AKP ភ្នំពេញ ថ្ងៃទី២១ ខែមីនា ឆ្នាំ២០២៥ -- រដ្ឋមន្ត្រីការបរទេសន័រវេសលោក អេស្ពេន បឺត អ៊ីដ (Espen Barth Eide) កាលពីថ្ងៃព្រហស្បតិ៍ បានថ្កោលទោសការបន្តកើតមានអរិភាពរបស់អ៊ីស្រាអែលនៅតំបន់ហ្គាហ្សាដោយលោកបានអំពាវនាវឱ្យមានបទឈប់បាញ់ជាបន្ទាន់ និងបន្តការចរចាឡើងវិញដើម្បីស្តារសន្តិភាព។

លោក អ៊ីដ បាននិយាយនៅក្នុងសេចក្តីថ្លែងការណ៍មួយថា «យើងថ្កោលទោសចំពោះការបន្តកើតមានអរិភាពរបស់អ៊ីស្រាអែលនៅតំបន់ហ្គាហ្សា ដែលជាកន្លែងដែលមនុស្សរាប់រយនាក់ត្រូវបានគេរាយការណ៍ថាបានបាត់បង់ជីវិតចាប់តាំងពីថ្ងៃអង្គារ។ កាលពីថ្ងៃពុធ យ៉ាងហោចណាស់បុគ្គលិកអង្គការសហប្រជាជាតិម្នាក់ក៏ត្រូវបានសម្លាប់ និងជាច្រើននាក់ផ្សេងទៀតបានរងរបួសយ៉ាងធ្ងន់ធ្ងរ។ លោកបានបន្ថែមថា «យើងរំលឹកគ្រប់ភាគីនៅក្នុងជម្លោះប្រដាប់អាវុធអំពីកាតព្វកិច្ចរបស់ពួកគេក្នុងការអនុវត្តតាមច្បាប់មនុស្សធម៌អន្តរជាតិ»។

រដ្ឋមន្ត្រីការបរទេស​បាន​រិះគន់​ការសម្រេចចិត្ត​របស់​រដ្ឋាភិបាល​អ៊ីស្រាអែល​ក្នុងការ​បញ្ចប់​បទ​ឈប់​បាញ់ ដោយលោកបាន​និយាយថា វា​ធ្វើឱ្យ​ប៉ះពាល់​ដល់​សន្តិសុខ​ទាំង​អ៊ីស្រាអែល និង​ប៉ាឡេស្ទីន។ លោក​បាន​ជំរុញ​ឱ្យ​ភាគី​ទាំងអស់​គោរព​ច្បាប់​អន្តរជាតិ និង​ធានា​ការ​ចូល​ដំណើរការ​មនុស្សធម៌​ដោយ​គ្មាន​ការ​រារាំង​ទៅ​កាន់​តំបន់​ហ្គាហ្សា។

លោកបាននិយាយថា «ការប្រយុទ្ធត្រូវតែបញ្ឈប់ជាបន្ទាន់។ ការចរចាបទឈប់បាញ់ត្រូវតែបន្ត។ ការចូលទៅធ្វើអំពើមនុស្សធម៌ទៅកាន់តំបន់ហ្គាហ្សានៅតែត្រូវបានធានា។ ច្បាប់អន្តរជាតិត្រូវតែគោរព»៕

ដោយ៖ មូល មិនា (ប្រភព៖ ភីបផលដេលី)