AKP ភ្នំពេញ ថ្ងៃទី១៤ ខែមីនា ឆ្នាំ២០២៥ -- រដ្ឋមន្ត្រីការបរទេសចិន លោកវ៉ាង យី (Wang Yi) បានជួបពិភាក្សាជាមួយរដ្ឋមន្ត្រីក្រសួងការបរទេសឡាវលោក ថងសាវ៉ាញ ភូមិវីហាន (Thongsavanh Phomvihane) នៅទីក្រុងប៉េកាំង កាលពីថ្ងៃព្រហស្បតិ៍ ដោយអ្នកទាំងពីរបានសន្យាជំរុញការកសាងសហគមន៍ចិន-ឡាវ ជាមួយនឹងអនាគតរួមគ្នា។

លោក វ៉ាង ជាសមាជិកការិយាល័យនយោបាយនៃគណៈកម្មាធិការមជ្ឈិមបក្សកុម្មុយនិស្តចិន បាននិយាយថា ក្នុងរយៈពេល៦៤ឆ្នាំកន្លងមកនេះ ចាប់តាំងពីការបង្កើតទំនាក់ទំនងការទូតមក ភាគីទាំងពីរនិងប្រជាជាតិទាំងពីរបានឈរជាមួយគ្នាតាមរយៈបញ្ហាប្រឈម និងផ្តល់ការគាំទ្រគ្នាទៅវិញទៅមក។ ភាពជាដៃគូយុទ្ធសាស្ត្រគ្រប់ជ្រុងជ្រោយរវាងប្រទេសទាំងពីរកាន់តែរឹងមាំ និងមានស្ថិរភាពជាងមុន។

លោក វ៉ាង បាននិយាយថា ប្រទេសចិនគាំទ្រយ៉ាងមុតមាំចំពោះប្រទេសឡាវក្នុងការពង្រឹងការដឹកនាំរបស់គណបក្សរបស់ខ្លួន និងបង្ហាញពីឆន្ទៈក្នុងការបង្កើនការជឿទុកចិត្តគ្នាទៅវិញទៅមកជាយុទ្ធសាស្រ្ត ពង្រឹងសាមគ្គីភាព និងកិច្ចសហប្រតិបត្តិការ ព្រមទាំងជំរុញការកសាងសហគមន៍ចិន-ឡាវ ជាមួយនឹងអនាគតរួមគ្នា។

លោក ថងសាវ៉ាញ បានអបអរសាទរប្រទេសចិនចំពោះការកោះប្រជុំប្រកបដោយជោគជ័យនៃ «វគ្គទីពីរ» និងលទ្ធផលសំខាន់ៗ ហើយបានសរសើរការអភិវឌ្ឍរបស់ប្រទេសចិន     ចំពេលបរិយាកាសខាងក្រៅដ៏ស្មុគស្មាញ។

លោកបានមានប្រសាសន៍ថា ប្រទេសឡាវប្រកាន់យ៉ាងខ្ជាប់ខ្ជួននូវគោលនយោបាយចិនតែមួយ ហើយត្រៀមខ្លួនជាស្រេចដើម្បីធ្វើការជាមួយប្រទេសចិនដើម្បីធ្វើឱ្យមានវឌ្ឍនភាពកាន់តែខ្លាំងក្នុងការកសាងសហគមន៍ឡាវ-ចិន ជាមួយនឹងអនាគតរួមគ្នា៕

ដោយ៖ មូល មិនា (ប្រភព៖ ភីបផលដេលី)