AKP បន្ទាយមានជ័យថ្ងៃទី១៥ខែមីនាឆ្នាំ២០២៥៖ លោកឧត្តមសេនីយ៍ទោ សិទ្ធិ ឡោះ ស្នងការនៃស្នងការដ្ឋាននគរបាលខេត្តបន្ទាយមានជ័យកាលពី រសៀលថ្ងៃទី១៤ ខែមីនា ឆ្នាំ២០២៥នេះបានអញ្ជើញជួបសំណេះសំណាល និងប្រគល់អាវចំណាំងផ្លាតអន្តរាគមន៍ ដែលជាអំណោយដ៏ថ្លៃថ្លារបស់ ឯកឧត្តមនាយឧត្តមសេនីយ៍ ស ថេត អគ្គស្នងការនគរបាលជាតិ ដល់កងកម្លាំងអន្តរាគមន៍ នៃស្នងការដ្ឋាននគរបាលខេត្តបន្ទាយមានជ័យ និងអធិការដ្ឋាននគរបាលក្រុងស្រុកទាំង៩។

     ក្នុងឱកាសនោះ លោកឧត្តមសេនីយ៍ទោ សិទ្ធិ ឡោះ បានថ្លែងអំណរគុណយ៉ាងជ្រាលជ្រៅដល់ ឯកឧត្តមនាយឧត្តមសេនីយ៍ ស ថេត ដែលបានផ្តល់អាវចំណាំងផ្លាតអន្តរាគមន៍ដ៏មានតម្លៃនេះ ដល់កងកម្លាំងនគរបាលខេត្តបន្ទាយមានជ័យដើម្បី នឹងជួយបង្កើនសុវត្ថិភាព និងប្រសិទ្ធភាពក្នុងការបំពេញភារកិច្ចរបស់កងកម្លាំងនគរបាល ជាពិសេសក្នុងពេលបំពេញបេសកកម្មនៅពេលយប់ ឬក្នុងស្ថានភាពមានភ្លៀងធ្លាក់។
   លោកស្នងការ បានលើកទឹកចិត្តដល់កងកម្លាំងនគរបាលទាំងអស់ ត្រូវបន្តខិតខំប្រឹងប្រែងបំពេញភារកិច្ចរបស់ខ្លួនឱ្យបានល្អប្រសើរ ដើម្បីរក្សាសន្តិសុខ សណ្តាប់ធ្នាប់សាធារណៈ និងសុវត្ថិភាពជូនប្រជាពលរដ្ឋព្រោះ  កងកម្លាំងនគរបាល ត្រូវតែជាកម្លាំងស្នូលក្នុងការការពារសន្តិសុខ និងសណ្តាប់ធ្នាប់សង្គម ព្រមទាំងបម្រើប្រជាពលរដ្ឋឱ្យបានល្អបំផុត។

   ជាមួយគ្នានោះផងដែរលោកឧត្ដមសេនីយ៍ទោស្នងការក៏បានដាក់បទបញ្ជាដល់កងកម្លាំងអន្តរាគមន៍នៃស្នងការដ្ឋាននិងអធិការដ្ឋាននគរបាលក្រុងស្រុកនគរបាលប៉ុស្តិ៍រដ្ឋបាលគ្រប់ឃុំសង្កាត់ទាំងអស់ត្រូវយកចិត្តទុកដាក់បំពេញតួនាទីនិងភារកិច្ចរបស់ខ្លួនឱ្យបានល្អជាពិសេសចុះអន្តរាគមន៍ឱ្យបានទាន់ពេលវេលាពេលមានបណ្តឹងពីប្រជាពលរដ្ឋនិងហេតុការណ៍កេីតឡេីងក្នុងមូលដ្ឋានផ្សេងៗ។

      បន្តពង្រឹងការយាមល្បាត និងល្បាតចល័ត តាមគោលដៅសំខាន់ៗ ភូមិសាស្ត្រងាយរងគ្រោះ ដើម្បី បង្ការ បង្ក្រាប ទប់ស្កាត់ បទល្មើសគ្រប់ប្រភេទ ពិសេសបទល្មើសព្រហ្មទណ្ឌ និងក្មេងទំនើង។ពង្រឹងការត្រួតពិនិត្យអាវុធគ្រឿងផ្ទុះត្រួតពិនិត្យគ្រឿងញៀនពង្រឹងការត្រួតពិនិត្យអ្នកបើកបរមានជាតិស្រវឹង(ជាតិអាល់កុលលើកម្រិត) ដើម្បីបង្ការទប់ស្កាត់បទល្មើសផ្សេងៗ ពិសេសកាត់បន្ថយអត្រាគ្រោះថ្នាក់ចរាចរណ៍ក្រោមឥទ្ធិពលគ្រឿងស្រវឹងពង្រឹងទប់ស្កាត់ការបំពាក់ភ្លើងកែច្នៃខុសបច្ចេកទេស និងអប់រំច្បាប់ចរាចរណ៍ផ្លូវគោកដល់អ្នកបើកបរយានយន្តគ្រប់ប្រភេទ៕

ដោយ៖ ឈុន សារ៉ាត