AKP ឧត្តរមានជ័យ ថ្ងៃទី១៦ ខែមីនា ឆ្នាំ២០២៤ -- ឯកឧត្តម ប៊ុន ហ៊ាន រដ្ឋលេខាធិការក្រសួងធនធានទឹក និងឧតុនិយម និងជាប្រធានអង្គភាពត្រួតពិនិត្យគម្រោងក្រសួងធនធានទឹក និងឧតុនិយម  បានដឹកនាំក្រុមការងាររបស់អង្គភាព មន្ត្រីបច្ចេកទេសនាយកដ្ឋានវិស្វកម្ម សហការជាមួយលោកប្រធានមន្ទីរធនធានទឹក និងឧតុនិយមខេត្តឧត្តរមានជ័យ ចុះពិនិត្យគម្រោងជួសជុលទំនប់អាងទឹកកណ្តែក ស្ថិតក្នុងសង្កាត់កូនគ្រៀល ក្រុងសំរោង និងគម្រោងជួសជុលទំនប់អាងទឹកថ្មី ស្ថិតក្នុងឃុំត្រពាំងតាវ ស្រុកអន្លង់វែង ខេត្តឧត្តរមានជ័យ កាលពីថ្ងៃសៅរ៍ ២រោច ខែផល្គុន ឆ្នាំរោង ឆស័ក ព.ស.២៥៦៨ ត្រូវនឹងថ្ងៃទី១៥ ខែមីនា ឆ្នាំ២០២៥។
គម្រោងជួសជុលទំនប់អាងទឹកថ្មីនេះ មានការងារសំខាន់ៗដូចជា ជួសជុលទំនប់ ១ខ្សែប្រវែង ២.០០០ម៉ែត្រ សាងសង់សំណង់ជើងទេរបេតុងប្រវែង ៤០០ម៉ែត្រ សាងសង់សំណង់ទ្វារទឹក (ទ្វារ៣) ចំនួន ១កន្លែង និងសាងសង់សំណង់ធ្នឹមក្រវាត់ថ្មក្រោយសំណង់បង្ហៀរប្រវែង ១៥៥ម៉ែត្រ ដោយគិតមកដល់ពេលនេះ វឌ្ឍនភាពការងារសម្រេចបានប្រមាណ ៣០%។ ចំណែកគម្រោងជួសជុលទំនប់អាងទឹកកណ្តែក មានការងារសំខាន់ៗដូចជា ជួសជុលទំនប់ ១ខ្សែប្រវែង ៣.២០០ម៉ែត្រ សាងសង់សំណង់ទ្វារទឹក (ទ្វារ២) ចំនួន ២កន្លែង និងសាងសង់សំណង់បង្ហៀរប្រវែង ៣៩ម៉ែត្រចំនួន ១កន្លែង ដោយគិតមកដល់ពេលនេះ លទ្ធផលសម្រេចបានប្រមាណ ២៥%។

ឯកឧត្តមរដ្ឋលេខាធិការបានបញ្ជាក់ឱ្យដឹងថា គម្រោងជួសជុលទំនប់អាងទឹកទាំងពីរនេះ គឺដើម្បីបង្កើនបរិមាណស្តុកទឹក និងប្រមូលទឹកដែលហូរធ្លាក់ពីតំបន់ជួរភ្នំនានា និងមួយផ្នែកទៀតពីផ្ទៃរងទឹកភ្លៀងក្នុងតំបន់នៅរដូវវស្សា មកស្តុកទុកសម្រាប់ធានាដល់ការប្រើប្រាស់ប្រចាំថ្ងៃ និងការងារស្រោចស្រពលើផ្ទៃដីបង្កបង្កើនផលដំណាំកសិកម្ម ព្រមទាំងខ្នងទំនប់ជាផ្លូវគមនាគមន៍សម្រាប់ធ្វើដំណើរក្នុងមូលដ្ឋាន និងជាតំបន់រក្សា និងការពារធនធានធម្មជាតិក្នុងមូលដ្ឋានផងដែរ។

ក្នុងឱកាសនោះ ឯកឧត្តមរដ្ឋលេខាធិការ បានផ្តាំផ្ញើដល់ក្រុមការងារអនុវត្តគម្រោងនាយកដ្ឋានវិស្វកម្ម ត្រូវបន្តយកចិត្តទុកដាក់លើការងារជួសជុលទំនប់ និងការងារសាងសង់សំណង់បេតុងឱ្យមានគុណភាព សោភ័ណភាព និងត្រឹមត្រូវតាមលក្ខណៈបច្ចេកទេស និងបានណែនាំដល់មន្ទីរធនធានទឹក និងឧតុនិយម ធ្វើការគ្រប់គ្រងសមិទ្ធផលទាំងនេះឱ្យមានសុវត្ថិភាព និងប្រើប្រាស់ឱ្យបានត្រឹមត្រូវ ជាពិសេសជំរុញសហគមន៍កសិករប្រើប្រាស់ទឹក និងអាជ្ញាធរដែនដី ចុះផ្សព្វផ្សាយការប្រើប្រាស់ប្រព័ន្ធធារាសាស្ត្រនេះឱ្យមាននិរន្តរភាព សម្រាប់ការងារស្រោចស្រព និងការប្រើប្រាស់ប្រចាំថ្ងៃជូនប្រជាពលរដ្ឋបានយូរអង្វែង។

សូមបញ្ជាក់ថា ក្រោយបញ្ចប់ការងារគម្រោងជួសជុល ទំនប់អាងទឹកថ្មីមានលទ្ធភាពស្រោចស្រពលើផ្ទៃដីបង្កបង្កើនផលកសិកម្មស្រូវវស្សាចំនួន ១.៤៩២ហិកតា ស្រូវប្រាំងលើកទីមួយចំនួន ២៧៩ហិកតា ស្រូវប្រាំងលើកទីពីរចំនួន ២៧៩ហិកតា និងដំណាំរួមផ្សំចំនួន ៧៨ហិកតា ជូនប្រជាពលរដ្ឋប្រមាណ ៤១៨គ្រួសារ ក្នុងភូមិចំនួន២ នៃឃុំត្រពាំងតាវ ស្រុកអន្លង់វែង។ ទន្ទឹមនឹងនេះដែរ គម្រោងជួសជុលទំនប់អាងទឹកកណ្តែក មានលទ្ធភាពស្រោចស្រពលើផ្ទៃដីបង្កបង្កើនផលកសិកម្មស្រូវវស្សាចំនួន ៦៨១ហិកតា ស្រូវប្រាំងលើកទីមួយចំនួន ១១៥ហិកតា និងដំណាំរួមផ្សំចំនួន ៣០ហិកតា ជូនប្រជាពលរដ្ឋប្រមាណ ១.០៧៤គ្រួសារ ក្នុងភូមិចំនួន៤ នៃសង្កាត់កូនគ្រៀល ក្រុងសំរោង ខេត្តឧត្តរមានជ័យ៕

ដោយ៖ ពេជ្រ សំអឿន (ប្រភព៖ ក្រសួងធនធានទឹក និងឧតុនិយម)