AKP ឡុងដ៍ ថ្ងៃទី២០ ខែមីនា ឆ្នាំ២០២៥--

ឯកឧត្តម ជា សុមេធី រដ្ឋមន្ត្រីក្រសួងសង្គមកិច្ច អតីតយុទ្ធជន និងយុវនីតិសម្បទា បានដឹកនាំគណៈប្រតិភូក្រសួង អញ្ជើញជួបពិភាក្សាការងារជាមួយលោកស្រី Isabelle Trowler CBE ប្រធានបុគ្គលិកសង្គមសម្រាប់កុមារ និងគ្រួសារ នៃក្រសួងអប់រំអង់គ្លេស នៅទីក្រុងឡុងដ៍ នារសៀលថ្ងៃទី១៩ ខែមីនា ឆ្នាំ២០២៥។

ក្នុងឱកាសនៃជំនួបពិភាក្សាការងារនេះ ឯកឧត្តមរដ្ឋមន្ត្រី បានថ្លែងអំណរគុណចំពោះលោកស្រីប្រធាន និងសហការី ដែលបានទទួលស្វាគមន៍យ៉ាងកក់ក្តៅដល់គណៈប្រតិភូ និងការចែករំលែកបទពិសោធន៍ការងារ អំពីការអនុវត្តកម្មវិធីគោលនយោបាយរបស់រដ្ឋាភិបាលអង់គ្លេស សម្រាប់កិច្ចការពារកុមារ និងការថែទាំជំនួសចំពោះកុមារ។

ឯកឧត្តមរដ្ឋមន្ត្រី បានលើកឡើងថា ប្រសិទ្ធភាពនៃការដោះស្រាយបញ្ហាកិច្ចការពារកុមារតម្រូវឱ្យមានការកសាងប្រព័ន្ធ និងយន្តការមួយរឹងមាំដែលមានការចូលរួមពីគ្រប់តួអង្គពាក់ព័ន្ធ។ រាជរដ្ឋាភិបាលកម្ពុជា បានចាត់ទុកកិច្ចគាំពារកុមារ ជាអាទិភាពមួយដែលបានកំណត់នៅក្នុងគោលនយោបាយជាតិនានា ដូចជា ក្របខណ្ឌគោលនយោបាយជាតិគាំពារសង្គម ២០២៤-២០៣៥ គោលនយោបាយជាតិស្តីពីប្រព័ន្ធកិច្ចការពារកុមារ ២០១៩-២០២៩ និងគោលនយោបាយស្តីពីការថែទាំជំនួសចំពោះកុមារឆ្នាំ២០២៤ ជាដើម។ ក្នុងឱកាសនេះដែរ ឯកឧត្តមរដ្ឋមន្ត្រី ក៏បានគូសបញ្ជាក់បន្ថែមអំពីស្ថានភាពការថែទាំជំនួសចំពោះកុមារ ជាពិសេសការលើកកម្ពស់ការថែទាំកុមារនៅតាមគ្រួសារ ខណៈពេលដែលច្បាប់ស្តីពីកិច្ចការពារកុមារ បាននិងកំពុងតាក់តែង។

ក្នុងជំនួបពិភាក្សាការងារនេះ លោកស្រី Isabelle Trowler CBE និងសហការី បានចែករំលែកអំពីស្ថានភាពទូទៅរបស់កុមារដែលត្រូវការកិច្ចការពារ និងផ្តល់ការថែទាំជំនួស ដូចជា កុមារទំនាស់នឹងច្បាប់ កុមារដែលមិនត្រូវបានអើពើ កុមាររងអំពើហិង្សា និងការរំលោភបំពានផ្សេងៗទៀត។ លោកស្រី និងសហការី បានចែករំលែកអំពីកម្មវិធី និងគោលនយោបាយរបស់រដ្ឋាភិបាលអង់គ្លេស ពាក់ព័ន្ធនឹងការបង្ការទប់ស្កាត់ និងឆ្លើយតបទៅនឹងបញ្ហាកិច្ចការពារកុមារ ព្រមទាំងការអនុវត្តកម្មវិធីថែទាំជំនួសចំពោះកុមារ ជាពិសេសការថែទាំនៅក្នុងគ្រួសារធម៌ និងកាត់បន្ថយកន្លែងថែទាំជំនួស។

ជាចុងក្រោយ លោកស្រី បានអបអរសាទរ និងកោតសរសើរចំពោះវឌ្ឍនភាពថ្មីៗពាក់ព័ន្ធនឹងកិច្ចការពារកុមាររបស់កម្ពុជា ជាពិសេសកម្មវិធីឧបត្ថម្ភសាច់ប្រាក់ជូនស្ត្រីមានផ្ទៃពោះ និងកុមារអាយុក្រោម២ឆ្នាំ ព្រមទាំងកម្មវិធីអាហារូបករណ៍សម្រាប់សិស្សក្រីក្រថ្នាក់បឋមសិក្សា និងមធ្យមសិក្សា ដែលកម្មវិធីនេះមិនត្រឹមតែចូលរួមពង្រឹងសេដ្ឋកិច្ចគ្រួសារ លើកកម្ពស់សុខភាពមាតា និងទារក ប៉ុណ្ណោះនោះទេ តែកម្មវិធីនេះក៏ចូលរួមរក្សាកុមារនៅក្នុងគ្រួសារ និងទប់ស្កាត់ការបោះបង់កុមារផងដែរ។

ជាថ្មីម្តងទៀត នៅមុនពេលបញ្ចប់នៃជំនួបពិភាក្សា ឯកឧត្តមរដ្ឋមន្ត្រី ជា សុមេធី បានថ្លែងអំណរគុណ ដល់លោកស្រី Isabelle Trowler CBE និងសហការី ដែលបានចែករំលែកមេរៀនបទពិសោធន៍ពាក់ព័ន្ធនឹងកិច្ចការពារ និងការថែទាំជំនួសចំពោះកុមារ។ មេរៀនបទពិសោធន៍ទាំងនេះ នឹងក្លាយជាមូលដ្ឋានសម្រាប់ក្រសួងសង្គមកិច្ច អតីតយុទ្ធជន និងយុវនីតិសម្បទា យកជាគំរូក្នុងថ្ងៃអនាគត ដើម្បីបង្កើនប្រសិទ្ធភាពបន្ថែមទៀតក្នុងការអនុវត្តកម្មវិធីកិច្ចការពារកុមារ៕

ដោយ AKP