AKP ភ្នំពេញ ថ្ងៃទី២៨ ខែមីនា ឆ្នាំ២០២៥–សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានថ្លែងថា ការកែទម្រងវិមជ្ឈការ វិសហមជ្ឈការ ក្នុងរយៈពេលជាង២ទសវត្សរ៍កន្លងមកនេះ បានធ្វើឱ្យរដ្ឋបាលថ្នាក់ក្រោមជាតិ គ្រប់លំដាប់ថ្នាក់ក្លាយជាសា្ថប័នសាធារណៈ មានរចនាសម្ព័ន្ធ ប្រព័ន្ធអភិបាលកិច្ច មានមុខងារ ធនធាន ការទទួលខុសត្រូវកាន់តែច្បាស់ និងភាពម្ចាស់ការក្នុងការផ្តល់សេវាធារណៈ ។

តាមរយៈការអនុវត្តគោលនយោបាយ នៃការកែទម្រង់វិមជ្ឈការ និងវិសហមជ្ឈការ នៅក្នុងរយៈពេលជាង២ទសវត្ស​រ៍កន្លងមកនេះ ទទ្ទឹមនឹងការកសាងបាន នូវក្របខណ្ឌគតិយុត្ត រចនាសម្ព័ន្ធស្ថាប័ន ក៏ដូចជាការពង្រឹងសមត្ថភាព រដ្ឋបាលថ្នាក់ក្រោមជាតិទាំង៣កម្រិត សម្តេចធិបតី កត់សម្គាល់នូវសមិទ្ធផលសំខាន់ៗចំនួន៣ រួមមាន៖ ទី១ ការពង្រឹងនិងពង្រីកលទ្ធិប្រជាធិបតេយ្យ និងអភិបាលកិច្ចនៅមូលដ្ឋាន, ទី២ ការលើកកម្ពស់ការផ្តល់សេវាសាធារណៈ និងការអភិវឌ្ឍសេដ្ឋកិច្ចមូលដ្ឋាន និងទី៣ ការចូលរួមកាត់បន្ថយភាពក្រីក្រដោយផ្ទាល់នៅមូលដ្ឋាន ។

ក្នុងឱកាសថ្លែងបើកវេទិកា រវាងរាជរដ្ឋាភិបាល និងរដ្ឋបាលថ្នាក់ក្រោមជាតិស្តីពី "កំណែទម្រង់វិមជ្ឈការ និងវិសហមជ្ឈការ ដើម្បីចូលរួមសម្រេចបាន​ ចក្ខុវិស័យកម្ពុជាឆ្នាំ២០៥០" នាព្រឹកថ្ងៃទី១៨ ខែមីនា ឆ្នាំ២០២៥ នៅសណ្ឋាគារសុខាភ្នំពេញ សម្តេចធិបតី ហ៊ុន ម៉ាណែត ចាត់ទុកសមិទ្ធផលទី២ គឺជាសមិទ្ធផលគន្លឹះពាក់ព័ន្ធ នឹងការលើកកម្ពស់ គុណភាព និងបរិមាណនៃការផ្តល់សេវាសាធារណៈ ជូនប្រជាពលរដ្ឋ តាមគោលការណ៍ នៃការបង្ខិតសេវា ឱ្យទៅគៀកជិតប្រជាពលរដ្ឋ ។

សម្តេចធិបតី បានថ្លែងថា សមិទ្ធផលទី២ គឺការលើកកម្ពស់ការផ្តល់សេវាសាធារណៈ និងការអភិវឌ្ឍសេដ្ឋកិច្ចមូលដ្ឋាន ​​។ ក្នុងគោលបំណងចម្បងនៃការធ្វើកែទម្រង វិមជ្ឈការ និងវិសហមជ្ឈការ គឺការលើកកម្ពស់គុណភាព និងប្រសិទ្ធភាពនៃការផ្តល់សេវាសាធារណៈ និងការបែងចែកផលប្រយោជន៍ និងការអភិវឌ្ឍ​ប្រកបដោយបរិយាបន្ន ចីរភាព និងសមធម៌ ដើម្បីសម្រេចបាននូវគោលបំណងដ៏ពិសិទ្ធនេះ ការកែទម្រងបានផ្តោតលើការរៀបចំឡើងវិញ នូវរចនាសម្ព័ន្ធ ប្រព័ន្ធគ្រប់គ្រងនូវរដ្ឋបាលថ្នាក់ក្រោមជាតិ ការផ្ទេរមុខងារ ធនធាន និងការទទួលខុសត្រូ​វ​ ទៅឱ្យរដ្ឋបាលថ្នាក់ក្រោមជាតិ ក្នុងគោលបំណងបង្ខិតសេវា ​ឱ្យទៅគៀកជិតប្រជាពលរដ្ឋ សំដៅបង្កលក្ខណៈងាយស្រួល ឱ្យប្រជាពលរដ្ឋ ទទួលបានសេវាឆា​ប់រហ័ស តម្លាភាព ប្រសិទ្ធភាព និងគណនេយ្យភាព នៅតាមមូលដ្ឋាន ។

បន្ថែមលើនេះ សម្តេចធិបតី បានគូសបញ្ជាក់ថា ផ្អែកលើបទពិសោធន៍​​ នៃបណ្តាប្រទេស​នានា ការកែទម្រងវិមជ្ឈការ ហើយនិងវិសហមជ្ឈការ គឺជាកិច្ចការដ៏លំបាក និងមានភាពស្មុកស្មាញខ្លាំង ជាពិសេស ការផ្ទេរមុខងារ និងធនធាន ពីក្រសួងស្ថាប័នទៅឱ្យរដ្ឋបាលថ្នាក់ក្រោមជាតិ គឺជាកិច្ចការមានភាពរសើប ទោះជាយ៉ាងនេះក្តី ការកែទម្រងពិតជាមានសារៈសំខាន់ ក្នុងការកសាងភាពធននៅមូលដ្ឋាន ក្នុងការឆ្លើយតប និងដោះស្រាយបញ្ហាបានឆាប់រហ័ស មានប្រសិទ្ធភាព និងចំបញ្ហា ដែលជាតម្រូវ និងជាអាទិភាព របស់ប្រជាពលរដ្ឋ នៅតាមមូលដ្ឋាន ។

ជាមួយគ្នានេះ សម្តេចធិបតី លើកឡើងថា នៅពេលកន្លងមក រាជរដ្ឋាភិបាល បានរៀបចំ និងអនុវត្តគោលនយោបាយ ការកែទម្រងនេះ ផ្អែកតាមស្ថានភាពនយោបាយ សេដ្ឋកិច្ចសង្គមកិច្ច និងវប្បធម៌ជាក់ស្តែងរបស់កម្ពុជា ដោយមានការប្រុងប្រយ័ត្ន ការពិគ្រោះយោបល់ ការឯកភាព ស្រុះស្រួលគ្នា មានមូលដ្ឋានច្បាប់ មានផែនការសម្រាប់ធ្វើ ជាផែនទីបង្ហាញផ្លូវ តាមដំណាក់កាលនីមួយៗច្បាស់លាស់ ដោយប្រកាន់ភ្ជាប់នូវអភិក្រម ធ្វើផង រៀនសូត្រ ដកស្រង់បទពិសោធន៍ផង និងការកែលម្អផង ជាអាទិ៍ កម្មវិធីជាតិ សម្រាប់ការអភិវឌ្ឍតាមបែបប្រជាធិបតេយ្យ នៅថ្នាក់ក្រោមជាតិ រយៈពេល១០ឆ្នាំ ដំណាក់កាលទី១ ដែលយើងបានអនុវត្តពីឆ្នាំ២០១០ បញ្ចប់ឆ្នាំ២០២០ កម្មវិធីជាតិរយៈពេល១០ឆ្នាំ នៃដំណាក់កាលទី១ ដែលយើងចាប់ផ្តើមអនុវត្តពីឆ្នាំ២០២១ និងត្រូវ​បញ្ចប់នៅឆ្នាំ២០៣០ខាងមុខ ។

ក្នុងនោះសម្តេចធិបតី ហ៊ុន ម៉ាណែត មានប្រសាសន៍ថា "ផ្តើមចេញពីការប្តេជ្ញាចិត្ត និងការប្រកាន់ខ្ជាប់នូវវិធីសាស្ត្រ អនុវត្តប្រកបដោយភាពបតបែនទន់ភ្លន់តែម៉ឺងម៉ាត់​ របស់រាជរដ្ឋាភិបាល ដោយមានការគាំទ្រការចូលរួម​ ពីក្រសួងស្ថាប័នដៃគូអភិវឌ្ឍ​ អង្គការសង្គមស៊ីវិល វិស័យឯកជន និងប្រជាពលរដ្ឋ ក្នុងការអភិវឌ្ឍការកែទម្រងវិមជ្ឈការ វិសហមជ្ឈការ ក្នុងរយៈពេលជាង២ទសវត្សរ៍កន្លងមកនេះ បានធ្វើឱ្យរដ្ឋបាលថ្នាក់ក្រោមជាតិ គ្រប់លំដាប់ថ្នាក់ក្លាយជាសា្ថប័នសាធារណៈមានរចនាសម្ព័ន្ធ ប្រព័ន្ធអភិបាលកិច្ច មានមុខងារធនធាន ការទទួលខុសត្រូវកាន់តែច្បាស់ និងភាពធន់ ភាពម្ចាស់ការក្នុងការផ្តល់សេវាធារណៈ ការអភិវឌ្ឍមូលដ្ឋាន ឆ្លើយតបទៅនឹងតម្រូវការរបស់ប្រជាពលរដ្ឋ ដោះស្រាយបញ្ហាលំបាក នៅតាមមូលដ្ឋានបានទាន់ពេល និងប្រកបដោយប្រសិទ្ធភាព តម្លាភាព គណនេយ្យភាព បរិយាបន្ន ចីរភាព និងសមធម៌"៕
ដោយ៖ គង់ សិរីរ័ត្ន, រូបថត៖ គល់ រ៉េននី