AKP ភ្នំពេញ ថ្ងៃទី១៧ ខែមីនា ឆ្នាំ២០២៥ -- យោធាអ៊ីស្រាអែលបាននិយាយថា ខ្លួនបានធ្វើការវាយប្រហារដោយយន្តហោះគ្មានមនុស្សបើកកាលពីព្រឹកថ្ងៃអាទិត្យនៅភាគខាងត្បូង ប្រទេសលីបង់ ដោយបានសម្លាប់យុទ្ធជនហេសបូឡាហ៍យ៉ាងហោចណាស់ ២នាក់។

យោធាបាននិយាយនៅក្នុងសេចក្តីថ្លែងការណ៍មួយថា ការវាយប្រហារសំដៅទៅលើអ្នកទាំងពីរនៅក្នុងទីប្រជុំជនតំបន់ Yater ។ យោងតាមសេចក្តីថ្លែងការណ៍បានឱ្យដឹងថា ពួកគេគឺជា                 «អ្នកឃ្លាំមើល» ដែលពាក់ព័ន្ធនឹងការដឹកនាំការវាយប្រហារនៅតំបន់ Yater និងតំបន់ Meiss El Jabal នៅភាគខាងត្បូងប្រទេសលីបង់។

រូបភាព​ដែល​ផ្សព្វផ្សាយ​ដោយ​ប្រព័ន្ធ​ផ្សព្វផ្សាយ​លីបង់​ បាន​បង្ហាញ​ថា ​រថយន្ត​មួយ​គ្រឿង​បាន​ឆេះ​ទាំង​ស្រុង។ ទីភ្នាក់ងារ​ព័ត៌មាន​ជាតិ​លីបង់ ​បាន​រាយការណ៍​ថា សាកសព​ម្នាក់​និង​អ្នក​របួស​ត្រូវ​បាន​គេ​រក​ឃើញ​ពី​រថយន្ត។ ទីភ្នាក់ងារនេះ បានរាយការណ៍ថា នៅក្នុងការវាយប្រហារមុនពេលព្រឹកព្រលឹម យន្តហោះគ្មានមនុស្សបើកបានបាញ់មីស៊ីលតម្រង់ទៅរថយន្តមួយនៅលើផ្លូវទៅកាន់តំបន់ Yater ក្នុងសង្កាត់ប៊ីនចេប៊ែល។

នេះគឺជាការវាយប្រហារចុងក្រោយបង្អស់របស់អ៊ីស្រាអែលនៅក្នុងការវាយប្រហារជាបន្តបន្ទាប់ដែលធ្វើឡើង ចាប់តាំងពីកិច្ចព្រមព្រៀងបទឈប់បាញ់ដ៏ផុយស្រួយត្រូវបានចុះហត្ថលេខាក្នុងខែវិច្ឆិកា បន្ទាប់ពីការប្រយុទ្ធគ្នាឆ្លងព្រំដែនរយៈពេល ១៤ខែរវាងអ៊ីស្រាអែល និងក្រុមហេសបូឡាហ៍៕

ដោយ៖ មូល មិនា (ប្រភព៖ ស៊ីនហួ)