AKP ភ្នំពេញ ថ្ងៃទី១៣ ខែមីនា ឆ្នាំ២០២៥ -- តំណាងមកពី​រដ្ឋាភិបាល​ឡាវ និង​ថៃ បាន​ជួប​ប្រជុំ​គ្នា​នៅ​រដ្ឋធានី​វៀងចន្ទន៍របស់​ប្រទេស​ឡាវ ដើម្បី​ពិភាក្សា​អំពី​យុទ្ធសាស្ត្រ​ប្រយុទ្ធ​ប្រឆាំង​នឹងអំពើ​ជួញដូរ​មនុស្ស។

កិច្ចប្រជុំដែលបានធ្វើឡើងចាប់ពីថ្ងៃទី១១-១២ ខែមីនានោះ ផ្តោតសំខាន់ទៅលើការចែករំលែកព័ត៌មានស្តីពីកិច្ចខិតខំប្រឹងប្រែងប្រឆាំងការជួញដូរមនុស្ស ដែលរួមមានកិច្ចការពារជនរងគ្រោះ ការធ្វើមាតុភូមិនិវត្តន៍ និងការគាំទ្រក្រោយការធ្វើមាតុភូមិនិវត្តន៍។

នៅក្នុងជំនួបនោះ អ្នកចូលរួមបានសង្កត់ធ្ងន់ទៅលើសារៈសំខាន់នៃកិច្ចសហការក្នុងការត្រួតពិនិត្យសកម្មភាពជួញដូរមនុស្ស និងធានាដល់សុវត្ថិភាព និងសេចក្តីថ្លៃថ្នូររបស់ជនរងគ្រោះ។ នេះបើយោងតាមវិទ្យុជាតិឡាវបានចេញផ្សាយ។

កិច្ចប្រជុំនោះក៏បានពិនិត្យមើលទៅលើកិច្ចសហប្រតិបត្តិការកន្លងមក ដោយផ្តល់ព័ត៌មានថ្មីៗស្តីពីការគាំទ្រផ្នែកច្បាប់ និងសំណងជនរងគ្រោះផងដែរ។ លើសពីនេះទៀត ប្រទេសទាំងពីរបានពិនិត្យមើលឡើងវិញនូវផែនការសកម្មភាពរបស់ពួកគេសម្រាប់ឆ្នាំ២០២៣-២០២៥ ហើយបានចាប់ផ្តើមរៀបចំផែនការដំណាក់កាលបន្ទាប់នៃកិច្ចសហប្រតិបត្តិការសម្រាប់ឆ្នាំ២០២៦-២០២៨៕

ដោយ៖ យា ចិន្ដាខន្ដី (ប្រភព៖ VNA)