AKP ភ្នំពេញ ថ្ងៃទី១៣ ខែមីនា ឆ្នាំ២០២៥ -- យុវតី កៅ ម៉េងហ័ង បានសម្រេចក្ដីស្រមៃរបស់ខ្លួន ដោយបានចូលរួមធ្វើជាវាគ្មិនក្នុងកិច្ចពិភាក្សាកម្មវិធី Power For Girls នៃអង្គការសហប្រជាជាតិ នៅទីក្រុងញូវយក សហរដ្ឋអាមេរិក ក្នុងគោលដៅលើកកម្ពស់ស្រី្ត និងក្មេងស្រី តាមរយៈកម្មវិធី Technovation Girls ដែលបានផ្ដល់ឱកាសដល់រូបគេក្នុងការពង្រីកសក្ដានុពលក្នុងវិស័យបច្ចេកវិទ្យា លុបបំបាត់រនាំងយេនឌ័រ ព្រមទាំងអាចផ្ដួចផ្ដើមកម្មវិធីជួយជំរុញស្ដី្រ  និងក្មេងស្រីដទៃទៀតក្នុងការសម្រេចក្ដីស្រមៃក្នុងវិស័យស្ទែម។

បើតាមក្រសួងអប់រំ យុវជន និងកីឡាបានឱ្យដឹងថា កម្មវិធី Technovaiton Girls បានបណ្ដុះក្មេងស្រីឱ្យចាប់ផ្តើមចាប់អារម្មណ៍ជំនាញបច្ចេកវិទ្យាឌីជីថល សហគ្រិនភាព តាមរយៈកម្មវិធីក្រៅម៉ោងសិក្សា ធ្វើការងារជាក្រុម បង្កើតក្លឹបសិក្សាលើកម្មវិធីសរសេរកូដ និងបច្ចេកវិទ្យាឌីជីថល ឈានទៅបង្កើតកម្មវិធី  ទូរសព្ទដៃ ដើម្បីដោះស្រាយបញ្ហាដែលកើតមានជាក់ស្តែងក្នុងសហគមន៍។ កម្មវិធីនេះ ស្របតាមវិធានគន្លឹះរបស់ក្រសួងអប់រំ យុវជន និងកីឡា ពាក់ព័ន្ធនឹងការពង្រឹងកម្មវិធីក្រៅម៉ោងសិក្សា និងបរិវត្តកម្មឌីជីថលនៃការអប់រំ ដែលបង្កើតបរិស្ថានឌីជីថល និងកែលម្អវប្បធម៌សាលារៀនសម្រាប់ការអប់រំបែបឌីជីថល។

បច្ចុប្បន្នកុមារីកម្ពុជាកាន់តែច្រើន បានចូលរួមក្នុងកម្មវិធីប្រកួតប្រជែង Technovation Girls ដែលកន្លងមកបេក្ខជនកម្ពុជា ក៏ធ្លាប់បានឈានជើងចូលរួមកម្មវិធីប្រកួតកម្រិតអន្តរជាតិនៅសហរដ្ឋអាមេរិកផងដែរ។ កម្មវិធីនេះបានលើកកម្ពស់វត្តមានក្មេងស្រីលើវិស័យបច្ចេវិទ្យា អភិវឌ្ឍខ្លួនក្លាយជាយុវជនសតវត្សរ៍ទី២១៕

ដោយ៖ ចាន់ សុភឿន ,ប្រភព៖ ក្រសួងអប់រំ