AKP ភ្នំពេញ ថ្ងៃទី១៩ ខែមីនា ឆ្នាំ២០២៥ -- យោងតាមការស្ទង់មតិដែលធ្វើឡើងដោយក្រុមហ៊ុន Gallup & Gilani Pakistan បានឱ្យដឹងថា ៤៤% នៃប្រជាជនប៉ាគីស្ថានជឿថាទំនាក់ទំនងពាណិជ្ជកម្មជាមួយប្រទេសឥណ្ឌាគួរតែត្រូវបានអនុញ្ញាត។

ការស្ទង់មតិដោយផ្អែកលើគំរូតំណាងជាតិចំពោះបុរស និងស្ត្រីពេញវ័យនៅទូទាំងប្រទេសបានសួរថា «មនុស្សមួយចំនួនជឿថាការធ្វើពាណិជ្ជកម្មជាមួយប្រទេសឥណ្ឌាគួរតែត្រូវបានអនុញ្ញាត ខណៈពេលដែលអ្នកផ្សេងទៀតប្រឆាំងនឹងគំនិតនេះ។ តើ​លោក​យល់​យ៉ាង​ណា​ចំពោះ​បញ្ហា​នេះ?»។

ក្រុមហ៊ុន Gallup & Gilani Pakistan បាននិយាយនៅលើគេហទំព័រផ្លូវការរបស់ថាជាការឆ្លើយតប ប្រជាជន ៤៤% បាននិយាយថា ពាណិជ្ជកម្មគួរតែត្រូវបានអនុញ្ញាត ២៨% ប្រឆាំងនឹងវាខណៈដែល ២៦% បាននិយាយថា ពួកគេមិនដឹង ហើយ ២% មិនឆ្លើយតប។

ទំនាក់ទំនងពាណិជ្ជកម្មផ្លូវការរវាងប្រទេសទាំងពីរត្រូវបានផ្អាកនៅក្នុងខែសីហា ឆ្នាំ២០១៩ បន្ទាប់ពីប្រទេសប៉ាគីស្ថានបានផ្អាកទំនាក់ទំនងដោយសារការដកហូតឋានៈពិសេសរបស់ប្រទេសឥណ្ឌានៅតំបន់កាស្មៀរដែលគ្រប់គ្រងដោយប្រទេសឥណ្ឌា ហើយទំហំពាណិជ្ជកម្មបានធ្លាក់ចុះយ៉ាងខ្លាំងចាប់តាំងពីពេលនោះមក។

ប្រភពក្រសួងពាណិជ្ជកម្មប៉ាគីស្ថានបានប្រាប់សារព័ត៌មានស៊ីនហួថា ទោះបីជាមានការរឹតបន្តឹងជាផ្លូវការក៏ដោយ ពាណិជ្ជកម្មដែលមានកម្រិតនៅតែបន្តតាមរយៈបណ្តាញដោយប្រយោល ហើយទំនិញត្រូវបានផ្លាស់ប្តូរតាមរយៈប្រទេសទីបីដូចជាប្រទេសអេមីរ៉ាត់អារ៉ាប់រួម៕

ដោយ៖ មូល មិនា (ប្រភព៖ ស៊ីនហួ)