AKP កំពង់ធំ ថ្ងៃទី១៣ ខែមីនា ឆ្នាំ២០២៥ -- លោក សាយ គឹមឡម អភិបាលស្រុកស្ទោង បានលើកទឹកចិត្តដល់ស្ត្រីយុវតីត្រូវបង្កើនគុណវុឌ្ឍិដើម្បីក្លាយជាអ្នកដឹកនាំអង្គភាព ឬស្ថាប័នបានជោគជ័យក្នុងឱកាសលោក និងលោក ឡាយ ស៊ីលី ប្រធានក្រុមប្រឹក្សាស្រុកស្ទោង អញ្ជើញជាអធិបតីភាពក្នុងពិធីអបអរសាទរខួបលើកទី១១៤ ទិវាអន្តរជាតិនារី ០៨មីនា ឆ្នាំ២០២៥ ក្រោមប្រធានបទ "សិទ្ធិ សមភាព និងភាពអង់អាចក្លាហានចំពោះស្ត្រី និងក្មេងស្រីគ្រប់រូប" នាព្រឹកថ្ងៃទី១៣ ខែមីនា ឆ្នាំ២០២៥ នៅសាលាស្រុកស្ទោង។

ទន្ទឹមនឹងនេះ លោក សាយ គឹមឡម បានផ្ដល់នូវបទពិសោធន៍ និងទស្សនទានល្អៗមួយចំនួនដល់បងប្អូនស្ត្រី និងយុវតី ក្នុងការចូលរួមអភិវឌ្ឍសហគមន៍ ការចូលរួមលើកកម្ពស់ និងអភិវឌ្ឍស្ថាប័ន ជាពិសេសការចូលរួមគ្រប់សកម្មភាពទូទៅរបស់រាជរដ្ឋាភិបាល ក៏ដូចជាកិច្ចការនយោបាយ ក្លាយជាមេភូមិ ក្រុមប្រឹក្សាឃុំ និងមេឃុំជាដើម ដែលជាការឆ្លើយតបទៅនឹងយុទ្ធសាស្ត្ររបស់រាជរដ្ឋាភិបាលក្នុងការកំណត់ស្ត្រីគឺជាឆ្អឹងខ្នងនៃសេដ្ឋកិច្ចសង្គមជាតិ។បានជំរុញឱ្យមានវត្តមានស្ត្រីកាន់តែច្រើនឡើងៗនៅក្នុងការធ្វើការសម្រេចចិត្តទាំងថ្នាក់ជាតិ និងថ្នាក់ក្រោមជាតិ ព្រមទាំងវិស័យឯកជនជាអ្នកគ្រប់គ្រងស្ថាប័នអង្គភាពផងដែរ។

ឆ្លៀតក្នុងឱកាសនោះ លោកអភិបាលស្រុកស្ទោងបានកោតសរសើរដល់លោក លោកស្រីនាយក នាយិកាលោកគ្រូ អ្នកគ្រូ ដែលបានចូលរួមចំណែកយ៉ាងធំធេង ក្នុងការលើកកម្ពស់វិស័យអប់រំនៅក្នុងស្រុកស្ទោង ជាពិសេសទទួលបាននូវសាលារៀនស្តង់ដាសាលាគំរូលេខ១ប្រចាំទូទាំងប្រទេសគឺសាលាបឋមសិក្សាក្អិន នៅក្នុងភូមិចំណាលើ ស្រុកស្ទោង ខេត្តកំពង់ធំ។

លោក សាយ គឹមឡម អភិបាលស្រុកស្ទោង បានណែនាំដល់លោកនាយកលោកស្រីនាយិកា លោកគ្រូ អ្នកគ្រូ ទាំងអស់ត្រូវខិតខំរក្សាសាមគ្គីភាពផ្ទៃក្នុងឱ្យកាន់ល្អប្រសើរថែមទៀត ជាពិសេសជាមួយដៃគូអភិវឌ្ឍន៍ អង្គការនានា និងមាតាបិតាសិស្ស ព្រមទាំងសហគមន៍ទាំងមូល ដើម្បីដឹកនាំ និងអភិវឌ្ឍសាលារៀនឱ្យកាន់តែទទួលបានជោគជ័យថែមទៀត៕

ដោយ ស៊ុម វណ្ណា