AKP កណ្ដាល ថ្ងៃទី១៣ ខែមីនា ឆ្នាំ២០២៥-- លោក នូវប៉េង ច័ន្ទតារា សមាជិកក្រុមប្រឹក្សាខេត្តកណ្តាល កាលពីរសៀលថ្ងៃទី១២ ខែមីនា ឆ្នាំ២០២៥ បានអញ្ជើញជាអធិបតីក្នុងពិធីបិទកិច្ចសន្ទនាថ្នាក់ខេត្ត ស្តីពី “ការលើកកម្ពស់តម្លាភាព និងគណនេយ្យភាពនៃការគ្រប់គ្រងថវិកាថ្នាក់ក្រោមជាតិ” នៅសាលាខេត្តកណ្តាល។

ក្នុងឱកាសនោះ លោក នូវប៉េង ច័ន្ទតារា បានថ្លែងអំណរគុណចំពោះវត្តមានដ៏មានតម្លៃរបស់លោក លោកស្រី ដែលបានឆ្លៀតឱកាសដ៏មមាញឹកក្នុងការងាររបស់ខ្លួនដើម្បីចូលរួមកិច្ចសន្ទនាថ្នាក់ខេត្តនេះ ដែលមានរយៈពេល១ថ្ងៃពេញ នៅសាលប្រជុំសាលាខេត្ត ដោយមានសមាសភាពចូលរួមចម្រុះមកពីរដ្ឋបាលថ្នាក់ក្រោមជាតិ អង្គការសង្គមស៊ីវិលជាដៃគូអភិវឌ្ឍន៍ សហគមន៍មូលដ្ឋាន និងអ្នកស្ម័គ្រចិត្តដែលតំណាងឱ្យប្រជាពលរដ្ឋ។ ការអនុវត្តគម្រោងនេះបានចូលរួមចំណែកលើកតម្លាភាព និងគណនេយ្យភាពនៃការគ្រប់គ្រងថវិកាថ្នាក់ក្រោមជាតិនៅតំបន់គោលដៅរបស់គម្រោង តាមរយៈការពង្រឹងសមត្ថភាពដល់រដ្ឋបាលថ្នាក់ក្រោមជាតិ ការផ្សព្វផ្សាយព័ត៌មាន ចំណេះដឹង ដល់ប្រជាពលរដ្ឋមូលដ្ឋាន ការរៀបចំពិព័រណ៍ថវិកាឃុំប្រចាំឆ្នាំ ការគាំទ្រដល់ការផលិតឯកសារ ផ្សព្វផ្សាយចំណេះដឹង និងអប់រំ ការរៀបចំដំណើរទស្សនកិច្ចផ្លាស់ប្តូរបទពិសោធន៍រវាងឃុំ សង្កាត់ គោលដៅរបស់គម្រោង ការរៀបចំកិច្ចសន្ទនាថ្នាក់ខេត្តដូចថ្ងៃនេះ និងសកម្មភាពជាច្រើនទៀត នៅខេត្ត គោលដៅចំនួន ៤ រួមមាន៖ ខេត្តកំពង់ធំ ខេត្តកំពង់ឆ្នាំង ខេត្តកណ្តាល និងខេត្តត្បូងឃ្មុំ គ្របដណ្តប់លើស្រុក ក្រុងគោលដៅចំនួន៩ និងឃុំ-សង្កាត់គោលដៅចំនួន៤៨។

ទន្ទឹមនឹងនេះ លោក នូវប៉េង ច័ន្ទតារា ក៏សង្ឃឹមផងដែរថា ប្រសិនបើអាចមានលទ្ធភាព គម្រោងគួរពិចារណាក្នុងការពង្រីកតំបន់គោលដៅ និងបន្តគាំទ្រអនុវត្ត គម្រោងរបស់ខ្លួនបន្តទៀត ព្រោះការធ្វើការងារជាមួយគ្នាក្នុងភាពជាដៃគូ ពិតជាបានជួយគាំទ្រដល់រដ្ឋបាលថ្នាក់ក្រោមជាតិកាន់តែមានលទ្ធភាពគ្រប់គ្រាន់ក្នុងការបម្រើផលប្រយោជន៍ ឬសេវាសាធារណៈ ជូនប្រជាពលរដ្ឋទូទៅនៅគ្រប់មជ្ឈដ្ឋាន៕

ដោយ ណយ នឿន (ប្រភព៖ រដ្ឋបាលខេត្តកណ្តាល)