AKP ភ្នំពេញ ថ្ងៃទី២០ ខែមីនា ឆ្នាំ២០២៥ -- មជ្ឈមណ្ឌល​បោកប្រាស់នៅតាម​បណ្តោយ​ព្រំដែន​ថៃ​-​មី​យ៉ាន់​ម៉ា​នៅតែ​ដំណើរការ​ដោយមាន​មនុស្ស​រហូតដល់ទៅ ​១០០.០០០​នាក់កំពុងបន្ត​ធ្វើការងារ​នៅ​ទីនោះ​។​ នេះបើយោងតាមការរាយការណ៍របស់អគ្គស្នងការនគរបាលកំពូល​ដែល​ដឹកនាំ​ប្រតិបត្តិការ​របស់​ប្រទេស​ថៃ​ប្រឆាំង​នឹង​សមាសធាតុ​ក្លែងបន្លំ​។

លោកឧត្តមសេនីយ៍ ថាតឆៃ ពីតានីឡាប៊ុត (Thatchai Pitaneelaboot) អគ្គអធិការនគរបាលភូមិន្ទថៃបាននិយាយថា ផ្អែកទៅលើការវាយតម្លៃដំបូងរបស់មនុស្សចំនួន ៥.០០០នាក់ដែលត្រូវបានជួយសង្គ្រោះពីមជ្ឈមណ្ឌលបោកប្រាស់នៅក្នុងតំបន់មីយ៉ាវ៉ាដឌី បានឱ្យដឹងថា មានមនុស្សរាប់រយនាក់បានទៅធ្វើការងារនៅទីនោះដោយស្ម័គ្រចិត្ត។

លោក​បាន​អំពាវនាវឱ្យ​មាន​ការ​ស៊ើបអង្កេត​យ៉ាង​យក​ចិត្ត​ទុក​ដាក់​ក្នុង​ចំណោម​ជន​ជាតិ​នៃ​ប្រទេស​ជាច្រើន​ដើម្បី​កម្ចាត់​ឧក្រិដ្ឋជន។ លោកឧត្តមសេនីយ៍ ថាតឆៃ បាននិយាយថា មនុស្សជាច្រើនបានប្រើប្រាស់ប្រទេសថៃជាផ្លូវមួយដើម្បីលួចចូលទៅក្នុងតំបន់មីយ៉ាវ៉ាដឌី ដើម្បីស្វែងរកការងារ ហើយនេះមិនមែនគ្រាន់តែជាក្រុមជនខិលខូចបោកប្រាស់តាមទូរសព្ទប៉ុណ្ណោះទេ ប៉ុន្តែថែមទាំងការងារល្បែងតាមអនឡាញ និងការងារផ្សេងៗទៀតផងដែរ។

យោងតាមអង្គការសហប្រជាជាតិបានឱ្យដឹងថា ប្រទេសថៃកំពុងប្រឈមមុខនឹងកិច្ចខិតខំប្រឹងប្រែងក្នុងតំបន់ដើម្បីកម្ចាត់មជ្ឈមណ្ឌលបោកប្រាស់នៅតាមបណ្តោយព្រំដែនរបស់ខ្លួន ដែលជាផ្នែកមួយនៃបណ្តាញអាស៊ីអាគ្នេយ៍នៃកន្លែងខុសច្បាប់ដែលរកប្រាក់បានរាប់ពាន់លានដុល្លារអាម៉េរិកជារៀងរាល់ឆ្នាំ ដែលជារឿយៗបានប្រើប្រាស់មនុស្សដែលត្រូវបានជួញដូរដោយក្រុមឧក្រិដ្ឋជន។

ចាប់តាំងពីខែកុម្ភៈមក មនុស្សជាង ៥.២០០នាក់ត្រូវបានសង្រ្គោះចេញពីកន្លែងបោកប្រាស់នៅក្នុង និងជុំវិញតំបន់មីយ៉ាវ៉ាដឌី។ នេះបើយោងតាមនគរបាលភូមិន្ទថៃដែលដកស្រង់សម្តីអាជ្ញាធរមីយ៉ាន់ម៉ា។ កាសែតបាងកកប៉ុស្តិ៍បានរាយការណ៍ថា មនុស្សជាង ៣.៥០០នាក់ត្រូវបានបញ្ជូនត្រឡប់ទៅកាន់ប្រទេសកំណើតរបស់ពួកគេវិញតាមរយៈប្រទេសថៃ ហើយក៏បានកាត់ផ្តាច់ការផ្គត់ផ្គង់អគ្គិសនី ប្រព័ន្ធអ៊ីនធឺណិត និងប្រេងឥន្ធនៈទៅកាន់តំបន់នោះផងដែរ៕

ដោយ៖ យា ចិន្ដាខន្ដី (ប្រភព៖ VNA)