AKP ព្រះសីហនុ ថ្ងៃទី២៣ ខែមីនា ឆ្នាំ២០២៥-- 

ឯកឧត្តម ម៉ាង ស៊ីណេត អភិបាលនៃគណៈអភិបាលខេត្តព្រះសីហនុ នាព្រឹកថ្ងៃអាទិត្យ ទី២៣ ខែមីនា ឆ្នាំ២០២៥ បានអញ្ជើញដឹកនាំមន្ត្រី កងកម្លាំងសមត្ថកិច្ចចុះពិនិត្យទីតាំងត្រៀមរៀបចំពិធីសម្ពោធអគារសិក្សា អគារទីចាត់ការ អគារស្នាក់នៅ និងសមិទ្ធផលនានាក្នុងបរិវេណសាលាវិទ្យាល័យ ហ៊ុន សែន វាលរេញ ស្រុកព្រៃនប់ ខេត្តព្រះសីហនុ ដែលជាអំណោយដ៏ថ្លៃថ្លារបស់សម្ដេចអគ្គមហាសេនាបតីតេជោ ហ៊ុន សែន និងសម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ជូនដល់វិស័យអប់រំនៅខេត្តព្រះសីហនុ។  ពិធីសម្ពោធនឹងធ្វើឡើងក្រោមអធិបតីភាពសម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តី នៃព្រះរាជាណាចក្រកម្ពុជា និងលោកជំទាវបណ្ឌិត ពេជ ចន្ទមុនី្ន នៅថ្ងៃទី២៦ ខែមីនា ឆ្នាំ២០២៥ខាងមុខ។

ឯកឧត្តមអភិបាលខេត្តបានធ្វើការសំណេះសំណាលជាមួយលោកនាយកសាលា លោកគ្រូ អ្នកគ្រូសាលាវិទ្យាល័យ ហ៊ុន សែន វាលរេញ ព្រមទាំងបានធ្វើការណែនាំពង្រឹងគុណភាពវិស័យអប់រំដល់សិស្សានុសិស្សរបស់យើង ដោយធ្វើយ៉ាងណាឱ្យការប្រឡងសញ្ញាបត្រមធ្យមសិក្សាទុតិយភូមិឆ្នាំសិក្សា២០២៤-២០២៥ ទទួលលទ្ធផលជាប់ទាំងអស់គ្នា។ ទន្ទឹមនោះយើងត្រូវពង្រឹងគុណភាពនៃវិស័យអប់រំក្នុងការបង្រៀន និងការរៀនរបស់សិស្សរបស់យើង ជាពិសេស គឺការបង្រៀនជាក្រុម (ក្លឹបសិក្សា) ក្នុងការជួយគ្នាទៅវិញទៅមក ដែលជាកិត្តិយសសម្រាប់វិស័យអប់រំក្នុងខេត្តព្រះសីហនុ ដើម្បីឱ្យលទ្ធផលនៃការសិក្សារបស់សិស្សខេត្តព្រះសីហនុ ទទួលបានលទ្ធផលផ្លែផ្កាល្អបន្ថែមទៀតពីមួយឆ្នាំទៅមួយឆ្នាំ។

ក្នុងឱកាសនោះ ឯកឧត្តមអភិបាលខេត្តបានពិនិត្យមើលសិស្សានុសិស្សរៀន Computer និងបានធ្វើការណែនាំដល់លោកគ្រូ IT ត្រូវធ្វើតេស្តិ ឱ្យសិស្សរបស់យើងវាយថាយភីង ដើម្បីស្ទាបស្ទង់ជាទុនក្នុងការរៀបចំធ្វើឯកសារបានលឿន ឆាប់ ព្រោះប្រទេសជាតិមានការអភិវឌ្ឍរីកចម្រើនដែលទាមទារឱ្យយុវជនរបស់យើងមានជំនាញ ពិសេសការអភិវឌ្ឍធនធានមនុស្ស ស្រមតាមគោលនយោបាយបញ្ចកោណ ដំណាក់កាលទី១នៃរដ្ឋសភា៕

ដោយ ងូ សុមុនី