AKP ភ្នំពេញ ថ្ងៃទី០៦ ខែសីហា ឆ្នាំ២០២៦--លោកជំទាវ ពុំ ចន្ទីនី អគ្គលេខាធិការ កាកបាទក្រហមកម្ពុជា នាព្រឹកថ្ងៃព្រហស្បតិ៍ ទី៦ ខែសីហា ឆ្នាំ២០២៦នេះ បានអញ្ជើញប្រគល់សារលិខិតរំលែកទុក្ខ និងថវិកាចំនួន ១០ម៉ឺនដុល្លារអាម៉េរិក ដែលជាវិភាគទានរបស់កាកបាទក្រហមកម្ពុជា ជូនសមាគមកាកបាទក្រហមចិន តាមរយៈ ឯកឧត្តម វ៉ាង វិនពីន (Wang Wenbin) ឯកអគ្គរដ្ឋទូតវិសាមញ្ញ និងពេញសមត្ថភាព នៃសាធារណរដ្ឋប្រជាមានិតចិន ប្រចាំនៅកម្ពុជា។ ពិធីប្រគល់-ទទួលជានិមិត្តរូប បានប្រព្រឹត្តទៅនៅស្ថានទូតចិនប្រចាំនៅកម្ពុជា ឯការផ្ទេរថវិកានឹងដំណើរការទៅតាមនីតិវិធីនៃប្រព័ន្ធធនាគារ។

ក្នុងជំនួបនេះ លោកជំទាវអគ្គលេខាធិការ បាននាំយកនូវប្រសាសន៍របស់ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ដែលសម្តែងនូវសេចក្តីសោកស្តាយយ៉ាងជ្រាលជ្រៅជូនចំពោះបងប្អូនប្រជាជនចិនដែលបានជួបប្រទះនូវគ្រោះមហន្តរាយទឹកជំនន់ បណ្តាលឱ្យខូចខាតទ្រព្យសម្បត្តិយ៉ាងច្រើនសន្ធឹកសន្ទាប់ និងប្រជាជនជិត ៩០ម៉ឺននាក់ ត្រូវបានជម្លៀសចេញ ព្រមទាំងមានបាត់បង់អាយុជីវិត និងរបួសមួយចំនួនទៀត។

ជាមួយគ្នានេះ លោកជំទាវក៏បានថ្លែងអំណរគុណយ៉ាងជ្រាលជ្រៅចំពោះវត្តមានរបស់ ឯកឧត្តមអគ្គរដ្ឋទូតចិន ដែលតែងតែចុះសួរសុខទុក្ខ និងជួយឧបត្ថម្ភស្បៀងអាហារ ព្រមទាំងសម្ភារប្រើប្រាស់ដល់បងប្អូនប្រជាជនភៀសសឹកកម្ពុជានាពេលកន្លងមក។ លោកជំទាវ ក៏បានជម្រាបជូនឯកឧត្តមអគ្គរដ្ឋទូត អំពីវត្តមានរបស់មន្ត្រីកាកបាទក្រហមកម្ពុជា មួយចំនួនដែលបានទៅសិក្សាផ្នែកបច្ចេកវិទ្យាបញ្ញាសិប្បនិម្មិត (AI) នៅប្រទេសចិននាពេលថ្មីៗនេះផងដែរ។

ទន្ទឹមនឹងនេះ លោកជំទាវ បានរំលឹកអំពីជំនួយឧបត្ថម្ភនិងកិច្ចសហប្រតិបត្តិការនាពេលកន្លងមក ជាពិសេសក្នុងដំណាក់កាលនៃការរីករាលដាលជំងឺកូវីដ-១៩ ដែលកាកបាទក្រហមចិនបានផ្តល់ជំនួយជាច្រើនលើកច្រើនសារទាំងផ្នែកសម្ភារ និងស្មារតី។ កាកបាទក្រហមចិន ត្រូវបានចាត់ទុកជា «ដៃគូយុទ្ធសាស្ត្រ» ដ៏សំខាន់ជាមួយកាកបាទក្រហមកម្ពុជា ក្នុងការងារអភិវឌ្ឍន៍សហគមន៍ និងការកសាងភាពធន់។

ក្នុងឱកាសនោះដែរ ឯកឧត្តមអគ្គរដ្ឋទូតចិន បានគូសបញ្ជាក់ថា៖ កម្ពុជា និងចិន ជាបងប្អូនដែលតែងតែ «រួមសុខ រួមទុក្ខ» និងរក្សាបាននូវប្រពៃណីសាមគ្គីភាពដ៏យូរអង្វែង រវាងប្រជាជន និងប្រទេសទាំងពីរ ដោយជួយគ្នាទៅវិញ-ទៅមកនៅពេលមានទុក្ខលំបាក។ ស្ថានទូតចិននឹងបន្តពង្រឹងកិច្ចសហប្រតិបត្តិការ រក្សាប្រពៃណីជួយគ្នាទៅវិញទៅមក និងបំពេញភារកិច្ចក្នុងប្រទេសរៀងៗខ្លួន ដើម្បីស្តារ និងអភិវឌ្ឍន៍ប្រទេសជាតិ។ ជាមួយគ្នានេះ ឯកឧត្តមអគ្គរដ្ឋទូត បានកោតសរសើរចំពោះកាកបាទក្រហមកម្ពុជា ក្នុងការរួមចំណែកលើកកម្ពស់ជីវភាពរស់នៅរបស់ប្រជាពលរដ្ឋ ព្រមទាំងបានស្នើសុំឱ្យកាកបាទក្រហមកម្ពុជា ដឹកនាំប្រតិភូទៅបំពេញទស្សនកិច្ចផ្លូវការនៅសមាគមកាកបាទក្រហមចិន នាពេលវេលាសមស្របណាមួយផងដែរ។

ឯកឧត្តមអគ្គរដ្ឋទូតចិន បានផ្តាំផ្ញើតាមរយៈលោកជំទាវអគ្គលេខាធិការ សូមជួយនាំយកនូវសេចក្តីថ្លែងអំណរគុណយ៉ាងជ្រាលជ្រៅ និងប្រសិទ្ធពរជ័យជូនចំពោះ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា សូមមានសុខភាពល្អបរិបូរណ៍ និងកម្លាំងពលំមាំមួនជានិច្ច ដើម្បីបន្តដឹកនាំកាកបាទក្រហមកម្ពុជា ជាយូរអង្វែងតទៅ៕

ដោយ ពេជ្រ សំអឿន(ប្រភព៖កាកបាទក្រហមកម្ពុជា)