AKP កំពង់ធំ ថ្ងៃទី១៣ ខែមីនា ឆ្នាំ២០២៥--មន្ទីរកិច្ចការនារីខេត្តកំពង់ធំសហការជាមួយគម្រោង QSA បានរៀបចំបើកវគ្គអប់រំផ្សព្វផ្សាយស្តីពីការទប់ស្កាត់ការរំលោភបំពានផ្លូវភេទលើស្រ្តី និងក្មេងស្រ្តីនៅឃុំនីពេជ និងឃុំដំរីស្លាប់ ស្រុកកំពង់ស្វាយ ខេត្តកំពង់ធំ កាលពីថ្ងៃទី១២ ខែមីនា ឆ្នាំ២០២៥ ក្រោមវត្តមានលោកស្រី ស៊ិន ស៊ីផាន ប្រធានមន្ទីរកិច្ចការនារីខេត្តកំពង់ធំ និងដោយមានការអញ្ជើញចូលរួមពីលោកស្រី ទត គឹមសុភារិន្ទ អភិបាលរងស្រុកកំពង់ស្វាយ មន្រ្តីមន្ទីរកិច្ចការនារីខេត្ត-ការិយាល័យស្រុក មេឃុំ សមាជិកក្រុមប្រឹក្សាឃុំមេភូមិ និងប្រជាពលរដ្ឋ នៅឃុំនីពេជចំនួន១០៦នាក់ (ស្រី៧៤នាក់) និងឃុំដំរីស្លាប់ចំនួន១០១នាក់ (ស្រី៨៦នាក់)។

លោកស្រី ស៊ិន ស៊ីផាន បានថ្លែងអំណរគុណដល់អ្នកចូលរួមទាំងអស់ ដោយបានបញ្ជាក់ថា កម្មវិធីនេះពិតជាមានសារៈសំខាន់ ដើម្បីបង្កើនការយល់ដឹងដល់បងប្អូនប្រជាពលរដ្ឋនៅក្នុងគ្រួសារ និងសហគមន៍អំពីការរំលោភបំពានផ្លូវភេទលើស្ត្រី និងក្មេងស្រី បញ្រ្ជាបការទប់ស្កាត់គ្រឿងញៀនទៅលើស្រ្តី និងកុមារ។ ជាចំណុចរសើប និងមានអាទិភាពខ្ពស់ ការរាំងស្ទះដល់ការអភិវឌ្ឍ សេដ្ឋកិច្ច និងពង្រឹងសមត្ថភាព និងសិទ្ធិអំណាចរបស់ស្ត្រី និងសិទ្ធិកុមារ ក៏ដូចជាកិច្ចអភិវឌ្ឍន៍ជាតិឱ្យមានស្ថេរភាព សន្តិសុខកាន់តែប្រសើឡើង។

លោកស្រីប្រធានមន្ទីរបានលើកទឹកចិត្តឱ្យស្រ្តីគ្រប់រូបត្រូវថែរក្សាសុខភាពនិងមានអនាម័យល្អក្នុងការរស់នៅ និងតាមដានសុខភាពជាប្រចាំដូចជាជំងឺមហារីកស្បូន និងជំងឺផេ្សងៗទៀតពាក់ព័ន្ធរោគស្រ្តី ហើយសុំឱ្យមាតាបិតា អាណាព្យាបាលថែទាំគ្រប់គ្រងកូនស្រីឱ្យបានល្អដើម្បីសុត្ថិភាពរបស់កូនកុំឱ្យមានបញ្ហាអ្វីកើតឡើង។នាពេលបច្ចុប្បន្ននេះ រាជរដ្ឋាភិបាលបានយកចិត្តទុកដាក់លើកកម្ពស់ស្រ្តីនិងក្មេងស្រីឱ្យទទួលបាននូវឱកាសស្មើគ្នា និងជួយជនរងគ្រោះដោយការរំលោកភបំពាននានាក្នុងនោះ បានផ្លល់មេធាវីសម្រាប់ជនរងគ្រោះក្រីក្រ ដោយមិនគិតថវិកាផងដែរ “ជួយស្រ្តីគឺជួយខ្លួនឯង”៕

ដោយ ស៊ុម វណ្ណា