AKP ព្រះសីហនុ ថ្ងៃទី១១ ខែមីនា ឆ្នាំ២០២៥-- ឯកឧត្តម ប៉ែន សុផល រដ្ឋលេខាធិការក្រសួងរៀបចំដែនដី នគរូបនីយកម្ម និងសំណង់ និងជាអគ្គលេខាធិការនៃអគ្គលេខាធិការដ្ឋានគណៈកម្មាធិការជាតិគ្រប់គ្រង និងអភិវឌ្ឍតំបន់ឆ្នេរសមុទ្រកម្ពុជា និងឯកឧត្តម ម៉ាង ស៊ីណេត អភិបាលនៃគណៈអភិបាលខេត្តព្រះសីហនុ បានអញ្ជើញបើកកិច្ចប្រជុំពិនិត្យផ្ទៀងផ្ទាត់ទីតាំងគន្លងខ្សែផ្លូវជិះកង់ទេសចរណ៍នៅតាមបណ្តោយឆ្នេរសមុទ្រក្នុងភូមិសាស្ត្រខេត្តព្រះសីហនុ នៅសាលាខេត្តព្រះសីហនុ ដោយមានការចូលរួមដោយលោកអភិបាលរងខេត្ត នាយករដ្ឋបាលសាលាខត្ត អភិបាលក្រុង ស្រុក មន្ទីរ និងអាជ្ញាធរដែនដី នៅសាលាខេត្តព្រះសីហនុ នារសៀលថ្ងៃអង្គារ ទី១១ ខែមីនា ឆ្នាំ២០២៥។

ឯកឧត្តម ម៉ាង ស៊ីណេត បានស្វាគមន៍អគ្គលេខាធិការក្រសួងរៀបចំដែនដី និងប្រតិភូ ក្នុងកិច្ចប្រជុំផ្ទៀតផ្ទាត់ទីតាំងគន្លងខ្សែផ្លវជិះកង់ទេសចរណ៍នៅតាមបណ្តោយឆ្នេរសមុទ្រក្នុងខេត្តព្រះសីហនុ និយាយដោយឡែកនៅតាមបណ្តោយឆ្នេរខេត្តទាំង៤នៃព្រះរាជាណាចក្រកម្ពុជា ដែលជាមរតករបស់ថ្នាក់ដឹកនាំរបស់យើងបានស្វែងរកសុខសន្តិភាព ដើម្បីឱ្យយើងមានពេលគិតគូររៀបចំតំបន់ទេសចរណ៍ដ៏មានតម្លៃ ពិសេសការអភិវឌ្ឍរបស់ខេត្តព្រះសីហនុនាពេលបច្ចុប្បន្ននេះ។ ទន្ទឹមនោះរាជរដ្ឋាភិបាលបានរៀបចំផែនការមេជំរុញខេត្តព្រះសីហនុ ជាតំបន់សេដ្ឋកិច្ចពិសេសគំរូពហុបំណង ដោយធ្វើការបែងចែកជា ៤ប្លុក៖ ១. តំបន់ដឹកជញ្ជូន និងឧស្សាហកម្ម ២. តំបន់ទីក្រុងសមាហរណ្មកម្ម ពាណិជ្ជកម្ម ទេសចរណ៍ និងហិរញ្ញវត្ថុ ៣. បណ្តាកោះ ជាតំបន់ទេសចរណ៍ និង៤. ស្រុកព្រៃនប់ និងស្រុកកំពង់សិលា ជាតំបន់ទេសចរណ៍ និងកសិឧស្សាហកម្ម នេះជាផែនការមេរបស់រាជរដ្ឋាភិបាល ដែលជាការតភ្ជាប់ទេសចរណ៍ប្រទាក់ក្រឡាធម្មជាតិតំបន់ឆ្នេរ។ គន្លងខ្សែផ្លូវជិះកង់នេះ ជាសមិទ្ធិផលថ្មីមួយទៀតក្នុងការទាក់ទាញភ្ញៀវទេសចរ និងជាសមិទ្ធផលសម្រាប់មនុស្សជំនាន់ក្រោយៗទៀតផង។ គន្លងខ្សែផ្លូវជិះកង់ទេសចរណ៍ នៅតាមបណ្តោយឆ្នេរសមុទ្រក្នុងភូមិសាស្ត្រខេត្តព្រះសីហនុ រុញច្រានគម្រោងនេះឱ្យកើតចេញជារូបរាង ជាសមិទ្ធផលសម្រាប់ជាតិ និងមនុស្សជាតិនាពេលខាងមុខ។

ទន្ទឹមនឹងនេះ ឯកឧត្តមរដ្ឋលេខាធិការបានបើកកិច្ចប្រជុំដោយគូសបញ្ជាក់ថា គោលនយោបាយរបស់រាជរដ្ឋាភិបាលកម្ពុជាអាណត្តិទី៦បានធ្វើការអភិវឌ្ឍប្រទេសមានរីកចម្រើនក្នុងព្រះរាជាណាចក្រកម្ពុជា រហូតបន្តមករដ្ឋាភិបាលអាណត្តិទី៧ ដែលបានដាក់ចេញនូវយុទ្ធសាស្ត្របញ្ចកោណ ដំណាក់កាលទី១ ដែលបានដាក់ចេញផែនការមេអភិវឌ្ឍន៍ខេត្តព្រះសីហនុ ជាតំបន់សេដ្ឋកិច្ចពិសេសគំរូពហុបំណង ដែលមានប្រទាក់ក្រឡាគ្នា។ ទន្ទឹមនោះ រាជរដ្ឋាភិបាលបាន និងកំពុងរៀបចំទីតាំងគន្លងខ្សែផ្លូវជិះកង់ទេសចរណ៍តាមបណ្តាយឆ្នេរសមុទ្រក្នុងខេត្តទាំង៤ ក្នុងនោះគន្លងខ្សែផ្លូវជិះកង់ទេសចរណ៍តាមបណ្តោយឆ្នេរក្នុងភូមិសាស្ត្រខេត្តព្រះសីហនុ ហើយសមិទ្ធផលដែលកើតមាននៅក្នុងខេត្តព្រះសីហនុនាពេលបច្ចុប្បន្ន មានការរីកចម្រើនដែលជាសមិទ្ធផលថ្មីៗជាបន្តបន្ទាប់ ដែលជាប៉ូលអភិវឌ្ឍជាតិ ហើយផ្លូវជិះកង់នៅតាមបណ្តោយឆ្នេរនៅក្នុងភូមិសាស្ត្រខេត្តព្រះសីហនុ ដែលចាប់ផ្តើមចេញពីខេត្តកែប កំពត ព្រះសីហនុ និងខេត្តកោះកុង។

ឯកឧត្តម ប៉ែន សុផល បានបញ្ជាក់ថា កិច្ចប្រជុំនាពេលនេះមានគោលដៅពីរ៖ ១. ផ្លូវទេសចរណ៍តំបន់ឆ្នេរ និង២. ការពារទ្រព្យសម្បត្តិដីចំណីឆ្នេរ កិច្ចប្រជុំផ្ទៀងផ្ទាត់គន្លងខ្សែផ្លូវជិះកង់តាមបណ្តោយឆ្នេរក្នុងភូមិសាស្ត្រខេត្តព្រះសីហនុ មានប្រវែង១៧៧គីឡូម៉ែត្រ៕

ដោយ ងូ សុមុនី