AKP ថ្ងៃទី១៣ ខែមីនា ឆ្នាំ២០២៥--

ឯកឧត្តមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡាមានប្រសាសន៍ថា  រាជរដ្ឋាភិបាលចាប់តាំងពីនីតិកាលទី១ នៃរដ្ឋសភាមក បានបង្កើតក្រសួងកិច្ចការនារីដើម្បីលើកម្ពស់សិទ្ធិរបស់នារី ហើយរាជរដ្ឋាភិបាលបានរៀបចំយុទ្ធសាស្ត្រ និងដាក់ចេញនូវផែនការនារីរតនៈឱ្យអនុវត្ត។ ចំពោះសិទ្ធិផ្នែកនយោបាយវិញរាជរដ្ឋាភិបាលបានដាក់ចេញការតែងតាំងគ្រប់កម្រិត ទាំងក្រុមប្រឹក្សាឃុំ ស្រុក ត្រូវតែមានតំណាងជានារី រីឯកម្រិតក្រសួងស្ថាប័ន ត្រូវមានរដ្ឋមន្ត្រី រដ្ឋលេខាធិការ ជានារីផងដែរ។ 

ការលើកឡើងរបស់ឯកឧត្តមបណ្ឌិតសភាចារ្យ ហង់ជួន ណារ៉ុន ដូចនេះក្នុងពិធីអបអរសាទរខួបលើកទី១១៤ ទិវាអន្តរជាតិនារី ៨មីនា ឆ្នាំ២០២៥ ក្រោមមូលបទ «សិទ្ធិ សមភាព និងភាពអង់អាចចំពោះស្ត្រី និងក្មេងស្រីគ្រប់រូប» នៅស្រុកកងមាស ខេត្តកំពង់ចាម កាលពីរសៀលថ្ងៃទី១៣ ខែមីនា ឆ្នាំ២០២៥។

ឯកឧត្តមបណ្ឌិតសភាចារ្យ  ឧបនាយករដ្ឋមន្ត្រី បានបន្តថា ដោយឡែកក្នុងវិស័យអប់រំការលើកកម្ពស់ការសិក្សាសម្រាប់ក្មេងស្រីជាកត្តាសំខាន់ដែលកម្រិតមត្តេយ្យសិក្សា និងកម្រិតបឋមសិក្សា ក្មេងស្រីចូលរៀនបាន ៥១ភាគរយ មធ្យមសិក្សាក្មេងស្រីរៀនពូកែជាងក្មេងប្រុស ជាភស្ដុតាងសិស្សនិទ្ទេសA ពាក់ កណ្ដាលជាក្មេងស្រី  រីឯនិទ្ទេសB និងC ៦២ភាគរយជាក្មេងស្រី ចំណែកឧត្តមសិក្សាអាត្រានិស្សិតនារីនិងបុរសស្មើគ្នា និងគរុនិស្សិតជានារី ៧៥ភាគរយ ។

ក្នុងឱកាសនេះ ឯកឧត្តមបណ្ឌិតសភាចារ្យ ហង់ជួន ណារ៉ុន បានថ្លែងអំណរគុណដល់ក្រុមការងារថ្នាក់ជាតិចុះមូលដ្ឋានស្រុកកងមាស ដែលបានផ្ដល់អាហារូបករណ៍ដល់សិស្ស និងលោកគ្រូ អ្នកគ្រូ អាចបន្តការសិក្សានៅតាមសាកលវិទ្យាល័យនានានៅរាជធានីភ្នំពេញ ក៏ដូចជាអាជ្ញាធរមូលដ្ឋាន លោកគ្រូ អ្នកគ្រូដែលបានយកអស់កម្លាំងកាយចិត្តចូលរួមអភិវឌ្ឍន៍ស្រុកកងមាស ក្នុងរយៈពេល៨ឆ្នាំចុងក្រោយនេះដោយសម្រេចបានសមិទ្ធផលជាច្រើនដូចជា ការជួសជុល និងសាងសង់សាលារៀនថ្មីបានជិត១០០ខ្នង មណ្ឌលសុខភាព សាងសង់ហេដ្ឋារចនាសម្ព័ន្ធ និងសូមបន្តការខិតខំប្រឹងប្រែងសហការគ្នាឱ្យកាន់តែប្រសើរឡើងក្នុងស្មារតីរួមគិត រួមធ្វើ ឈានទៅសម្រេចសមិទ្ធផលបន្ថែមជាច្រើនទៀតនាពេលខាងមុខ៕
ដោយ៖ ចាន់ សុភឿន (ប្រភព៖ ក្រសួងអប់រំ)