AKP ភ្នំពេញ ថ្ងៃទី១៣ ខែមីនា ឆ្នាំ២០២៥ -- លោក សាឡាម៉ា ម៉ាអារូហ្វ (Salama Maarouf) ប្រធានការិយាល័យប្រព័ន្ធផ្សព្វផ្សាយរដ្ឋាភិបាលដែលគ្រប់គ្រងដោយក្រុមហាម៉ាសបាននិយាយថា កងកម្លាំងអ៊ីស្រាអែលបានសម្លាប់ជនជាតិប៉ាឡេស្ទីនយ៉ាងហោចណាស់ ១៣៧នាក់ ចាប់តាំងពីកិច្ចព្រមព្រៀងឈប់បាញ់ជាមួយក្រុមហាម៉ាស់បានចូលជាធរមាននៅក្នុងតំបន់ហ្គាហ្សា។

លោក ម៉ាអារូហ្វ បាននិយាយនៅក្នុងសេចក្តីថ្លែងការណ៍មួយថា «ក្នុងរយៈពេលដប់ថ្ងៃកន្លងមកនេះ កងកម្លាំងអ៊ីស្រាអែលបានបង្កើនការរំលោភលើបទឈប់បាញ់របស់ពួកគេ រួមទាំងការសម្លាប់មនុស្ស ៥នាក់នៅភាគខាងត្បូងតំបន់ហ្គាហ្សានៅថ្ងៃនេះ»។

ក្នុងចំណោមពួកគេ មានបងប្អូនប្រុស ២នាក់ត្រូវបានវាយប្រហារដោយយន្តហោះគ្មានមនុស្សបើក ដែលនាំឱ្យចំនួនសរុបនៃជនជាតិប៉ាឡេស្ទីនត្រូវបានសម្លាប់ចាប់តាំងពីកិច្ចព្រមព្រៀងសន្តិភាពចូលជាធរមាននៅថ្ងៃទី១៩ កើនដល់ ១៣៧នាក់រួមទាំង ៥២នាក់នៅទីក្រុងរ៉ាហ្វាហ៍។

លោក ម៉ាអារូហ្វ បានចោទប្រកាន់អ៊ីស្រាអែលពីការកើនឡើងលើប្រជាជនប៉ាឡេស្ទីន តាមរយៈការរួមបញ្ចូលគ្នានៃសកម្មភាពយោធា និងការបិទផ្លូវសេដ្ឋកិច្ច។ លោកបាននិយាយថា    «អ៊ីស្រាអែលកំពុងរឹតបន្តឹងការឡោមព័ទ្ធ និងបដិសេធប្រជាជនក្នុងការចូលទៅកាន់តំបន់ដែលមានតម្រូវការចាំបាច់ ដែលបានបន្តសម្លាប់ជនស៊ីវិលដោយឈាមត្រជាក់»។

លោកបានបន្ថែមថា «ជនរងគ្រោះរួមមានស្ត្រី និងកុមារ ដែលមិនមានការគំរាមកំហែងដល់កងកម្លាំងអ៊ីស្រាអែល។ ភាគច្រើនត្រូវបានសម្លាប់ពេលកំពុងត្រួតពិនិត្យផ្ទះរបស់ពួកគេនៅជិតទីតាំងកាន់កាប់»។

បទ​ឈប់​បាញ់​នៅតំបន់​ហ្គាហ្សា​ដែល​សម្របសម្រួល​ដោយប្រទេស​អេហ្ស៊ីប កាតា និង​សហរដ្ឋ​អាមេរិក ​បាន​ចាប់​ផ្តើម​នៅ​ថ្ងៃ​ទី១៩ ខែ​មករា បន្ទាប់​ពី​សង្រ្គាម​បំផ្លិចបំផ្លាញ​អស់ ១៥ខែ​នៅ​តំបន់ហ្គាហ្សា៕

ដោយ៖ មូល មិនា (ប្រភព៖ ភីបផលដេលី)