AKP កំពង់ធំ ថ្ងៃទី១៦ ខែមីនា ឆ្នាំ២០២៤ -- ប្រជាការពារ គឺជាកម្លាំងស្នូលក្នុងការថែរក្សាសន្តិសុខសណ្ដាប់ធ្នាប់ក្នុងមូលដ្ឋានប្រកបដោយភាពស្និទ្ធស្នាល និងសុវត្ថិភាព។ នេះជាការលើកឡើងរបស់ ឯកឧត្តម តែ ណាវុធ អនុប្រធានអចិន្រ្តៃយ៍គណ:កម្មការជាតិទន្លេមេង្គ និងជាប្រធានក្រុមការងារចុះមូលដ្ឋានឃុំចំណាក្រោម ស្រុកស្ទោង ខេត្តកំពង់ធំ ក្នុងឱកាសដែលឯកឧត្តម និងលោក សាយ គឹមឡម អភិបាលស្រុកស្ទោង ព្រមទាំងសហការី អញ្ជើញជួបសំណេះសំណាលសួរសុខទុក្ខ និងប្រគល់ឯកសណ្ឋានជូនប្រជាការពារនៅឃុំចំណាក្រោម ស្រុកស្ទោង ខេត្តកំពង់ធំ នាព្រឹកថ្ងៃទី១៦ ខែមីនា ឆ្នាំ២០២៥ នេះ។
ក្នុងឱកាសនោះ ឯកឧត្តម តែ ណាវុធ បានពាំនាំនូវប្រសាសន៍ផ្ដាំផ្ញើសួរសុខទុក្ខពីសំណាក់ឯកឧត្តម ថោ ជេដ្ឋា រដ្ឋមន្ត្រីក្រសួងធនធានទឹក និងឧតុនិយម និងជាប្រធានក្រុមការងារចុះមូលដ្ឋានស្រុកស្ទោង ដែលឯកឧត្តមតែងតែនឹករលឹក គិតគូរ និងយកចិត្តទុកដាក់ខ្ពស់ដល់សុខទុក្ខ និងសុខុមាលភាពពុកម៉ែបងប្អូនប្រជាពលរដ្ឋក្នុងស្រុកស្ទោងគ្រប់ពេលវេលា និងបានចូលរួមអភិវឌ្ឍន៍ស្រុកស្ទោងនូវហេដ្ឋារចនាសម្ព័ន្ធនានាស្អេកស្កះ ជាពិសេសប្រព័ន្ធធារាសាស្រ្តខ្វាត់ខ្វែងដែលជាផ្នែកមួយក្នុងការលើកកម្ពស់សេដ្ឋកិច្ចប្រជាពលរដ្ឋក្នុងមូលដ្ឋាន និងសេដ្ឋកិច្ចជាតិ។

ឯកឧត្តមបានបន្តថា ប្រជាការពារពិតជាបានរួមចំណែកយ៉ាងធំធេងបំផុតក្នុងការរក្សាសន្តិសុខសណ្តាប់ធ្នាប់សាធារណៈ ក៏ដូចជារក្សានូវសុខសន្តិភាពដោយមានការលះបង់ខ្ពស់បំផុតមិនខ្លាចនឿយហត់ មិនថាយប់ថ្ងៃ ជាពិសេសពុំមានប្រាក់កម្រៃ ឬប្រាក់ឧបត្ថម្ភនោះទេ និងជាអ្នកដែលនៅជិតផ្ទាល់ជាមួយប្រជាពលរដ្ឋក្នុងមូលដ្ឋាន ឬស្ថានភាពជាក់ស្ដែងណាមួយ និងជាអ្នកជួយដល់កងកម្លាំងប៉ុស្តិ៍នគរបាលរដ្ឋបាលបានទាន់ពេលវេលាប្រកបដោយផ្លែផ្កាគួរជាទីមោទន:។

ក្នុងឱកាសនោះដែរ លោក សាយ គឹមឡម អភិបាលស្រុកស្ទោង ក៍បានថ្លែងអំណរគុណដល់ ឯកឧត្តមថោ ជេដ្ឋា រដ្ឋមន្ត្រីក្រសួងធនធានទឹក និងឧតុនិយម និងសហការី ដែលតែងតែគិតគូរយកចិត្តទុកដាក់ដល់ប្រជាពលរដ្ឋនៅក្នុងស្រុកស្ទោង ជាពិសេសកោតសរសើរដល់អាជ្ញាធរមូលដ្ឋាន កងកម្លាំងប៉ុស្តិ៍នគរបាលរដ្ឋបាល និងប្រជាការពារ ដែលតែងតែចូលរួមចំណែកយ៉ាងធំធេងក្នុងការរក្សាសន្តិសុខ ប្រកបដោយសុវត្ថិភាពជូនប្រជាពលរដ្ឋនៅក្នុងមូលដ្ឋាន។

លោក សាយ គឹមឡម បានណែនាំដល់រដ្ឋបាលឃុំចំណាក្រោម និងប៉ុស្តិ៍នគរបាលរដ្ឋបាល ត្រូវគិតគូរយកចិត្តទុកដាក់ថែមទៀតដល់សុខទុក្ខសុខមាលភាព និងតម្រូវការជាអាទិភាពជាក់ស្តែងរបស់បងប្អូនប្រជាការពារ ដើម្បីជាការឆ្លើយតប និងដឹងគុណនូវការលះបង់ដ៏ធំធេងរបស់ពួកគាត់ជាមួយអាជ្ញាធរប្រកបដោយភាពជឿជាក់ និងនិរន្តរភាព។
ទន្ទឹមនឹងនេះដែរ លោកអភិបាលស្រុកបានលើកទឹកចិត្តដល់អាជ្ញាធរឃុំចំណាក្រោម ត្រូវបង្កើនការយកចិត្តទុកដាក់ថែមទៀតក្នុងការផ្ដល់សេវាជូនប្រជាពលរដ្ឋក្នុងមូលដ្ឋានប្រកបដោយភាពជឿជាក់ និងស្និទ្ធស្នាលបំផុត ហើយត្រូវធ្វើបច្ចុប្បន្នភាពកងកម្លាំងប្រជាការពារដើម្បីមានកងកម្លាំងគ្រប់គ្រាន់ក្នុងការឆ្លើយតបទៅនឹងតម្រូវការរក្សាសន្តិសុខសណ្ដាប់ធ្នាប់ក្នុងមូលដ្ឋានប្រកបដោយប្រសិទ្ធភាព។

សូមបញ្ជាក់ថា ប្រជាការពារដែលត្រូវទទួលបានឯកសណ្ឋាននៅក្នុងឱកាសនោះ មានចំនួន ១១២នាក់ ហើយគណៈអធិបតីបានលើកទឹកចិត្តឧបត្ថម្ភថវិកាម្នាក់ចំនួន ១ម៉ឺនរៀល និងកងកម្លាំងប៉ុស្តិ៍នគរបាលរដ្ឋបាលចំនួន ៥នាក់ ដោយម្នាក់ៗទទួលទឹកប្រាក់លើកទឹកចិត្ត ២ម៉ឺនរៀល៕

ដោយ៖ ស៊ុម វណ្ណា