AKP ភ្នំពេញ ថ្ងៃទី១៣ ខែមីនា ឆ្នាំ២០២៥ -- ឯកឧត្តម ជា វ៉ាន់ដេត រដ្ឋមន្ត្រីក្រសួងប្រៃសណីយ៍និងទូរគមនាគមន៍ និងឯកឧត្តម នេត្រ ភក្ត្រា រដ្ឋមន្ត្រីក្រសួងព័ត៌មាន នារសៀលថ្ងៃទី១៣ ខែមីនា ឆ្នាំ២០២៥ បានអញ្ជើញដឹកនាំកិច្ចប្រជុំពិនិត្យ និងពិភាក្សាលើសេចក្តីព្រាងអនុក្រឹត្យ ស្តីពីការរៀបចំ និងការប្រព្រឹត្តទៅរបស់ក្រសួងព័ត៌មាន ដោយមានការអញ្ជើញចូលរួមពីថ្នាក់ដឹកនាំ និងអង្គភាពជំនាញនៃក្រសួងទាំងពីរ នៅទីស្តីការក្រសួងប្រៃសណីយ៍និងទូរគមនាគមន៍។ ជាលទ្ធផល កិច្ចប្រជុំពិភាក្សាបានឯកភាពគ្នា ដោយឈរលើភាពត្រឹមត្រូវច្បាស់លាស់ ដើម្បីឈានទៅសម្រេចគោលនយោបាយរបស់រាជរដ្ឋាភិបាល។

ឯកឧត្តម នេត្រ ភក្ត្រា បានថ្លែងអំណរចំពោះ ឯកឧត្តម រដ្ឋមន្ត្រីក្រសួងប្រៃសណីយ៍ និងទូរគមនាគមន៍ ដែលបានទទួលយកសំណើពីក្រសួងព័ត៌មាន ដើម្បីធ្វើការពិនិត្យលើមុខងារមួយចំនួនរបស់ក្រសួងព័ត៌មានដើម្បីកុំឱ្យមានការជាន់តួនាទីគ្នាក្នុងក្របខ័ណ្ឌនៃការរៀបចំសេចក្តីព្រាងអនុក្រឹត្យស្តីពីការរៀបចំ និងការ ប្រព្រឹត្តទៅរបស់ក្រសួងព័ត៌មាន ជាមួយក្រសួងប្រៃសណីយ៍ និងទូរគមនាគមន៍ និងការរៀបចំស្របតាម គោលការណ៍ណែនាំរបស់រាជរដ្ឋាភិបាល«ជវភាពនៃប្រព័ន្ធតួអង្គតែមួយ»។

ឯកឧត្តម នេត្រ ភក្ត្រា បានគូសបញ្ជាក់ថា តាមរយៈកិច្ចសហប្រតិបត្តិការដ៏សំខាន់រវាងក្រសួងព័ត៌មាន និងក្រសួងប្រៃសណីយ៍ និងទូរគមនាគមន៍ ធ្វើឡើងស្ថិតក្នុងប្រពន្ធ័ “ ជវភាពនៃប្រព័ន្ធតូអង្គតែមួយ “ ដែលជាគោលការណ៍ដាក់ចុះដោយរាជរដ្ឋាភិបាលកម្ពុជា មានន័យថា ក្រសួង ស្ថាប័ន នៅក្រោមរាជរដ្ឋាភិបាល គឺបំពេញការងារមិនជាន់គ្នានោះទេ ហើយបម្រើឱ្យគ្នាទៅវិញទៅមក ដើម្បីឈានទៅសម្រេចគោលនយោបាយរួមតែមួយ។ ឯកឧត្តមរដ្ឋមន្រ្តីលើកឡើងថា ដូច្នេះការពិនិត្យឡើងវិញ ការវិភាគមុខងារ និងរចនាសម្ពន្ធ័អនុវត្តន៍ដោយក្រសួង ស្ថាប័នសាមុី ត្រូវផ្អែកលើគោលការណ៍ទូទៅដើម្បីធានាបាននូវការសម្រេចគោលនយោបាយរបស់រាជរដ្ឋាភិបាលក្រោមការដឹកនាំប្រកបដោយថាមពលរបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា។

ក្នុងឱកាសនោះ ឯកឧត្តម ជា វ៉ាន់ដេត បានសម្តែងនូវការគាំទ្រចំពោះសំណើលើកឡើងរបស់ក្រសួងព័ត៌មាន និងបានវាយតម្លៃខ្ពស់ចំពោះកិច្ចខិតខំប្រឹងប្រែងរបស់ថ្នាក់ដឹកនាំ មន្ត្រីជំនាញក្រសួងព័ត៌មាន ដែលបានប្រឹងប្រែងរួមគ្នាក្នុងការរៀបចំសេចក្តីព្រាងអនុក្រឹត្យស្តីពីការរៀបចំនិងការប្រព្រឹត្តទៅរបស់ក្រសួងព័ត៌មានបានល្អ។

ជាមួយគ្នានេះ   ឆ្លងតាមរយៈកិច្ចប្រជុំរវាង ឯកឧត្តម រដ្ឋមន្ត្រី ទាំងពីរក្រសួង បានសម្រេចឱ្យមន្ត្រីជំនាញបច្ចេកទេសនៃក្រសួងទាំងពីរបន្តធ្វើការរួមគ្នាកាន់តែល្អ ដើម្បីធ្វើយ៉ាងណាដោះស្រាយបញ្ហាប្រឈមនានាឱ្យទាន់ពេលវេលា ក្នុងន័យបម្រើផលប្រយោជន៍រួមរបស់ប្រទេសជាតិ ដែលពាក់ព័ន្ធវិស័យព័ត៌មាន និងសោតទស្សន៍ វិស័យ ប្រៃសណីយ៍ និងទូរគមនាគមន៍។

ទន្ទឹមនេះដែរ ឯកឧត្តម នេត្រ ភក្ត្រា ក៏បានអរគុណដល់ ឯកឧត្តម ជា វ៉ាន់ដេត ដែលបានគាំទ្រដល់ក្រសួងព័ត៌មានក្នុងការសម្របសម្រួលជាមួយ ITU រៀបចំគោលនយោបាយជាតិស្តីពីការផ្លាស់ប្តូរប្រព័ន្ធផ្សាយពីអាណាឡូកទៅឌីជីថល ផ្សព្វផ្សាយឌីជីថល៕

ដោយ៖ រិទ្ធី រូបថត៖ ឡុង ដេវីត