AKP ភ្នំពេញ ថ្ងៃទី១៣ ខែមីនា ឆ្នាំ២០២៥ -- ប្រធានាធិបតីអង់ហ្គោឡាបាននិយាយកាលពីថ្ងៃអង្គារថា ខ្លួននឹងទាក់ទងទៅកាន់ក្រុមឧទ្ទាម M23 ដើម្បីជួយសម្រួលដល់ការចរចាដោយផ្ទាល់ជាមួយរដ្ឋាភិបាលនៃសាធារណរដ្ឋប្រជាធិបតេយ្យកុងហ្គោ ដើម្បីបន្តសន្តិភាពនៅភាគខាងកើត ប្រទេសកុងហ្គោ។

សេចក្តីប្រកាសនេះបានធ្វើឡើងបន្ទាប់ពីកិច្ចប្រជុំនៅទីក្រុង Luanda រវាងប្រធានាធិបតីអង់ហ្គោឡា លោក ចូអៅ លូរេនកូ (Joao Lourenco) និងប្រធានាធិបតីនៃសាធារណរដ្ឋប្រជាធិបតេយ្យកុងហ្គោ លោក ហ្វេលីក ធីស៊ីសេកេឌី (Felix Tshisekedi) ។ នេះ​ជា​ដំណើរ​ទស្សនកិច្ច​លើក​ទី​ពីរ​របស់​លោក ធីស៊ីសេកេឌី ទៅកាន់​ប្រទេស​អង់ហ្គោឡា​សម្រាប់​កិច្ច​ចរចា​សន្តិភាព​ក្នុង​រយៈពេល​មួយ​ខែ។

លោក ទីណា សាឡាម៉ា (Tina Salama) អ្នកនាំពាក្យរបស់ប្រធានាធិបតីកុងហ្គោបាននិយាយនៅលើប្រព័ន្ធផ្សព្វផ្សាយសង្គមថា ប្រទេសកុងហ្គោកំពុងរង់ចាំការអនុវត្តគំនិតផ្តួចផ្តើមការសម្របសម្រួលជាមួយប្រទេសអង់ហ្គោឡា។

លើសពីនេះទៀត សហគមន៍អភិវឌ្ឍន៍អាហ្វ្រិកខាងត្បូងបានប្រកាសថា ខ្លួននឹងរៀបចំកិច្ចប្រជុំកំពូលវិសាមញ្ញមួយរបស់ប្រមុខរដ្ឋ និងរដ្ឋាភិបាលនៅថ្ងៃព្រហស្បតិ៍នេះ ដើម្បីពិភាក្សាអំពីស្ថានភាពសន្តិសុខនៅក្នុងប្រទេសកុងហ្គោ។

ជម្លោះដែលកំពុងបន្តរវាងក្រុមឧទ្ទាម M23 និងរដ្ឋាភិបាលកុងហ្គោបាននាំឱ្យមានការផ្លាស់ទីលំនៅរបស់ប្រជាជនយ៉ាងច្រើន និងធ្វើឱ្យវិបត្តិមនុស្សធម៌កាន់តែអាក្រក់ទៅៗ។ ភាព​តានតឹង​ស្ថិតនៅកម្រិតខ្ពស់ បើ​ទោះ​បី​ជា​មាន​កិច្ច​ខិត​ខំ​ប្រឹង​ប្រែង​ខាង​ការទូត និង​យោធា​ដើម្បី​បញ្ចប់​អរិភាព​ក៏​ដោយ៕

ដោយ៖ មូល មិនា (ប្រភព៖ ស៊ីនហួ)