AKP ភ្នំពេញ ថ្ងៃទី១២ ខែមីនា ឆ្នាំ២០២៥--មហោស្រពភាពយន្តអន្តរជាតិកម្ពុជា (CIFF) លើកទី ១៤ នឹងចាក់បញ្ចាំងខ្សែភាពយន្តមកពី ៤១ ប្រទេស តាមរយៈការជ្រើសរើសភាពយន្តចំនួន ១៥១រឿង ដែលក្នុងនោះមានភាពយន្តខ្មែរចំនួន ៦០ រឿង ទាំងភាពយន្តខ្នាតខ្លី និងខ្នាតវែង ភាពយន្តឯកសារ និងគំនូរជីវចល។ ចាប់ពីថ្ងៃទី ២១ ដល់ថ្ងៃទី ២៩ ខែមីនា ឆ្នាំ២០២៥ មហោស្រពភាពយន្តអន្តរជាតិកម្ពុជា CIFF លើកទី ១៤ នឹងនាំមកនូវការបញ្ចាំងភាពយន្ត និងកម្មវិធីភាពយន្តនិងកិច្ចពិភ្សានានាសរុបជាង ១៥០ ដែលបើកឱ្យចូលរួមដោយឥតគិតថ្លៃ នៅគ្រប់រោងភាពយន្តធំៗ និងទីតាំងដ៏អស្ចារ្យជាច្រើនទៀតក្នុងរាជធានីភ្នំពេញ រួមមានរោងភាពយន្ត Legend Olympia និង Exchange Square រោងភាពយន្ត Major Cineplex Aeon 1 និង Mean Chey វិទ្យាស្ថានបារាំង មជ្ឈមណ្ឌលបុប្ផាណា សណ្ឋាគារ Rosewood ភ្នំពេញ និងរោងភាពយន្ត Fableជាដើម។ នេះបើយោងតាមសេចក្ដីប្រកាសព័ត៌មានរបស់មហោស្រពភាពយន្តអន្តរជាតិកម្ពុជា (CIFF)។

ក្នុងសេចក្ដីប្រកាសបានបញ្ជាក់ថា កម្មវិធីកម្រាលព្រំក្រហមនៃពិធីបើកកម្មវិធីមហោស្រព CIFF លើកទី ១៤ នឹងប្រព្រឹត្តទៅនៅសាលមហោស្រពចតុម្មុខ នៅថ្ងៃទី ២១ ខែមីនា ចំណែកឯកម្មវិធីបិទកម្មវិធីនឹងប្រព្រឹត្តទៅនៅថ្ងៃទី ២៩ ខែមីនា ហើយព្រឹត្តិការណ៍ទាំងពីរគឺសម្រាប់តែភ្ញៀវកិត្តិយសដែលត្រូវបានអញ្ជើញប៉ុណ្ណោះ។

មហោស្រពភាពយន្តអន្តរជាតិកម្ពុជាលើកទី ១៤ អាចដំណើរការទៅបានដោយមានការគាំទ្រពីរាជរដ្ឋាភិបាលកម្ពុជា ជាពិសេស ក្រសួងវប្បធម៌ និងវិចិត្រសិល្បៈ ដែលបាន និងកំពុងខិតខំប្រឹងប្រែងយ៉ាងស្វិតស្វាញ ដើម្បីស្ដារសុវត្ថិភាព និងទីកន្លែងសិល្បៈឡើងវិញ។

សម្រាប់ដៃគូផ្លូវការនៃមហោស្រព CIFF លើកទី ១៤ រួមមានអង្គការសហប្រជាជាតិនៅកម្ពុជា សហការជាមួយ UNDP និង អង្គការសុខភាពពិភពលោកហៅកាត់ថាWHO អង្គជំនុំជម្រះវិសាមញ្ញក្នុងតុលាការកម្ពុជា (អ.វ.ត.ក.)  និងស្ថានទូតអូស្ត្រាលីប្រចាំនៅកម្ពុជា និងការគាំទ្រវិស័យសិល្បៈ ឆ្លុះបញ្ចាំងពីគុណតម្លៃស្នូលរបស់យើងក្នុងការជំរុញទំនាក់ទំនងរវាងប្រទេសអូស្ត្រាលី និងកម្ពុជា និងការទទួលស្គាល់នូវឧត្តមភាព។

កម្មវិធីពិសេសៗនៃមហោស្រព CIFF លើកទី ១៤ កម្មវិធីពិសេសទាំងពីរនៅឆ្នាំនេះ នឹងផ្តោតលើបទពិសោធន៍ពិភពនិម្មិត (Virtual Reality)ពីប្រវត្តិសាស្រ្តខ្មែរក្រហម សៀវភៅមានចំណងជើង«ជីវិតកូនថ្លៃ កូនត្រូវតែរស់» របស់លោក ពិន យ៉ាថៃ នឹងផ្ដល់ជូននូវបទពិសោធន៍ពិភពនិម្មិត ហើយវាត្រូវបានសម្ដែងដោយរាល្បីសញ្ជាតិបារាំង-កម្ពុជា កញ្ញា ELODIE YUNG និងបង្កើតឡើងដោយសមិទ្ធករភាពយន្តអាមេរិកាំង លោកស្រី Victoria Bousis យកទៅផលិតជាខ្សែភាពយន្តក្នុងទម្រង់ថ្មីតាមរយៈបច្ចេកវិទ្យា ពិភពនិម្មិត ឬ Virtual Reality។ លោកស្រី VICTORIA BOUSIS ដែលនឹងចូលរួមក្នុងកម្មវិធីបើកម្មវិធីមហោស្រពភាពយន្ត នឹងផ្តល់ជូននូវបទពិសោធន៍ជាលើកតំបូងនាសម័យខ្មែរក្រហម តាម    រយៈបទពិសោធន៍ពិភពនិម្មិតរបស់នាង។ សៀវភៅរឿង "ជិវតកូនថ្លៃ កូនត្រូវតែរស់" រឿងពិតដ៏អាក្រក់របស់លោក ពិន យ៉ាថៃ វិស្វករខ្មែរដែលបានរួចរស់ជីវិតពីរបបខ្មែរក្រហមដោយផ្តល់ជូនទស្សនិកជននូវទស្សនៈផ្ទាល់ខ្លួនយ៉ាងជ្រាលជ្រៅអំពីសោកនាដកម្មប្រវត្តិសាស្ត្រនេះ។ បទពិសោធន៍ពិភពនិម្មិត VR នឹងត្រូវបានផ្តល់ជូនទស្សនាដោយសេរីដល់ទស្សនិកជននៅមជ្ឈមណ្ឌលបុប្ផាណា។

ជាមួយគ្នានេះ ដើម្បីរម្លឹកដល់ការចូលកាន់កាប់របស់ខ្មែរក្រហម CIFF ឆ្នាំនេះនឹងដាក់បញ្ចូលគ្នានូវខ្សែភាពយន្តសំខាន់ៗជាច្រើន ដែលបង្ហាញពីពេលវេលាដ៏ខ្មៅងងឹតបំផុតនៃទីក្រុងភ្នំពេញ។ កម្មវិធីពិសេសនៅឆ្នាំនេះចំណងជើង៖ “១៩៧៥-២០២៥៖ ពីភពអន្ធការទៅរកពន្លឺក្នុងរឿងកម្ពុជា” នៅឆ្នាំ ២០២៥ ពិធីរម្លឹកខួបលើកទី ៥០ នៃការឡើងកាន់អំណាចរបស់ខ្មែរក្រហមនៅកម្ពុជានឹងធ្វើឡើងយ៉ាងឱឡារិក។ ឆ្នាំដ៏សំខាន់នេះ គឺជាការចាប់ផ្តើមនៃជំពូកដ៏ខ្មៅងងឹត បំផុតមួយក្នុងប្រវត្តិសាស្ត្រ ដែលផ្តួចផ្តើមឡើងក្នុងឆ្នាំ ១៩៧៥ ក្រោមការដឹកនាំរបស់ ប៉ុល ពត។

កម្មវិធីបញ្ចាំងភាពយន្ត «ស្ត្រីគ្មានព្រំដែន៖ រឿងរ៉ាវស្រ្តីជុំវិញពិភពលោក»  អបអរសាទរភាពធន់ កម្លាំង និងថាមពលផ្លាស់ប្តូររបស់ស្ត្រីមកពីវប្បធម៌ផ្សេងៗគ្នា និងឆ្លងទ្វីប។ ស្ត្រីបានក្លាយជាចំណុចស្នូល នៃគ្រប់សង្គមទាំងការបង្កើតប្រវត្តិសាស្ត្រ វប្បធម៌ និងវឌ្ឍនភាព។ ពីភាពជាអ្នកដឹកនាំក្នុងគ្រួសារ និងសហគមន៍ រហូតដល់ការច្នៃប្រឌិតផ្នែកវិទ្យាសាស្ត្រ នយោបាយ និងសង្គម ស្ត្រីបានរួមចំណែកដល់មូលដ្ឋានគ្រឹះនៃអរិយធម៌។ ទោះបីជាប្រឈមមុខនឹងបញ្ហាក៏ដោយ ក៏ពួកគេបន្តជំរុញការផ្លាស់ប្តូរ តស៊ូមតិដើម្បីសមភាព និងយុត្តិធម៌នៅទូទាំងពិភពលោក។ សំឡេងរបស់ពួកគេដែលត្រូវបានគេមើលរំលងជាញឹកញាប់ កាន់អំណាចយ៉ាងសម្បើមក្នុងការជំរុញឱ្យមានការអភិវឌ្ឍន៍ប្រកបដោយមាននិរន្តភាព  សន្តិភាព និងសាមគ្គីភាពសកល។ ការទទួលស្គាល់សារៈសំខាន់របស់ស្ត្រីគឺជាគន្លឹះក្នុងការបង្កើតពិភពលោកដែលមានតុល្យភាព និងវិបុលភាពសម្រាប់ទាំងអស់គ្នា។ CIFF នឹងចាក់បញ្ចាំងរឿង CLIMACTERIC WOMAN ដោយ Yeonjin Jo ជាមួយនឹងវត្តមានរបស់អ្នកដឹកនាំជនជាតិកូរ៉េនេះផងដែរ។

សូមជម្រាបជូនផងដែរថា មហោស្រពភាពយន្តអន្តរជាតិកម្ពុជា គឺជាព្រឹត្តិការណ៍ភាពយន្ត និងវប្បធម៌អន្តរជាតិដ៏ធំបំផុតរបស់កម្ពុជា។ មហោស្រពបានចាប់ផ្តើមនៅក្នុងឆ្នាំ ២០១០ ដោយបានដើរតួជាកាតាលីករសម្រាប់គំនិតផ្តួចផ្តើមក្នុងវិស័យភាពយន្ត ដែលប្រមូលផ្តុំអ្នកចូលរួមច្រើនជាង ២ ម៉ឺននាក់ ជារៀងរាល់ឆ្នាំ។ មហោស្រព CIFF ក៏ដើរតួជាស្ពានតភ្ជាប់រវាងប្រទេសកម្ពុជា និងពិភពលោក តាមរយៈភាសាសកលនៃភាពយន្ត និងវប្បធម៌។ មហោស្រព CIFF ក៏ជំរុញដល់ការចរាចរនៃភាពយន្តក្នុងតំបន់ និងលើកកម្ពស់ផលិតកម្មកម្ពុជាទៅកាន់ឆាកអន្តរជាតិ៕

ដោយ៖ រិទ្ធី, ប្រភព៖ CIFF