov) បាននិយាយនៅលើសារព័ត៌មានណូវ៉ាញូវស៍ (Nova News) ថា ក្នុងរយៈពេលពីរទៅបីសប្តាហ៍ខាងមុខនេះ យើងនឹងចុះហត្ថលេខាលើកិច្ចសន្យាមួយជាមួយក្រុមហ៊ុនស៊ែល(Shell) សម្រាប់ការស្វែងរក និងការរុករកឧស្ម័ននៅក្នុងប្លុកខាន់ធើវែល(Khan Tervel) នៅក្នុងសមុទ្រខ្មៅ បន្ទាប់ពីបានឈ្នះការដេញថ្លៃមួយនេះ។

លោក ស្តេនកូវ បាននិយាយថា នេះគឺជាក្រុមហ៊ុនថាមពលធំជាងគេទី៤ របស់ពិភពលោកដែលនឹងរុករកនៅក្នុងប្លុកនេះ ដោយលោកបាននិយាយបន្ថែមថា លោករំពឹងថានឹងមានលទ្ធផលល្អ។ ការរុករកនៅអណ្តូងឧស្ម័នក្នុងសមុទ្រខ្មៅនេះ គឺជាគម្រោងដ៏សំខាន់មួយដែលរដ្ឋាភិបាលកំពុងយកចិត្តទុកដាក់។

លោក ស្តេនកូវ បាននិយាយថា កាលពីប៉ុន្មានថ្ងៃមុន ក្រុមហ៊ុនNewMed របស់អ៊ីស្រាអែលបានចូលរួមជាមួយក្រុមហ៊ុន OMV Petrom នៅលើទឹកដីនៃប្លុកខាន់អាស្ប៉ារុ (Khan Asparuh) ដែលជាប្លុកធំបំផុតនៅក្នុងសមុទ្រខ្មៅនៅក្នុងតំបន់ឈូងសមុទ្រប៊ុលហ្គារី (កន្លែងដែលការរុករកឧស្ម័នធម្មជាតិ និងប្រេងកំពុងដំណើរការ) ជាកន្លែងដែលក្រុមហ៊ុនទាំងពីរមានសិទ្ធិ ៥០-៥០ ដើម្បីបន្តការរុករកអណ្តូងឧស្ម័ន និងអណ្តូងរ៉ែ។

នៅពេលសួរអំពីការទូទាត់ប្រាក់នៅក្រោមកិច្ចសន្យាជាមួយក្រុមហ៊ុនBotas របស់តួកគី លោក ស្តេនកូវ បាននិយាយថា ប៊ុលហ្គារីបានផ្អាកការទូទាត់ហើយដោយសារតែក្រុមហ៊ុន Bulgargaz មិនមានហិរញ្ញវត្ថុដើម្បីបន្ត។ លោក ស្តេនកូវ បាននិយាយថា «យើងមិនបានទូទាត់ប្រាក់ក្នុងរយៈពេលជិត ៩ខែមកហើយ ដោយយើងមិនមានលទ្ធភាពហិរញ្ញវត្ថុក្នុងការទូទាត់»។ លោកបាននិយាយបន្ថែមថា លោកបានជួបជាមួយឯកអគ្គរដ្ឋទូតតួកគី ហើយលោកបានស្នើសុំជួបជាមួយរដ្ឋមន្ត្រីក្រសួងថាមពលតួកគីហើយរំពឹងថានឹងជួបលោកនៅដើមខែមេសាខាងមុខនេះ៕

ដោយ៖ យា ចិន្ដាខន្ដី (ប្រភព៖ BTA)